Візіт міністра фінансаў Рэспублікі Беларусь Уладзіміра Віктаравіча Амарына ў Шчучын напярэдадні святкавання Дня беларускага пісьменства быў вельмі дарэчы. Як вядома, горад рыхтуецца сустрэць свята ў поўнай сваёй прыгажосці, а для добраўпарадкавання патрэбны значныя фінансавыя ўкладанні. Таму некаторыя незаспакоеныя шчучынцы вырашылі звярнуцца да міністра і расказаць пра тыя праблемы, якія іх вельмі хвалююць.
Летась па вуліцы Пушкіна была заменена цеплатраса, аналагічныя работы вяліся і па Маладзёжнай. Вядома ж, вуліцы былі раскапаны. Пасля зімы грунт асеў, і цяпер можна класці асфальтавае пакрыццё. Вось і звярнуліся да міністра жыхары гэтых вуліц з просьбай дапамагчы з фінансаваннем – на добраўпарадкаванне патрэбна каля 10 мільярдаў.
– Прывядзенне гэтых вуліц у належны стан, безумоўна, закладзена ў наш план, толькі сродкаў на ўсё не хапае, – патлумачыў старшыня Шчучынскага райвыканкама Сяргей Васільевіч Ложэчнік. – А мы ж павінны сустракаць шматлікіх гасцей горада ў Дзень пісьменства так, каб усім было ўтульна і камфортна. Таму пытанне добраўпарадкавання адно з актуальных.
– Сітуацыя ў рэспубліканскім бюджэце даволі не простая, – адказаў Уладзімір Віктаравіч Амарын. – Наша краіна вяртае вялікія даўгі. Таму лішніх сродкаў у нас няма. Аднак мы разгледзім гэтыя звароты, прааналізуем і вырашым, чым зможам дапамагчы.
Практычна ніводны прыём не абыходзіцца без пытання, якое сёння ва ўсіх на слыху. І на гэты раз пагутарыць з міністрам прыйшлі маладыя мамы, якіх, як нікога, хвалюе праблема будаўніцтва дзіцячага садка ў Паўднёва-Заходнім мікрараёне Шчучына.У.В. Амарын запэўніў жанчын, што пытанне будаўніцтва садка будзе абавязкова разгледжана пры фарміраванні бюджэту на наступны год. Дарэчы, гэту праблему трымае на кантролі і губернатар Гродзеншчыны У.В. Краўцоў. Дзіцячы садок, для будаўніцтва якога ўжо распрацавана праектна-каштарысная дакументацыя, разлічаны на 170 месц. Кошт узвядзення гэтага аб’екта на сённяшні дзень складае 66 млрд. рублёў.
Са сваёй асабістай праблемай прыйшла на прыём яшчэ адна жыхарка горада Шчучына. Наведвальніца хоча атрымаць субсідыю, каб вырашыць праблему з жыллём. Як аказалася, у аддзеле жыллёва-камунальнай гаспадаркі, куды яна да гэтага звярталася, ёй прапанавалі сабраць пакет неабходных дакументаў, згодна з якімі і будзе прымацца рашэнне. Жанчына дакументы так і не прадставіла. Міністр прапанаваў ёй такі ж алгарытм дзеянняў.
Начальнік упраўлення сельскай гаспадаркі і харчавання Г.Б. Хоміч, які прысутнічаў на прыёме, звярнуўся да міністра з просьбай дапамагчы вырашыць праблему, што ўзнікла пры будаўніцтве малочнатаварнага комплексу непадалёку вёскі Скоржыкі ў СВК “Шчучынаграпрадукт”. Банкі спынілі фінансаванне, будоўля закансервавана амаль паўгода, утварыліся вялікія даўгі перад будаўнічымі арганізацыямі. У.В. Амарын паабяцаў разабрацца ў гэтай сітуацыі. У той жа дзень Уладзімір Віктаравіч пабываў на будаўнічай пляцоўцы, дзе вядзецца рэканструкцыя былога палаца Друцкіх-Любецкіх, пацікавіўся ўзвядзеннем завода кампаніі “Праймілк”, наведаў новы спарткомплекс па вуліцы Авіятараў, а таксама агледзеў вуліцы горада, якія патрабуюць добраўпарадкавання.
Комментарии (0)