У пасёлку Ражанка адбылосяўрачыстае адкрыццё першай у вобласці сонечнай электрастанцыі. Гэты цікавы інвестыцыйны праект ТАА “Аграхімсвятло” стартаваў яшчэ ў верасні 2013 года. На пустцы плошчай у 2,4 га, у непасрэдным суседстве з вытворчай базай ААТ “Аграхімсэрвіс”, пачалася ўстаноўка сонечных калектараў. Будаўніцтва першай на Гродзеншчыне сонечнай электрастанцыі было разбіта на чатыры пускавыя комплексы. І вось 14 жніўня наступіла знакавая падзея не толькі для Шчучынскага раёна, але і для ўсёй рэспублікі. Новая сонечная электрастанцыя, гадавая магутнасць якой складае 1200000 кВт/г, цяпер запрацавала ў поўную сілу.
– У праект інвеставана 19 мільярдаў рублёў, – гаворыць дырэктар новай электрастанцыі Валерый Юр’евіч Вашчыла. – Гэта – крэдыты і ўласныя сродкі, акупіцца якія павінны праз пяць гадоў. Вопыт мы набывалі на аналагічным прадпрыемстве ва ўкраінскай Вінніцы, а цяпер і самі гатовы падзяліцца досведам з іншымі.
Размешчаныя ў Ражанцы 4900 сонечных панеляў магутнасцю 230-250 Вт здольны ў суткі выпрацаваць 8500 кВт/г экалагічна чыстай энергіі, якая «сцякаецца» на трансфарматарную падстанцыю, а далей ідзе яе пераразмеркаванне. Пакупнік сонечнай электраэнергіі – РУП «Гроднаэнерга».
Адкрыццё электрастанцыі не абышлося без добрых традыцый: перарэзвання чырвонай стужкі, мноства гасцей, святочнай імпрэзы, якую падрыхтавалі для віноўнікаў урачыстасці культасветработнікі Руткевіцкага СДК. Павіншаваць з днём нараджэння новае прадпрыемства прыехалі і кіраўнікі раёна – старшыня Шчучынскага райвыканкама С.В. Ложэчнік і старшыня раённага Савета дэпутатаў І.Ю. Сакалоўскі.
– Сёння мы з вамі сталі сведкамі таго, як касмічныя тэхналогіі прыйшлі на нашу Шчучыншчыну, – адзначыў Сяргей Васільевіч Ложэчнік. – Удала выбрана база для гэтага «сонечнага праекта». Мы ўсё часцей задумваемся не толькі аб эканамічнасці, але і экалагічнай значнасці таго, што ўкараняем. За «зялёнай энергетыкай», безумоўна, будучае.
– Спецыялісты падлічылі, што ў Беларусі 1800 сонечных гадзін у год. Гэта ўзровень Германіі і Японіі, дзе надзвычай развіты падобныя тэхналогіі, – падкрэсліў упраўляючы партнёр ТАА «Аграхімсвятло» С.Б. Белы. – Так, паводле еўрапейскай стратэгіі «20-20-20», да 2020 года агульныя энергазатраты ў краінах ЕС павінны скараціцца на 20%, доля энергіі ад аднаўляльных крыніц мусіць вырасці да 20%, а ўзровень выкідаў вуглякіслага газу ў атмасферу таксама павінен скараціцца на 20%. Аднак, каб дасягнуць пастаўленай мэты, дзейнічаць трэба сёння. І тут прагрэсіўны праект ТАА «Аграхімсвятло» не проста ідзе ў нагу з часам, а робіць свой істотны ўнёсак у стратэгію будучыні.
Сярод гасцей, якія прыехалі павіншаваць піянераў сонечнай энергетыкі на Шчучыншчыне, – намеснік старшыні райвыканкама А.В. Садоўскі, дырэктар Гродзенскіх электрасетак В.В. Зубрыцкі і яго калега са Шчучынскага РЭС А.П. Асовік, намеснік старшыні Камітэта дзяржкантролю па Гродзенскай вобласці А.М. Садаўнічы, генеральны дырэктар ААТ «Шчучынаграхімсэрвіс» Г.І. Вількевіч і іншыя.
Гучалі цёплыя словы падтрымкі, адчувалася шчырая цікаўнасць да праекта, і, канешне, усе з задавальненнем адправіліся на экскурсію па сонечнай электрастанцыі, падчас якой на шматлікія пытанні адказвалі супрацоўнікі новага прадпрыемства. Між іншым, дзякуючы рэалізацыі гэтага праекта створана пяць новых рабочых месцаў. А ў кіраўніка ТАА «Аграхімсвятло» В.Ю. Вашчылы ў планах ужо пашырэнне плошчаў з сонечнымі калектарамі. Што называецца, энергіі замнога не бывае…
Комментарии (0)