У мінулую пятніцу ў межах сумеснай акцыі Міністэрства культуры Рэспублікі Беларусь і Пасольства Кітайскай Народнай Рэспублікі ў Рэспубліцы Беларусь у аг.Жылічы Кіраўскага раёна наведаліся Надзвычайны і Паўнамоцны Пасол Кітайскай Народнай Рэспублікі ў Рэспубліцы Беларусь Цуй Цымін, яго саветнік па культуры Чжан Хунвэй і сакратар Хэ Цывей, міністр культуры Рэспублікі Беларусь Барыс Святлоў, намеснік старшыні Магілёўскага аблвыканкама Валерый Малашка, сакратар Бабруйскага епархіяльнага ўпраўлення пратаіерэй Сергій Каровінскі. Суправаджаў ганаровых гасцей старшыня Кіраўскага райвыканкама Аляксандр Бутараў.
Спачатку госці прайшліся па памяшканнях Жыліцкага палацава-паркавага ансамбля, які з’яўляецца помнікам архітэктуры ХVІІІ–ХІХ стагоддзяў, дзе працягваюцца работы па рэстаўрацыі, з цікавасцю слухалі расказ дырэктара гістарычнага комплексу-музея Ларысы Забелавай аб узнікненні ў 30-я гады ХІХ ст. палаца і яго насельніках. Удзельнікі сустрэчы змаглі акунуцца ў старажытныя часіны, а таксама ацаніць маштабнасць сённяшніх работ па аднаўленні культурнай спадчыны.
Затым прысутныя ўважліва разглядалі экспазіцыі, размешчаныя ў адрэстаўрыраваных памяшканнях палаца. Гасцей вельмі зацікавілі многія экспанаты далёкай мінуўшчыны, яны задавалі пытанні наконт таго ці іншага прадмета. Дарэчы, Цуй Цымін нядрэнна размаўляе на рускай мове, а тое, што яму падабаецца наша краіна, беларускі народ, ад душы выказаў на беларускай мове.
Ганаровыя госці здзівіліся, калі ўбачылі на стэн-дзе мноства фотакартак маладажонаў, зробленых у бягучым годзе. Гэта сведчыць аб тым, што палацава-паркавы ансамбль карыстаецца попытам у маладых пар, якія, пабываўшы тут у дзень заключэння шлюбу, упэўнены, што іх сямейны саюз у далейшым будзе такім жа моцным, як і сцены панскага маёнтка, якія не паддаюцца ніякім выпрабаванням.
Шчыра віталі гасцей у мясцовай дзіцячай школе мастацтваў. Яе дырэктар Вольга Сімановіч зрабіла аглядную экскурсію па ўстанове адукацыі, якая размясцілася ў палацы пасля ўвядзення ў эксплуатацыю першай чаргі рэстаўрацыі. Удзельнікі сустрэчы пабывалі ў класе мастацкага аддзялення, дзе ішлі заняткі і рабяты займаліся любімай справай.
Для далейшага развіцця творчых здольнасцяў юных жылічан Надзвычайны і Паўнамоцны Пасол Кітайскай Народнай Рэспублікі перадаў дырэктару навучальнай установы сертыфікат на 20 мальбертаў.
Цуй Цымін падкрэсліў, што сустрэча праходзіць у межах развіцця сяброўскіх сувязяў паміж дзвюма дзяржавамі, падзяліўся станоўчымі эмоцыямі ад убачанага. Ён адзначыў, што вельмі задаволены тым, як беларусы беражліва ставяцца да захавання старадаўняй культурнай спадчыны.
Ганаровы госць з задавальненнем адзначыў той факт, што адрэстаўрыраваныя памяшканні, якія з’яўляюцца сведкамі многіх важных гістарычных падзей, адда-дзены для развіцця творчых здольнасцяў хлопчыкаў і дзяўчынак. Гэта сведчыць аб тым, што ў Беларусі значная ўвага надаецца дзецям – будучыні кожнай краіны, падкрэсліў Цуй Цымін.
Затым для ўдзельнікаў сустрэчы быў дадзены канцэрт, на якім выступалі Тэона Бябурыя, Мацвей Пашкоўскі, Валерыя Філіпец, Уладзіслаў Нявінскі, Ангеліна Рэва, Ганна Мурашка. А калі Міхаіл Забелаў і Раман Каплуноў на баянах зайгралі «Кацюшу», усе без выключэння падпявалі.
На памяць аб наведванні Жыліцкага палацава-паркавага ансамбля рабяты ўручылі ганаровым гасцям сувеніры, зробленыя ўласнымі рукамі.
Комментарии (0)