Намеснік Прэм’ер-міністра Наталля Іванаўна Качанава пасля знаёмства з горадам і агляду сацыяльна-культурных аб’ектаў – раённага Дома культуры, палаца Друцкіх-Любецкіх, кінатэатра “Беларусь”, гімназіі, якія будуць задзейнічаны ў падрыхтоўцы да свята, пахвальна адазвалася і аб Шчучыне, і аб выбары асноўнай пляцоўкі – ля РДК, дзе пройдзе галоўнае дзейства шчучынскага фэсту.– Горад Шчучын пакінуў у мяне добрыя ўражанні, – адзначыла намеснік Прэм’ер-міністра. – Канешне, патрабуецца яшчэ час і неабходна выканаць пэўныя рамонтныя работы. Я бачу, што кіраўніцтва раёна ведае гэтыя задачы, намеціла планы, ёсць праектна-каштарысная дакументацыя, згодна з якой яны будуць праводзіцца. І самае важнае – мы вызначылі месца, дзе будзе ўстаноўлена галоўная сцэнічная пляцоўка. На мой погляд, цудоўнае месца ў горадзе. І, вядома, чакае вялікая работа для таго, каб, як заўсёды, Дзень беларускага пісьменства быў праведзены на дастаткова высокім узроўні.Пэўны падрыхтоўчы этап на шляху да свята ўжо пройдзены. Як адзначалася, пасяджэнне Нацыянальнага аргкамітэта стане адпраўной кропкай для новай фазы вялікай працы, якая ахоплівае ўсе сферы жыцця. Падчас сур’ёзнай і зацікаўленай размовы была абмеркавана агульная канцэпцыя правядзення 22-га Дня пісьменства ў Шчучыне, абазначаны асноўныя моманты вялікай і насычанай праграмы, дзе галоўнымі героямі будуць Слова і творчыя людзі, ацэнены фінансавыя магчымасці, узяты да ўвагі прапановы. Дзень беларускага пісьменства – гэта вялікае дзяржаўнае свята, якое штогод становіцца знакавай падзеяй у культурным жыцці нашай краіны, падкрэсліла Міністр інфармацыі Л.С. Ананіч. Шчучын таксама збярэ шмат гасцей – дзяржаўных асоб, дыпламатаў, навукоўцаў і творчую інтэлігенцыю, пісьменнікаў, выдаўцоў і паліграфістаў, музыкантаў, людзей, якія любяць беларускае слова і культуру, цэняць сваю краіну. Сярод мноства творчых задум – не толькі традыцыйныя мерапрыемствы.– Свята павінна быць насычана багатай гісторыяй шчучынскага краю, Гродзеншчыны для таго, каб паказаць духоўныя вытокі народа і дзяржавы. Гэта важна ў кантэксце Года моладзі, які праходзіць у краіне сёлета, і юбілейнай даты – 70-годдзя Вялікай Перамогі. Гэтыя тэмы таксама будуць дамінантамі на свяце, – адзначыла міністр.
У аснове канцэпцыі свята – ідэя прапаганды дасягненняў айчыннай пісьменнай культуры, роднай мовы, літаратуры, пераемнасці духоўных традыцый беларускага народа і паказ непарыўнага адзінства беларускага пісьменнага слова са словам славянскім. Ужо цяпер ва ўстановах культуры і адукацыі нашай вобласці і краіны праходзяць цікавыя мерапрыемствы культурнай накіраванасці – конкурсы, літаратурныя сустрэчы, выставы, прэзентацыі, акцыя “Чытаем беларускую кнігу разам з дзецьмі”… Што да Шчучына, то ў хуткім часе тут мяркуецца правесці конкурс рукапісаў імя Цёткі, пленэр скульптараў і г.д. Напярэдадні свята ў нашым райцэнтры завершыць свой шлях рэспубліканская навукова-асветніцкая экспедыцыя “Дарога да святыняў”, а 6 верасня на плошчы Свабоды пройдзе фестываль кнігі і прэсы. Цэнтральнай дамінантай выставачнай экспазіцыі стануць літаратура, кнігі, перыёдыка, выдадзеныя ў гады Вялікай Айчыннай вайны. Плануецца паказаць і гістарычны плакат тых часоў, арганізаваць выставу патрыятычнага плаката. Будуць вызначаны пераможцы абласнога конкурсу юных чытальнікаў “Жывая класіка”. Беларускіх і замежных пісьменнікаў сабярэ міжнародны круглы стол “Сугучча”. “Слова пісьменніка павінна гучаць з усіх святочных пляцовак”, – падкрэсліла Лілія Станіславаўна. З цікавымі прапановамі выступіў на пасяджэнні старшыня Саюза пісьменнікаў Беларусі М.І. Чаргінец. Да прыкладу, урачыста ўручыць гораду звыш 100 кніг беларускіх пісьменнікаў, арганізаваць сустрэчу шчучынцаў са знакамітымі пісьменнікамі і артыстамі, назваць адну з вуліц горада Літаратурнай. А першы намеснік міністра культуры І.У. Дрыга пераканана, што фестываль пісьменства ў Шчучыне надзвычай упрыгожыць цырымонія ўручэння нацыянальнай літаратурнай прэміі. Дарэчы, на падрыхтоўку горада да свята і правядзенне самога мерапрыемства мяркуецца выдаткаваць у межах 80 мільярдаў рублёў. Сродкі будуць накіраваны, у прыватнасці, на завяршэнне рэканструкцыі ўнікальнага і знакавага, па словах намесніка Прэм’ер-міністра, палаца Друцкіх-Любецкіх, у якім размесціцца Цэнтр творчасці дзяцей і моладзі, а таксама раённы музей. Добрым падарункам гораду стане адкрыццё кніжнага магазіна. Кінатэатр “Беларусь” ператворыцца ў сучасны маладзёжны цэнтр з танцполам, шыкоўнай кіназалай, дзіцячым і дарослым кафэ, більярднай і г.д. У выніку рамонту і абнаўлення раённай бібліятэкі, іншых будынкаў, добраўпарадкавання зменіцца знешні выгляд гарадскіх вуліц. “Прымаць такое свята – не толькі вялікі гонар, але і вялікая адказнасць”, – адзначыў старшыня райвыканкама С.В. Ложэчнік. Па словах кіраўніка, работа чакаецца калектыўная, з удзелам многіх міністэрстваў, устаноў і арганізацый. Мяркуецца падысці да абнаўлення гарадскіх аб’ёктаў з пункту гледжання гаспадара, каб кожны рубель быў укладзены максімальна эфектыўна. Сілы для правядзення неабходных работ у раёне ёсць: гэта дзве МПМК. А галоўнае, што ўсё, зробленае да свята, застанецца гораду і яго жыхарам.Што ж, традыцыйнае і любімае жыхарамі Беларусі свята беларускага слова ўжо шырока крочыць па краіне. А 6 верасня яно толькі ненадоўга прыпыніцца ў нашым Шчучыне, каб падсумаваць вялікую працу па папулярызацыі дасягненняў айчыннай культуры, багацця і пераемнасці духоўных і культурных традыцый, і пойдзе далей. Мяркуецца, што ад Шчучына эстафету на яго правядзенне ў 2016-ым прыме адзін з гарадоў Гомельшчыны.
Комментарии (0)