Сталіцу здзівлі і ў іншых павучыліся

  • Яўгенія Цеслюкевіч, Зара над Нёманам №44 от 10 июня 2015 Скачать номер 10 июня 2015 14:30 Культура Беларуская

    З  дыпломам пераможцаў  і добрымі ўражаннямі вярнуліся  нядаўна з Мінска  з VII  рэспубліканскага   фестывалю­-кірмашу рамёстваў  “Веснавы букет”  майстры Мастоўскага цэнтра рамёстваў.

    ­­ — Велічны і прыгожы форум, які заняў  усю прастору сталічнага Лошыцкага парка,  сабраў   лепшых майстроў з усёй рэспублікі. Ад  Гродзенскай вобласці на фестывалі было прадстаўлена шэсць  падворкаў.Фестываль праводзіўся пад эгідай Міністэрства культуры Рэспублікі Беларусь, Мінскага  гарвыканкама і Беларускага саюза  мастроў народнай творчасці. Святочную атмасферу надалі мерапрыемству шматлікія  мастацкія калектывы, якія з’ехаліся ў Мінск  таксама з усёй Беларусі. Нам, майстрам, цікава было паглядзець на іншых, павучыцца ў  іх і сябе паказаць, на што здольны. Для мяне асабіста цікава было   пераняць для сябе штосьці  новае, тым больш, што многія майстры   ў час фестывалю праводзілі майстар­класы, — ­­ дзеліцца  ўражаннямі дырэктар  цэнтра рамёстваў Жанна  Лявонцьеўна Новік.

    У фестывалі  нашы  майстры  ўдзельнічаюць  другі раз.  На гэты раз раён і  вобласць  у сталіцы прадстаўлялі  і  ўражвалі ўдзельнікаў і гасцей фестывалю сваімі  работамі  і палётам фантазіі Жанна   Лявонцьеўна Новік, Марыя Іосіфаўна Севасцьяновіч, Міхаіл Мар’янавіч Маскевіч,  Кліменцій Канстанцінавіч Панок. Яны прадставілі на фестывалі  керамічныя вырабы, разьбу па дрэве, рукадзелле і саматканыя вырабы.

    Майстры па ткацтву  з Гудзевіч ­­ Людміла Міхайлаўна Станеўская, Кацярына Вітальеўна  Басінская разам  з вучнямі мясцовай школы  Ксеніяй Гаспаровіч, Веранікай Басінскай і Дзмітрыем  Солтанам ­­  прывезлі   з сабой  у сталіцу аж  двое кроснаў: адны  звычайныя, вялікія, на якіх  працуюць дарослыя ткачыхі, і маленькія ручныя.

    Гудзевіцкія майстры   для  ўсіх жадаючых правялі  майстар-­клас па ткацтву. Не было адбою ад жадаючых  проста пасядзець  за кроснамі і нават  сфатаграфавацца на памяць   разам з майстрамі,  пажадалі сфатаграфавацца  за  кроснамі і  госці з Англіі. А юных жыхароў сталіцы і іх бацькоў уразіў той факт, што ў Гудзевічах   умеюць ткаць  не  толькі дзяўчынкі, але  і  хлопцы.

    ­­ — Правядзенне такіх фестываляў дае магчымасць пазнаёміцца з узорамі народнага майстэрства з усіх куточкаў нашай Беларусі, навучыцца чамусьці новаму, падзяліцца сваімі напрацоўкамі. Вельмі патрэбна гэта дзецям і моладзі, тым, хто толькі пачынае асвойваць нейкае рамяство. Такія імпрэзы выклікаюць цікавасць да народных рамёстваў, сведчаць аб неабходнасці іх адраджэння і захавання. “Веснавы букет” – сапраўднае свята народных умельцаў, дзе можна і патрэбна абмяркоўваць работы народных майстроў, ацаніць дасягненні і вынікі, якія дае іх праца, ­­ — мяркуе дырэктар Гудзевіцкага літаратурна­краязнаўчага музея К. В. Басінская.

     М.М. Маскевіч правёў майстар­клас  разьбы па дрэве. Гэтым відам рамяства   цікавіліся не толькі   мужчыны, але і  дзяўчаты.

    На кірмашы можна было не толькі любавацца прыгожымі  вырабамі майстроў, але і купіць для сябе тое, што асабліва спадабалася.  Мінчане і госці сталіцы  ахвотна набывалі ў нашых майстроў  лялькі-­абярэгі. Каму такіх   абярэгаў не хапіла,  папрасілі майстроў  зрабіць іх на заказ.

                Я. ЦЕСЛЮКЕВІЧ

    Теги: