Сяўба ранніх яравых зерневых і зернебабовых культур дасягнула свайго эпагею: на фінішную прамую выйшла пасяўная тэхніка ўсіх гаспадарак раёна. Па стане на 18 красавіка, насенне прыгорнута ў глебу на 9 282 гектарах, што складае 86 працэнтаў ад плана.
Дзень-два, і працаўнікі, “разабраўшыся” са збожжавымі, ушчыльную возьмуцца за цукровыя буракі, бульбу, лён і кукурузу.
Хлебаробы з СВК “Міхалішкі” заканчваюць засяваць зерневымі апошнія калгаснымі лапікі: больш чым на 1 456 гектарах трапіла насенне пшаніцы, аўса, ячменю і зернебабовых.
На гліністых страчанскіх нівах, скрозь усыпаных узвышшамі і ўзгоркамі, у мінулую пятніцу снавала, бы мурашы, пасяўная тэхніка – хоць буйнагабарытным агрэгатам развярнуцца на дробнаконтурных участках няпроста.
Увогуле ў гаспадарцы на сяўбе ранніх зерневых культур было занята 6 энерганасычаных трактароў. Па словах спецыялістаў інжынернай службы, тэхніку рыхтавалі загадзя сваімі сіламі: патрэбныя запчасткі набывалі за кошт рэалізацыі прадукцыі раслінаводства і жывёлагадоўлі. Агульнымі намаганнямі ў сярэднім за дзень у СВК “Міхалішкі” засявалася больш за 135 гектараў яравых культур, што складае 8 працэнтаў ад плана сяўбы. Сёлета міхалішкаўцы для сортазмены набылі 49 тон эліты насення пшаніцы, ячменю і аўса.
Колькасны і якасны склад зерневай групы не змяніўся: авёс заняў 57 з 130 гектараў, ячмень – 699 гектараў, з якіх 170 – піваварны, а пшаніца пасеяна на плошчы 600 гектараў. Для выканання плана па фарміраванні паўтарагадовага запасу кармоў у гаспадарцы сёлета павялічылі на 50 гектараў плошчу пад кукурузу. На столькі ж павялічылася плошча вырошчвання цукровікаў. Па стане на 18 красавіка, насенне цукровых буракоў прыгорнута ў глебу на плошчы 175 гектараў, што складае 58 працэнтаў ад плана.
– У гаспадарцы падрыхтавана 2 225 гектараў пад яравую сяўбу – гэта прыблізна 75 працэнтаў ад плана, – гаворыць намеснік старшыні СВК “Міхалішкі” па раслінаводству Андрэй Іосіфавіч Ствол. – Актыўнымі тэмпамі зараз сеем цукровыя буракі. Што тычыцца азімых, то збожжавыя выйшлі з зімоўкі ў добрым стане, чаго не скажаш пра рапс. Загінула 85 гектараў крыжакветкавага на страчанскім участку.
Каб атрымаць добры ўраджай, трэба своечасова падкарміць культуры. У СВК “Міхалішкі” зерневыя азімыя – 1 270 гектараў – цалкам падкормлены. Акрамя гэтага, патрэбную дозу “мінералкі” атрымалі 730 гектараў сенакосаў і пашы і 567 гектараў шматгадовых траў. У другі раз пакормлена 250 гектараў рапсу.
…Наракаць на жыццё хлебаробам з СВК “Міхалішкі” няма калі: з першымі сонечнымі промнямі яны выводзяць у поле тэхніку і заворваюць, культывуюць… І тэмпы вясенне-палявых работ, і бліскучыя ад расы рапсавыя ізумруды, і залатыя зярняты новага ўраджаю – пацвярджэнне таму, што агульнае аблічча сяўбы складаецца з асобных твараў працаўнікоў – усмешлівых і заклапочаных, маладых і сталых, мужчын і жанчын...
_________________
Алена ГАНУЛІЧ, фота аўтара.
Комментарии (0)