04 Декабря, 2022 Воскресенье

Свята беларускага пісьменства ў 2016 годзе адбудзецца ў Рагачове!

  • 10 сентября 2015 Культура Беларуская 0

    Дзень беларускага пісьменства – надзвычай важная падзея ў жыцці нашай краіны. Гэта свята аб’ядноўвае тых, хто з вялікай павагай ставіцца да роднага слова, духоўных здабыткаў нашага народа, нацыянальнай культуры, асветы і літаратуры. Яно распачало свой шлях у далёкім 1994 годзе са старажытнага Полацка і прайшло праз усю Беларусь.

    Сёлета свята адбылося на Гродзеншчыне, у прыгожым горадзе Шчучын. Прайшло на высокім узроўні. Пры завяршэнні ўрачыстасцей ХХII Дня беларускага пісьменства эстафета была перададзена Рагачову.

    Дэлегацыю Рагачоўскага раёна ўзначальвала старшыня раённага Савета дэпутатаў Валянціна Ганковіч. У прысутнасці Міністра інфармацыі Рэспублікі Беларусь Ліліі Ананіч спецыяльны вымпел “Рагачоў 2016” Валянціна Нікіфараўна атрымала з рук старшыні Шчучынскага раённага выканаўчага камітэта Сяргея Ложэчніка.

    — Мы ўсе былі вельмі ўсхваляваныя, — гаворыць Валянціна Нікіфараўна. – Гэта ж упершыню наш родны Рагачоў прыняў прэстыжную эстафету рэспубліканскага літаратурнага фестывалю! Вялікі гонар і агромністая адказнасць! Наш горад і раён маюць надзвычай багатую гістарычную і культурную спадчыну, якой можна ганарыцца,  тут жывуць і працуюць цудоўныя людзі, і я ўпэўнена, што мы добра падрыхтуемся і годна сустрэнем удзельнікаў і гасцей  чарговага,  ХХIII Дня беларускага пісьменства ў верасні 2016 года. Давайце ж усе разам дружна працаваць, каб праславіць свой родны край!

    Міхась КАВАЛЁЎ.

    Фота Раісы БАРАВОЙ.

    Автор: Міхась КАВАЛЁЎСвабоднае слова

Комментарии (0)