Сустрэча з прадстаўнікамі творчай супольнасці, дзелавых колаў і грамадскасці Паднябеснай, якая прайшла ў абласным выканаўчым камітэце напрыканцы мінулага тыдня, завяршылася абменам падарункамі. Намеснік кіраўніка рэгіёна Леанід Цупрык з удзячнасцю прыняў творы кітайскіх мастакоў-каліграфаў, якія ўзбагацяць фонды Мастацкага музея Брэста. У сваю чаргу кітайскім гасцям уручылі саламяную шкатулку з лялькамі ў нацыянальных касцюмах і маляўнічыя буклеты пра Брэстчыну. На думку Леаніда Цупрыка, гэтыя падарункі паспрыяюць таму, каб нашы народы больш даведаліся аб культуры адзін аднаго.
– Мы вырашылі пачаць з Брэстчыны, а ў далейшым плануем падарыць карціны ўсім абласцям Беларусі, – запэўніў у зацікаўленасці падтрымліваць культурныя сувязі кіраўнік дэлегацыі, прадстаўнік Беларускай канфедэрацыі творчых саюзаў у Кітаі, вядомы грамадскі дзеяч і мастацтвазнаўца Лю Гуанцын.
Перадаючы 10 палотнаў, выкананых тушшу і вадзянымі фарбамі ў традыцыйным кітайскім стылі, ён пракаменціраваў кожную карціну. Так, на адной з іх “зашыфраваны” вобраз сямейнага дабрабыту – дзве птушкі на адной галінцы. У наступным скрутку – іерогліфы адкрываюць сакрэт, як атрымаць ад жыцця максімум задавальнення: паводле кітайцаў, найбольшую радасць прыносяць чалавеку… веды.
Натхняюць на стварэнне такіх паэтычных карцін кітайскіх творцаў і брэсцкія краявіды. Вядомы мастак, выкладчык Акадэміі мастацтваў Кітая Чэнь Моу падзяліўся з журналістамі сваімі планамі: вярнуўшыся на радзіму, ён збіраецца свае фотанататкі ад наведвання Берасцейшчыны рэалізаваць у карцінах, а ў наступным годзе завітаць у горад над Бугам з персанальнай выставай і майстар-класамі.
“Я з дзяцінства ведаў, што ёсць такі горад-герой Брэст. І сёння падчас экскурсіі па Брэсцкай крэпасці быў па-сапраўднаму ўсхваляваны і крануты ўбачаным. Дзеля ўсталявання міру беларускі народ і Брэст панеслі вельмі вялікія ахвяры,” – сказаў мастак.
Акрамя Брэста, члены дэлегацыі наведалі Мінск і Маладзечна, а ў Белаазёрску патэнцыйныя кітайскія інвестары, якія ўваходзілі ў склад групы, пазнаёміліся з фабрыкай па вытворчасці абутку. У сувязі з гэтым Лю Гуанцын заўважыў, што падобныя культурныя акцыі стымулююць у тым ліку і ўвагу турыстаў да краіны і вобласці: “Упэўнены, што цікавасць грамадзян Кітая да рэгіёна ўзрасце, калі ў музеі Брэста з’явіцца кітайскі жывапіс. Яны будуць рады наведаць новыя мясціны і ўбачыць тут сярод іншых мастацкіх твораў і сваіх мастакоў”.
А нагод для будучых сустрэч дастаткова: з кожным годам сувязі паміж нашымі краінамі мацнеюць – як культурныя, так і эканамічныя.
Комментарии (0)