Гасцей прывіталі намеснік старшыні райвыканкама Г.С. Хвядзюк і начальнік аддзела арганізацыйна-кадравай работы А.І. Куканава. Пра дасягненні ў сферы культуры, народнай творчасці, пра майстроў, якія захоўваюць традыцыі продкаў, расказала намеснік начальніка аддзела ідэалагічнай работы, культуры і па справах моладзі Т.В. Ганчарук. А яе калега А.Г. Амшэй пазнаёміў гасцей з сапраўднымі “жамчужынамі” нашага краю.
Не менш цікавым было і відэазнаёмства са Шчучыншчынай, якое стала магчымым дзякуючы знятаму фільму. Наведваючы цэнтральную раённую бібліятэку імя Цёткі, слухачы курсаў нечакана трапілі на імпрэзу, прысвечаную жыццю і творчасці Сяргея Ясеніна. І цікавае мерапрыемства, і адноўленая бібліятэка былі высока ацэнены.
Па добрай традыцыі хлебам і соллю віталі гасцей дырэктар раённага цэнтра культуры і народнай творчасці С.П. Жвірбля з камандай спецыялістаў. Зарад бадзёрасці і добрага настрою падараваў усім народны ансамбль народнай песні “Медуніцы”. Дзіву даваліся госці падчас экскурсіі па адноўленым палацы Друцкіх-Любецкіх, якую правяла метадыст ЦТДіМ Т.С. Трахімчык.
Кранаючым і цёплым быў візіт “курсантаў” у музей Чэслава Немэна, што ў Старых Васілішках. У доме нашага знакамітага земляка зноў зайграў патэфон і ажыло фартэпіяна. І не дзіва, калі ў гасцях – людзі творчай прафесіі. На развітанне загадчык клуба-музея У.У. Сянюта пачаставаў усіх духмянымі яблыкамі з саду Выджыцкіх. Сваім вопытам работы з задавальненнем падзялілася загадчыца Васілішкаўскага цэнтра культуры і вольнага часу А.В. Лысеня і яе калегі.
Цікавіліся госці, як наладжана тут супрацоўніцтва з кіраўніцтвам мясцовай гаспадаркі. Пра спонсарскую падтрымку Алена Вацлаваўна гаварыла ўпэўнена. ААТ “Васілішкі”, на тэрыторыі якога знаходзіцца цэнтр культуры і вольнага часу, адно з самых моцных на Шчучыншчыне аграпрадпрыемстваў, дзе не толькі высокія вытворчыя паказчыкі, але і салідны сацыяльны пакет, ёсць разуменне, што ні хлебам адзіным жыве чалавек.
– Нашы праекты заўсёды падтрымліваюцца дырэкцыяй ААТ “Васілішкі”, – гаворыць А.В. Лысеня. – Строі для вакальнага калектыву, музычныя інструменты, разнастайная літаратура для бібліятэкі – усё гэта спонсарская дапамога.
Здзівіліся госці і таму, што тут, у арагарадку, праходзяць дыскатэкі і канцэрты з удзелам зорак беларускай эстрады і вядомых гродзенскіх дыджэяў. Сюды з’язджаецца моладзь не толькі са Шчучынскага, але і з суседніх раёнаў, таму, зразумела, з выкананнем плана платных паслуг ва ўстанове культуры праблем няма. Цудоўным падарункам для ўсіх стаў канцэрт, які падрыхтаваў ансамбль беларускай песні “Світанак”.
Падводзячы вынікі выязных практычных заняткаў, курсанты адзначылі, што Шчучыншчына багата на таленавітых людзей, а работа ўстаноў культуры заслугоўвае самай высокай адзнакі. Абмяркоўваліся падчас сустрэчы і іншныя пытанні – такія, як праблема кадраў, шляхі выканання платных паслуг, магчымасць інвестыцый у культуру, новыя формы працы з моладдзю, правядзенне масавых мерапрыемстваў і іншае.
– Візіт на Шчучыншыну стаў для нас сапраўдным падарункам, – прызналася адна са слухачоў курсаў павышэння кваліфікацыі, намеснік дырэктара Гродзенскага раённага культурна-інфармацыйнага цэнтра Наталля Кашчэй. – Асноўная задача работнікаў культуры – дарыць людзям святы. Мы парадаваліся за нашых калег, за тое, што яны захоўваюць беларускую песню, умеюць творча арганізаваць працу і ўсім сэрцам любяць сваю прафесію.
Комментарии (0)