Выхаванцы Васілішкаўскага дома-інтэрната хоць і прывыклі да візітаў высокіх гасцей, але ўсё ж хваляваліся. Не кожны дзень, няхай сабе і святочны, завітвае ў іх установу міністр. А Лілія Станіславаўна Ананіч разам з досыць вялікай камандай аднадумцаў прыехала, каб раздзяліць з рабятамі радасць урачыстасці, ад душы павіншаваць і пажадаць шчаслівага новага года тым, хто асабліва мае патрэбу ў душэўнай цеплыні і ўвазе. Якім жа прыгожым і вясёлым атрымаўся ранішнік! А «жывыя» інтэрактыўныя кнігі ў падарунак дапамогуць хлопчыкам і дзяўчынкам спасцігаць прыгажосць слова, духоўна расці і развівацца.
– Трэці год у нас у рэспубліцы праводзяцца калядныя балі кнігі, а на іх пры вялікай актыўнасці праходзяць аўкцыёны кнігі, – расказвае міністр інфармацыі Л.С. Ананіч. – У выніку рэалізацыі гэтага цікавага творчага праекта сабраны сродкі, якія накіроўваюцца на дабрачыннасць. Вось і гэты сертыфікат на суму больш за 100 мільёнаў рублёў мы перадаём дзіцячым установам Шчучынскага раёна на іх развіццё, – зазначыла міністр.
Дарэчы, пазнаёміўшыся з умовамі жыцця выхаванцаў Васілішкаўскага дома-інтэрната і работай шматлікіх арт-студый, убачыўшы творчыя работы таленавітых дзяцей, Л.С. Ананіч прапанавала … сацыяльнае партнёрства на фестывалі з нагоды Дня беларускага пісьменства, які, як вядома, адбудзецца 6 верасня 2015 года ў нашым райцэнтры.
– Няхай і выстава маленькіх шэдэўраў юных творцаў дома-інтэрната таксама будзе прадстаўлена ў кніжным павільёне нашага Міністэрства, – выказала сваё пажаданне Лілія Станіславаўна.
Увогуле падрыхтоўка да Дня беларускага пісьменства ўжо распачалася і, як зазначыла Л.С. Ананіч, Міністэрства інфармацыі бярэ Шчучыншчыну пад своеасаблівы патранаж:
– Мы плануем досыць часта прыязджаць у ваш раён, наведваць школы, бібліятэкі, прывозіць у падарунак кнігі сучасных аўтараў. У рэспубліцы будзе аб’яўлены конкурс на лепшы мастацкі твор года, будзе заснавана і Нацыянальная літаратурная прэмія. Мастацкае слова заклікана несці стваральныя працэсы ў наша грамадства, захоўваць культурныя традыцыі. Кніга – гэта духоўна-маральны код кожнай краіны, – лічыць Лілія Станіславаўна.
Разам з начальнікам упраўлення выдавецкай дзейнасці і гандлю Міністэрства інфармацыі А.С. Паўлавай, генеральным дырэктарам ААТ «Белкніга» А.А. Вашкевічам, кіраўніком ААТ «Паліграфкамбінат імя Я.Коласа» І.М. Маланяком, намеснікам старшыні камітэта па працы, занятасці і сацыяльнай абароне Т.І. Гуз, намеснікам начальніка галоўнага ўпраўлення ідэалагічнай работы, культуры і па справах моладзі Гродзенскага аблвыканкама В.А. Апановічам міністр наведала і сацыяльна-педагагічны цэнтр у аграгарадку Ляшчанка.
– Хочацца, каб кожнае дзіця ў нашай краіне не толькі ў Новы год, а заўжды адчувала сябе шчаслівым, не абдзеленым цеплынёй і сардэчнасцю, – падкрэсліла Лілія Станіславаўна, уручаючы дзецям цудоўна выкананыя беларускімі паліграфістамі зборнікі казак. – Дзяржава робіць усё, каб дзеці ў такіх установах былі не проста апрануты і накормлены, а развіваліся, адаптаваліся ў соцыуме і выраслі дастойнымі грамадзянамі сваёй краіны.
Старшыня Шчучынскага раённага выканаўчага камітэта С.В. Ложэчнік і яго намеснік Г.С. Хвядзюк выказалі словы падзякі міністру за гэты дабрачынны візіт у наш раён. Ад райвыканкама былі таксама перададзены падарункі выхаванцам як Васілішкаўскага дома-інтэрната, так і сацыяльнага прытулку.
Па-добраму ўзрушаныя малышы яшчэ доўга гарталі цікавыя кнігі, частаваліся слодычамі, расказвалі вершы і спявалі песенькі. Самае чароўнае свята года падарыла ім столькі сюрпрызаў і незабыўных сустрэч, а дарослым – магчымасць увабраць у сябе гэтыя мілыя сонечныя ўсмешкі, дзіцячую непасрэднасць і адкрытасць сэрцаў.
Таццяна СТУПАКЕВІЧ. Фота Алы БІБІКАВАЙ.
Комментарии (0)