Слонімская раенная бібліятэка імя Якуба Коласа падтрымала абласную акцыю “Чытаем разам”.
8 верасня на плошчы Леніна ўдзельнікі мерапрыемства чыталі ўслых творы вялікіх беларускіх аўтараў ─ Янкі Купалы і Якуба Коласа. Гэтым самым яны аддалі даніну памяці і павагі класікам беларускай літаратуры.
─ Гэтая акцыя праходзіць на ўсей Гродзенскай вобласці. Яе мэта ─ абуджэнне цікавасці да нашай спадчыны, роднай мовы і беларускай кнігі, а таксама павышэнне ролі мастацкай літаратуры ў культурным жыцці нашай краіны. Сёння мы выступаем на плошчы, каб людзі пачулі мілагучную родную мову, ─ паведаміла Алена Іосіфаўна Царык, супрацоўнік Слонімскай раённай бібліятэкі імя Якуба Коласа.
Па чарзе ўдзельнікі мерапрыемства чыталі вершы і ўрыўкі з твораў Янкі Купалы і Якуба Коласа. Вельмі цепла і прыгожа яны гучалі ў выкананні: Ірыны Войтка, Людмілы Івановай, Ірыны Дарафейчык, вучняў агульнаадукацыйнага ліцэя, навучэнцаў каледжа сельскагаспадарчай вытворчасці і іншых.
У выкананні Вікторыі Шымчак, вучаніцы СШ № 2, прагучала песня на словы Янкі Купалы «Спадчына».
На выставе, якая была прымеркавана да акцыі, былі прадстаўлены не толькі кнігі славутых пісьменнікаў, але і выдатныя вышыванкі Марыны Робец. Творы Марыны Іосіфаўны ─ гэта сваеасаблівае выказванне павагі і любові да роднай мовы з дапамогай народнай творчасці.
Слонімцам валанцеры раздавалі буклеты ў якіх падрабязна напісана аб творчасці Якуба Коласа і Янкі Купалы.
Акцыя з’яўляецца штомесячнай. Слонімская раённая бібліятэка імя Якуба Коласа ўжо не першы раз прымае ўдзел у ёй. Праходзілі мерапрыемствы, дзе чыталі творы Кандрата Крапівы, Алаізы Ажэшкі.
Комментарии (0)