У Полацку ў мінулую пятніцу адбылося пасяджэнне Нацыянальнага арганізацыйнага камітэта па правядзенні Дня беларускага пісьменства і святкавання 500-годдзя беларускага кнігадрукавання, якое правёў яго старшыня, намеснік Прэм’ер-міністра Рэспублікі Беларусь Васіль Жарко.
У рабоце аргкамітэта прынялі ўдзел міністры інфармацыі і культуры Лілія Ананіч і Барыс Святлоў, намеснік старшыні Віцебскага аблвыканкама Уладзімір Пенін, старшыня Полацкага райвыканкама Мікалай Шаўчук, кіраўнікі ведамстваў і службаў — жыллёва-камунальнай гаспадаркі, гандлю, сувязі, транспарту, аховы здароўя, надзвычайных сітуацый, праваахоўных органаў, санітарнага нагляду і іншых.
Па-першае, былі падведзены вынікі зробленага. Старшыня Полацкага райвыканкама Мікалай Шаўчук праінфармаваў прысутных аб выкананых работах па падрыхтоўцы да святочных мерапрыемстваў. Прыведзеныя лічбы ўражваюць: адрамантавана 348 аб’ектаў, на гэтыя мэты з розных крыніц фінансавання выдаткавана 12,4 млн рублёў. М.М.Шаўчук падкрэсліў, што работы было шмат, выкананне задач патрабавала значных намаганняў, але зробленае стане цудоўным падарункам гораду-юбіляру і ўсім яго жыхарам. «У цэлым Полацк да правядзення мерапрыемстваў Дня беларускага пісьменства гатовы», — падвёў ён вынік сказанаму.
Лілія Ананіч адзначыла, што падрыхтоўка ўвайшла ў фінальную стадыю, усе рашэнні Рэспубліканскага аргкамітэта выкананы. Яна паведаміла, што ў мерапрыемствах свята плануюць прыняць удзел прадстаўнікі Азербайджана, Германіі, Казахстана, Латвіі, Літвы, Малдовы, Польшчы, Расіі, Сербіі, Узбекістана, Украіны, Францыі і іншых краін. Гасцямі свята стануць таксама прадстаўнікі дыпламатычных місій шэрагу дзяржаў. Асвятляць падзеі свята будуць больш за 100 прадстаўнікоў беларускіх і замежных сродкаў масавай інфармацыі. У Полацку пройдзе фінал конкурсу чытальнікаў «Жывая класіка», юныя прыхільнікі роднага слова з’едуцца ў Полацк з усіх куткоў Беларусі. Міністэрствам інфармацыі падрыхтаваны друкаваныя выданні — «Сафійка. Полацк. Родны край» і «Полацк», якія можна будзе набыць у святочныя дні і якія стануць выдатным падарункам для аматараў кнігі.
Падчас правядзення свята адбудзецца шмат разнастайных мерапрыемстваў, у іх ліку фестываль кнігі і прэсы, на якім будуць прадстаўлены лепшыя друкаваныя выданні, ля Музея беларускага кнігадрукавання будзе ўстаноўлены друкарскі станок скарынаўскіх часоў, і кожны жадаючы зможа паспытаць сябе ў ролі першадрукара.
Дарэчы, Лілія Станіславаўна паведаміла, што па благаславенні Мітрапаліта Мінскага і Заслаўскага, Патрыяршага Экзарха ўсея Беларусі Паўла, пачатак свята абвесцяць званы ўсіх храмаў.У культурнай праграме будуць задзейнічаны лепшыя выканаўцы і творчыя калектывы Беларусі.
Цырымонія перадачы эстафеты свята гораду Іванава Брэсцкай вобласці адбудзецца 3 верасня. У гэты ж дзень пераможцам творчага конкурсу, паэтам і пісьменнікам, будуць уручаны літаратурныя прэміі.
«Лічу, што такое свята — гонар нашай краіны», — падвяла вынік сказанаму Л.С.Ананіч.
Міністр культуры Барыс Святлоў адзначыў, што міністэрства рыхтуе выставачную праграму, у падрыхтоўцы якой удзельнічаюць вядучыя беларускія музеі. Падчас свята будзе дэманстравацца дакументальны фільм «Першадрук».
У ходзе пасяджэння былі абмеркаваны пытанні па выкананні дадзеных раней даручэнняў, гутарка ішла таксама пра ступень гатоўнасці ўсіх аб’ектаў да свята. У прыватнасці, намеснік міністра антыманапольнага рэгулявання і гандлю Ірына Наркевіч адзначыла, што для палачан і гасцей свята будуць разгорнуты святочна аформленыя гандлёвыя рады, аб’яднаныя назвай «Віцебскія панадворкі». Грамадскае харчаванне прадаставіць 2000 вынасных і 1600 стацыянарных пасадачных месцаў, так што свята абяцае быць шчодрым і хлебасольным.
Падводзячы вынікі работы аргкамітэта, Васіль Жарко адзначыў: «Да правядзення свята Полацк гатовы, па дарозе сюды мы бачылі, што многае зроблена. Засталося ліквідаваць дробныя недаробкі. Будзе шмат гасцей, і мы павінны паказаць ім нашу гасціннасць, нашу прыгажосць, нашу любую Беларусь».
Удзельнікі пасяджэння прайшліся па вуліцах горада, наведалі месцы, дзе будуць праходзіць галоўныя святочныя падзеі, адзначыўшы, што Полацк да прыёму гасцей падрыхтаваўся годна. Да свята засталіся лічаныя дні, і зусім хутка старажытны горад-юбіляр стане сталіцай свята дзяржаўнасці, духоўнасці і пісьменства.
Комментарии (0)