Прафесійныя мастакі, члены Беларускага саюза мастакоў, выкладчыкі Рыгор Фядосавіч і Марыя Яўгенаўна Таболічы прывезлі ў Слуцк выстаўку жывапісу. Больш за 40 карцін вельмі гарманічна ўпісаліся ў інтэр’ер галерэі.
Рыгор Фядосавіч і Марыя Яўгенаўна скончылі Беларускі тэатральна-мастацкі інстытут (цяпер Беларуская дзяржаўная акадэмія мастацтваў), падчас вучобы стварылі сям’ю. Іх дзеці таксама звязалі жыццё з мастацтвам, хоць і ведаюць, якая гэта цяжкая карпатлівая праца:
Алесь – дызайнер, Наталля – майстар дэкаратыўна-прыкладнога мастацтва, сын Наталлі малюе плакаты, коміксы. Рыгор Фядосавіч нарадзіўся ў вёсцы пад Мікашэвічамі, таму Случ і Случчына вельмі блізкія яму.
Выстаўкі Таболічаў праходзілі ў многіх гарадах Беларусі і за мяжой, карціны знаходзяцца ў Нацыянальным мастацкім музеі, у музеі Магілёва. У экспазіцыі галерэі мастацтваў імя У.С. Садзіна – партрэты, пейзажы, нацюрморты, сюжэтныя карціны Таболічаў, рэалістычныя эцюды, абстрактныя і авангардысцкія работы.
– Мы прадставілі рознапланавыя карціны, па якіх можна прасачыць нашу творчасць, – гаварыў падчас адкрыцця выстаўкі Рыгор Фядосавіч. – Работы розныя. Час мяняецца і мы мяняемся, па-іншаму глядзім і асэнсоўваем падзеі. Гэта, канечне ж, адлюстроўваецца ў творчасці. Я не магу 20 гадоў пісаць аднолькава. Мастак рэагуе на тое, што адбываеца вакол, ён увесь час у пошуку.
Рыгор Фядосавіч лічыць важным для творцы не губляць сувязь з рэаліямі, бычыць сітуацыю. Любоў да Радзімы для яго – важнае складаемае натхнення.
– Ён сапраўдны фанат Радзімы, родных мясцін, – расказвала пра мужа Марыя Яўгенаўна. – Любіць экспедыцыі і вандроўкі, цікавіцца гісторыяй. Ігэта нельга не заўважыць у работах Рыгора Таболіча.
Таболічы працуюць у мінскай гімназіі імя Масленікава, вучаць школьнікаў пейзажнаму жывапісу. Яны катэгарычныя ў тым, што юныя мастакі павінны пісаць самі, без дапамогі настаўніка.
– Мы можам падказаць, накіраваць, але ні ў якім разе не дамалёўваць, у першую чаргу, неабходна ўбачыць і падтрымаць індывідуальнасць, – падкрэслівае Марыя Яўгенаўна.
Дарэчы, у Нацыянальным мастацкім музеі пройдзе ўжо другая выстаўка работ навучэнцаў Рыгора Фядосавіча і Марыі Яўгенаўны. Магчыма, і случчане змогуць ацаніць іх майстэрства.
А каб пазнаёміцца з разнастайнай творчасцю Рыгора і Марыі Таболічаў, наведайце нашу галерэю мастацтваў. Упэўнена, не пашкадуеце.
Комментарии (0)