Сонца паэзіі Максіма Багдановіча ўзышло, каб свяціць вякамі, свяціць нязгасна. Ён пражыў усяго 25 гадоў, але плёну гэтага жыцця, кароткага і яркага, як бліскавіца, суджана тое даўгалецце, якім лёс надзяляе кожную таленавітую асобу.
Напярэдадні 125-годдзя з дня нараджэння Максіма Багдановіча ў дзіцячай раённай бібліятэцы ў рамках абласной акцыі “Чытаем разам” чыталі творы паэта, які з’яўляецца гонарам беларускай літаратуры і яе ж болем. На мерапрыемства былі запрошаны старшыня Слонімскай арганізацыі Чырвонага Крыжа Людміла Іванова, якая зачытала апавяданне “Музыка”, сакратар кіруючай кампаніі холдынга “Зодчий” Ірына Вярбіцкая – зачытала верш “Санет” і педагог-псіхолаг СШ № 2 Людміла Караленка – зачытала верш “Па-над белым пухам вішняў”. Падтрымалі чытанне вучні 6 “А” класа СШ № 2 казкай-паэмай “Мушка-зелянушка і Камарык – насаты тварык”. Прыемна было паслухаць чароўныя радкі бессмяротнай паэзіі Максіма Багдановіча, яшчэ раз прайсціся па незабыўных сцежках яго твораў, перагарнуць хвалюючыя старонкі кароткага, але вельмі яркага жыцця.
Нараджаюцца зоркі аднойчы і аднойчы яны згасаюць. Але хочацца каб і праз стагоддзі не згасла зорка паэта Максіма Багдановіча. Паэт нараджаецца не аднойчы. Ён нараджаецца мільёны разоў – зноў і зноў, ва ўсё новых сваіх чытачах. Чытайце творы Максіма Багдановіча, слухайце іх сваім сэрцам.
Комментарии (0)