Рыхтаваліся да сустрэчы «свайго» міністра і работнікі раённых вузлоў паштовай сувязі і электрасувязі. С.П. Папкова цікавіла, як вядзецца падрыхтоўка аб’ектаў гэтых ведамстваў да свята беларускага пісьменства, што мае адбыцца ў Шчучыне 6 верасня. Да прыкладу, сэрвісны цэнтр «Белтэлекам» ужо адрамантаваны і надзвычай запатрабаваны наведвальнікамі. Плануецца завяршыць аддзелку фасадаў, добраўпарадкаваць тэрыторыю двара, адрамантаваць службовыя памяшканні і ў цэнтральным паштовым аддзяленні. Дарэчы, як паштавікі, так і белтэлекамаўцы распрацавалі багата цікавых мерапрыемстваў і акцый з нагоды Дня беларускага пісьменства.
С.П. Папкоў завітаў у залу абслугоўвання нашага «галоўпаштамта», дзе пацікавіўся ў аператараў, наколькі актыўна карыстаюцца шчучынцы электроннымі паслугамі.
– У гэтым плане мы яшчэ адстаём ад Еўропы, хоць у цэлым Беларусь у ліку лідараў па развіцці сучасных тэхналогій, у чым можна было пераканацца на нядаўняй спецыялізаванай выставе «Тибо-2015», – адзначыў міністр. – У нашай галіне праведзена маштабная мадэрнізацыя, прайшла і аптымізацыя ўстаноў, аднак любая паслуга сувязі застаецца даступнай для людзей нават у самай аддаленай вёсачцы. А што тычыцца ўкаранення электронных паслуг, то яшчэ вельмі важна, каб яны мелі юрыдычную значнасць.
Між іншым сёння кожны шчучынец можа мець доступ да інфармацыйных рэсурсаў, уключаных у «Агульнадзяржаўную аўтаматызаваную інфармацыйную сістэму (ААІС)», а гэта значыць, што ў любым сэрвісным цэнтры «Белтэлекам» можна ўдакладніць наяўнасць ўласных запазычанасцяў па «камуналцы» або крэдытах, даведацца аб маёмасных правах і абмежаваннях, будзь то зямельныя ўчасткі ці незавершанае будаўніцтва. Падчас сустрэчы з працоўнымі калектывамі вузлоў сувязі Сяргей Пятровіч меў на мэце праінфармаваць прысутных аб знешняй і ўнутранай палітыцы, якую вядзе Прэзідэнт краіны і Урад, нацэліць на паспяховыя вытворчыя вынікі, падзяліцца сваімі думкамі і ўражаннямі аб Пасланні Прэзідэнта беларускаму народу і парламенту, расказаць аб з’ездзе Федэрацыі прафсаюзаў Беларусі, дзе А.Р. Лукашэнка ў сваім выступленні праз сацыяльную прызму вызначыў шляхі далейшага развіцця эканомікі, падкрэсліўшы, наколькі важна сёння захаваць вытворчыя калектывы, быць уважлівым да надзённых праблем чалавека працы. Сяргей Пятровіч Папкоў прапанаваў прысутным задаваць яму любыя хвалюючыя пытанні, падкрэсліў адкрытасць службовых асоб, якія гатовы весці дыялог і падчас прыёмаў па асабістых пытаннях, і на прамой тэлефоннай лініі.
– Мне спадабаўся ваш чысты, прыгожы горад, – сказаў міністр падчас інтэрв’ю, якое даў журналістам «Дзянніцы». – А тыя праблемы, што існуюць сёння на заводзе «Аўтапровад» з рэалізацыяй прадукцыі, будуць вырашаны ў бліжэйшы час. Як запэўніў дырэктар прадпрыемства, заработная плата завадчан падцягнецца да ўзроўню сярэдняй па рэспубліцы. Трэба разумець, што зараз у сувязі са знешнімі фактарамі настаў час досыць складаны для эканомікі краіны, але беларусы дастойна перажывалі і больш складаныя этапы. Галоўнае – не апускаць рукі, развівацца, захаваць працоўныя калектывы.
Комментарии (0)