Рэгіянальныя навіны

  • Наталля Штэйнер, Працоўная слава № 89 от 23 ноября 2018 Скачать номер 23 ноября 2018 10:00 Калейдоскоп Беларуская

         Цэх па выпуску харчовага алею на ААТ “Валожынскі льнокамбінат” працуе кругласутачна. За змену тут выпускаюцца 600 кілаграмаў карыснага льнянога алею, які пастаўляюць на базу “Белзнешгандаль” і ў сетку магазінаў “Еўраопт”. Бяруць валожынскі алей на рэалізацыю і прыватныя камерсанты, але зусім невялікімі партыямі. Разбіраюць яго землякі ў якасці сувеніраў.

        Сёлета ўпершыню вытворцы са сваёй прадукцыяй выязджалі ў выхадныя дні ў сталіцу: ім было выдзелена месца на “Чыжоўка-арэне”. Выязны гандаль праходзіў чатыры разы ў кастрычніку і адзін – у лістападзе. Ён прынёс у скарбонку прадпрыемства 6295 рублёў 54 капейкі. Больш за ўсё было рэалізавана насення лёну – 1659 упаковак па 0,5 кілаграма. Таксама вялікай папулярнасцю ў жыхароў сталіцы карыстаўся алей, якога было прададзена 1357 адзінак. У асартыменце былі таксама льняное тэхнічнае масла, макуха рыбалоўная, вырабы з ільняной тканіны.

     

         У мінулую суботу ў Рэспубліканскім палацы дзяцей і моладзі ў Мінску прайшоў першы фестываль “Спяваем пра мора”, арганізаваны Беларускім саюзам ваенных маракоў. У ім прымалі ўдзел як прафесіянальныя музыканты, так і самадзейныя салісты, дуэты, ансамблі.

        Паўдзельнічаць у фестывалі была запрошана і наша зямлячка – салістка Таццяна Бандарэнка, якая выканала песню В. Салаўёва-Сядова “Матроскія ночы”. У падарунак Таццяна атрымала кнігу ад марака-паэта Леаніда Краўчука, а таксама моцны творчы зарад, мора энергіі і пазітыву.

     

        У раённым этапе рэспубліканскай выставы-конкурсу “Калядная зорка” прынялі ўдзел работы, прадстаўленыя 15 установамі адукацыі. На вуліцы яшчэ восень, а школьнікі ўжо “марылі” пра Каляды і Новы год і свае мроі выплёсквалі ў творчых работах, выкананых у розных тэхніках і з розных матэрыялаў.

        Творчымі, якаснымі, заснаванымі на культурных каштоўнасцях беларускага народа і асаблівасцях нацыянальнай культуры былі работы навучэнцаў аб’яднанняў па інтарэсах Чэхаўшчынскай дапаможнай школы-інтэрната, Валожынскага і Івянецкага цэнтраў творчасці дзяцей і моладзі. Новыя тэхнікі ў дэкаратыўна-прыкладной творчасці, аўтарскія знаходкі, беларускі каларыт адлюстравалі ў сваіх работах удзельнікі аб’яднанняў па інтарэсах гімназіі № 1 г. Валожына, СШ № 2 райцэнтра, Сівіцкага, Пяршайскага, Гародзькаўскага ВПК. Вынікі былі падведзены ў дзевяці намінацыях: “Зіма ў Беларусі”, “Калядная кампазіцыя”, “Калядная зорка”, “Арт-аб’ект”, “Ёлачная цацка”, “Навагодняя ялінка”, “Сувенір-падарунак”, “Навагодні персанаж”, “Зімовы спорт”. У некаторых намінацыях журы назвала да сямі работ-пераможцаў. Усе яны адпраўлены на абласны этап конкурсу.

     

        На канале “Беларусь 24” прайшла перадача з цыкла “Гарады Беларусі”, прысвечаная Валожыну.

        Аўтар – журналіст Дзяніс Ліпкін – за невялікі прамежак часу расказаў цікавыя гістарычныя факты пра наш горад і навакольныя мясціны, успомніў знакамітых людзей, якія ўслаўлялі валожынскі край. Дзякуючы сацыяльным сеткам, перадача набыла новае жыццё. Тэлесюжэт пра Валожын праглядзелі ўжо больш за 5 тысяч чалавек. Спатканне з малой радзімай асабліва прыемна выхадцам з Валожына, якія даўно жывуць у блізкім і далёкім замежжы і не маюць магчымасці часта бываць у Беларусі.

     

         У гасцях у выхаванцаў Івянецкага дзіцячага дома-інтэрната ўпершыню пабывалі прадстаўнікі воінскай часці № 3214 унутраных войскаў МУС Рэспублікі Беларусь.

        23 воіны-спецназаўцы прадэманстравалі выхаванцам свае трукі. Пасля ў канцэрце спявалі пад гітару, паказалі інсцэніроўку. Спачатку выступалі госці, а потым свае творчыя здольнасці паказалі самі выхаванцы, якім воіны апладзіравалі стоячы. Прывезлі вайскоўцы і салодкія пачастункі – торты, пячэнне. Такі візіт абаронцаў Айчыны арганізавала валанцёр Анжаліка Бойка.

     

        18 лістапада 45 школьнікаў, якія вывучаюць польскую мову, і іх настаўнікі пабывалі на экскурсіі па Гродзеншчыне. Падарожжа, прымеркаванае да 220-годдзя з дня нараджэння А. Міцкевіча, арганізаваў раённы аддзел ГА “Польска Мацеж Школьна”.

        У Навагрудку школьнікі наведалі музей Міцкевіча і ўбачылі месцы, звязаныя з яго імем. У праграме экскурсіі была яшчэ і Ліда. У Лідскім замку для валожынцаў арганізавалі гульню-квэст, якая завяршылася пачастункам з чаяпіццем.

    Теги: 
    • {Нет тегов}