На ўрачыстасць сабраліся жыхары горада, сярод якіх было шмат моладзі і школьнікаў, а таксама ганаровыя госці. Са святам пісьменства і з адкрыццём бібліятэкі цёпла павіншавала шчучынцаў міністр інфармацыі Л. С. Ананіч. Лілія Станіславаўна падкрэсліла: нягледзячы на тое, што ў наша жыццё ўвайшлі камп’ютарныя тэхналогіі, кніга па-ранейшаму застаецца самай надзейнай крыніцай інфармацыі. Вельмі добра, што ў Шчучыне на днях адкрылася кніжная крама “Несцерка”, а цяпер наведвальнікаў запрашае абноўленая бібліятэка. Значыць, мы і наша моладзь, школьнікі будуць звяртацца да духоўных крыніц, да вытокаў нашай культурнай спадчыны. Л.С. Ананіч агучыла добрую навіну для работнікаў бібліятэк і чытачоў: у дар раённай бібліятэцы міністэрства інфармацыі перадала 3 тысячы новых кніг беларускіх пісьменнікаў.
Дарэчы, бібліятэка атрымала многа падарункаў. Гендырэктар ЗАТ “БелКП-Прэс”, рэдактар газеты “Камсамольская праўда” ў Беларусі” Г.В. Малішэўская перадала ад выдавецтва 50 тамоў з калекцыі кніг “Музеі свету”.
З адметнай культурнай падзеяй у жыцці горада прысутных павіншаваў намеснік старшыні Гродзенскага аблвыканкама, дэпутат Палаты прадстаўнікоў Нацыянальнага сходу Рэспублікі Беларусь Віктар Андрэевіч Лісковіч. “Для раённай бібліятэкі вялікі гонар насіць імя выдатнай дачкі шчучынскай зямлі – Цёткі (Алаізы Пашкевіч), якая стаяла ля вытокаў адраджэння беларускага літаратурнага слова”, – зазначыў прамоўца. Віктар Андрэевіч выказаў упэўненасць, што Шчучынская раённая бібліятэка і надалей будзе захавальніцай нацыянальнай літаратурнай спадчыны, культурных традыцый Прынёманскага краю. Ад імя Гродзенскага аблвыканкама госць перадаў бібліятэцы падарунак – шматфункцыянальную аргтэхніку.
Віншаванні з Днём беларускага пісьменства і з адкрыццём абноўленай бібліятэкі накіраваў шчучынцам міністр культуры Б.У. Святлоў. Прывітальны адрас зачытала начальнік упраўлення ўстаноў культуры і народнай творчасці Міністэрства культуры Н.І. Задзяркоўская.
Цёпла павіншаваў шчучынцаў і старшыня райвыканкама С.В. Ложэчнік. Ён падкрэсліў, што вялікі гонар быць нашчадкамі Цёткі. Сяргей Васільевіч падзякаваў праекціроўшчыкам, будаўнікам і іншым спецыялістам, якія надалі новае жыццё будынку бібліятэкі і пры гэтым захавалі адметны каларыт даўняй пабудовы. Кіраўнік раёна выказаў надзею, што цэнтральная бібліятэка стане месцам для сяброўскіх і творчых сустрэч жыхароў горада.
Удзячнае слова за захаванне кніжнай скарбніцы, за павагу да беларускага літаратурнага слова выказаў шчучынцам старшыня Саюза пісьменнікаў Беларусі М.І. Чаргінец. Ён адзначыў, што абласныя аддзяленні Саюза пісьменнікаў таксама сабралі кнігі ў дар Шчучынскай бібліятэцы.
З 1976 года Шчучынская бібліятэка носіць імя Цёткі (Алаізы Пашкевіч). Цяпер кожны прахожы будзе гэта ведаць, бо будынак упрыгожвае мемарыяльная дошка з барэльефам паэткі. Права адкрыць дошку было дадзена яе аўтару, гродзенскаму скульптару С.А. Більдзюку і ганаровым гасцям свята. Еднасць прысутных з зямлячкай перадала песня “Вёсачка мая, чараўніца” (на словы Цёткі), якая прагучала ў выкананні народнага ансамбля “Медуніцы” Шчучынскага РДК. Трэба падкрэсліць, што работнікі раённага Дома культуры ператварылі гэту падзею ў прыгожае свята, якое надоўга запомніцца і жыхарам горада, і гасцям.
І вось урачысты момант: перарэзана чырвоная стужка – бібліятэка адкрыта. Госці і шчучынскія аматары кніг з задавальненнем адправіліся на экскурсію ў абноўленую ўстанову. На двух паверхах размясціліся абанементная і чытальная залы, цэнтр прававой інфармацыі, асноўныя фонды, канферэнц-зала і іншыя памяшканні. Усе прасторныя, утульныя, з сучасным абсталяваннем. У капітальны рамонт будынка ўкладзена 4 млрд. рублёў. Кніжны фонд складае амаль сорак тысяч друкаваных выданняў. Наведвальнікі, дарэчы, падоўгу затрымліваліся ля выставачнага праекта, прысвечанага 70-годдзю Вялікай Перамогі і творчасці Янкі Купалы ў ваенныя гады. Цэнтральная раённая бібліятэка імя Цёткі па праве стане не толькі інфармацыйным цэнтрам, але і захавальніцай нацыянальнай літаратурнай спадчыны.
***Пасля ўрачыстасці ў канферэнц-зале адбыўся міжнародны круглы стол “Сугучча: літаратурны працэс і інфармацыйнае грамадства”, у якім прынялі ўдзел не толькі беларускія пісьменнікі і выдаўцы, але майстры слова з Расіі, Літвы, Казахстана, Чарнагорыі і іншых краін. Творчых людзей віталі міністр інфармацыі Л.С. Ананіч, намеснік старшыні Гродзенскага аблвыканкама В.А. Лісковіч, старшыня Саюза пісьменнікаў Беларусі М.І Чаргінец, старшыня Шчучынскага райвыканкама С.В. Ложэчнік. Круглы стол стаў для Дня беларускага пісьменства традыцыйным. Сёлета ён праходзіў у дзявяты раз. У фармаце адкрытага дыялогу ўдзельнікі абмеркавалі праблемы і перспектывы развіцця нацыянальных культур, аспекты мастацкага перакладу, выхаваўчае значэнне літаратуры аб вайне, ролю кнігі ў маральным выхаванні падрастаючага пакалення.
Комментарии (0)