У Лядовым палацы сёлета сустрэлі Новы год па-спартыўнаму: замест традыцыйных ранішнікаў тут падрыхтавалі навагоднюю казку для дзяцей і дарослых на лёдзе.
У аснову прадстаўлення «Снегавік-паштавік» лёг аднайменны навагодні мультфільм. А галоўныя ролі выкананалі, канешне, спартсмены, якія займаюцца ў ДЮСШ №2. Касцюмы Снегавіка і Дзеда Мароза, напрыклад, апранулі хакеісты Ілья Засім і Канстанцін Салдакаеў. А вось Марыя Салдакаева — кандыдат у майстры спорту па фігурным катанні — не проста выканала ролю Сняжынкі, але і прадставіла некалькі сольных нумароў.
Акрамя таго, удзельнікамі прадстаўлення сталі юныя мадэльеры з народнай студыі моды «Папараць-кветка», а таксама Наталля Трус, Валя Іванцова, Карына Заніна і Насця Пасько — салісты эстраднай студыі «Меладзін». Усяго ў навагодняй казцы ўдзельнічалі каля шасці дзясяткаў хлопчыкаў і дзяўчынак, якія атрымалі ў канцы праграмы салодкія падарункі.
Гледачы — вучні сельскіх і гарадскіх школ — не шкадавалі апладысментаў артыстам. Тым больш, што іх таксама задзейнічалі ў праграме. Пад уражаннем засталася і шматлікая дарослая аўдыторыя — прадстаўнікі мясцовай улады, у тым ліку старшыня райвыканкама М.М.Крэйдзіч, работнікі ААТ «ААБ Беларусбанк», ААТ «Пружанскі малочны камбінат»...
***
Варта адзначыць, што на навагодняе прадстаўленне, хаця яно і праходзіла ў два сеансы і сабрала каля тысячы гледачоў, многія так і не змаглі трапіць. Не варта смуткаваць: тыя, каму не дастаўся білет,
маюць магчымасць наведаць Лядовы палац сёння— 13 студзеня ў 18.00 гадзін прадстаўленне будзе паказана паўторна.
Кошт дзіцячага білета 20000 руб., дарослага — 35000 руб.
Комментарии (0)