Аказваецца, недахоп вільгаці ў глебе і нават нязначнае грэбаванне тэхналагічнымі патрабаваннямі прыводзяць да сур’ёзнага збою ў тэхналагічным ланцужку, і, як следства, усе намаганні па вырошчванні «другога хлеба» не апраўдваюць людскія надзеі і ўкладзеныя сродкі.– Ведаеце, не існуе сартоў, устойлівых да безгаспадарчасці, – у гэтым жарце дырэктара інстытута Уладзіміра Уладзіміравіча Курыловіча ўсяго доля … жарту.Дарэчы, гэта нефармальная размова адбывалася ля сучаснага цяплічнага комплексу, палівачнымі работамі і многімі працэсамі ў якім можна займацца … праз выхад у інтэрнэт, нават седзячы дома. «Разумныя цяпліцы» робяць усё неабходнае чалавеку праз праграмнае кіраванне. Нядзіўна, што вучоныя высаджваюць сюды не проста культуры, а расліны … з прабірак. Навуковае забеспячэнне развіцця бульбаводства ў нашым занальным інстытуце ажыццяўляецца на аснове навейшых дасягненняў біятэхналогіі, паспяхова прымяняюцца метады размнажэння аздароўленых раслін іn vіtrо і іn vіvо. І такіх «фішак» у шчучынскіх навукоўцаў нямала.
Работа, якая праводзіцца тут па экалагічным выпрабаванні сельскагаспадарчых культур, дазваляе больш поўна выкарыстоўваць у рэгіёне дасягненні замежнай і айчыннай селекцыі, хутчэй укараняць новыя высокапрадукцыйныя гатункі. Так, бульба з цяпліц (а расліны тыя проста радуюць вока ізумруднай зелянінай каліваў і водарным цвіценнем. І гэта ж у такую невыносную спякоту!) на наступны год будзе выкарыстоўвацца як каштоўны аздароўлены насенны матэрыял, і высадзяць яе ўжо ў адкрыты грунт. Сярод дэманстрацыйных узораў выдзяляю бульбу «маніфест». Спецыялісты сцвярджаюць, што гэта наш альтэрнатыўны адказ папулярнаму галандскаму сорту «рэд скарлет».
Не менш увагі надаюць шчучынскія навукоўцы і зерневым. Створанае на аснове селекцыйных метадаў адбору і вырашчанае ў пярвічных звеннях насенняводства арыгінальнае насенне перспектыўных сартоў забяспечвае патрэбы элітнага і прамысловага насенняводства вобласці, дазваляе весці эфектыўную сортазмену і сортаўзнаўленне, удасканальваць структуру пасеваў і гатункаў.Губернатар з цікавасцю азнаёміўся з тым, як ідзе жніво на доследных дзялянках, дзе навукоўцы праводзяць экалагічныя выпрабаванні. Налітае калоссе і гушчыня нівы ўражвалі. Аўстрыйскі міні-камбайн «Wіntеrstеіgеr dеltа» з сістэмай самаачысткі дынамічна пераключаўся з уборкі аднаго сорту на другі. Работы праходзілі пад кіраўніцтвам кандыдата сельскагаспадарчых навук, старшага навуковага супрацоўніка А.І. Шчатко. Прама ў полі губернатар зацікаўлена гутарыў з навукоўцамі, абмяркоўваючы тэму экалагічнага земляробства, беражлівых адносін да зямлі, кадравыя пытанні. А потым супрацоўнікі занальнага інстытута з задавальненнем паказалі Уладзіміру Васільевічу, як вырошчваюць у інстытуце не толькі яблыкі, але ў якасці эксперыменту і буякі (голубику). Ды што там – нават кавуны! Праўда, з-за рэзкага перападу начных і дзённых тэмператур плантацыя бахчавых выглядае сціпла. «На ёй не заробіш,» – гавораць песімісты. «Па адным сезоне такія заключэнні рабіць рана», – даюць адпор аптымісты. А ў спрэчках, як вядома, нараджаецца ісціна…
Губернатар азнаёміўся з вытворчай базай занальнага інстытута раслінаводства, якая пастаянна ўмацоўваецца і мадэрнізуецца. Тут адносна нядаўна пабудаваны сучаснае бульбасховішча з рэгуляваным мікракліматам, склад для захавання насення збожжавых, той жа цяплічны комплекс. Эфектыўна працуе аўтаматычная лінія па падрыхтоўцы насення. Набыта сучасная спецтэхніка для селекцыі і насенняводства. А за кошт уласных сродкаў да ўсяго вядзецца рэканструкцыя інтэрната для маладых спецыялістаў.Прыемна пабываць у прыгожым, стыльным будынку інстытута, дзе створаны ўсе ўмовы для плённай працы супрацоўнікаў. Губернатар з цікавасцю наведаў навуковыя лабараторыі, пазнаёміўся з тымі, хто вядзе доследы. Уладзімір Уладзіміравіч Курыловіч падзяліўся з кіраўніком вобласці планамі аб стварэнні музея інстытута – старэйшай у краіне навуковай установы, што перакрочыла стогадовы рубеж. У інтэрв’ю нашай газеце У.В. Краўцоў зазначыў, што досыць часта бывае ў нашым раёне і перакананы: рэгіён мае вялікі патэнцыял. – Я задаволены тым, што сёння ўбачыў. У Шчучыне створана выдатная навукова-прыкладная база, – сказаў Уладзімір Васільевіч. – Надзвычай важна, каб тыя напрацоўкі, якія тут ёсць, хутчэй укараняліся ў рэальную эканоміку. Менавіта кадры на месцах, у гаспадарках павінны разумець каштоўнасць навуковага вопыту і новых тэхналогій. Тады мы будзем атрымліваць больш важкія вынікі ў сельскай гаспадарцы.У паездцы па раёне кіраўніка вобласці суправаджаў старшыня Шчучынскага райвыканкама Сяргей Васільевіч Ложэчнік.
Комментарии (0)