Ці чулі вы, як перашэптваюцца паміж сабой каласкі новага ўраджаю? А ці бачылі, якімі трапяткімі хвалямі прабягае па саспелых нівах жэўжык-вецер?
Напрыканцы мінулага тыдня, у пятніцу, калі сонца бязлітасна паліла наваколле, а пра дождж не было і напаміну, я выправілася на жніво на міхалішкаўскія і спондаўскія палеткі.
Нягледзячы на складанасць сёлетняй уборачнай кампаніі, хлебаробы раёна, у тым ліку і СВК “Міхалішкі”, працуюць сумленна і стараюцца вырваць у “плаксівага” жніўня спрыяльныя для абмалоту збожжа гадзіны і дні.
Хоць раённыя нівы ў гэтым годзе даюць значна менш, чым летась, новы ўраджай залатымі струменямі сыплецца ў калгасныя засекі. Па стане на 9 жніўня ў СВК “Міхалішкі” валавы намалот склаў 4 570 тон. Абмалочана 1 284 гектара, што складае 43 працэнта ад плану пры сярэднераённых 52. Ураджайнасць збожжавых ледзьве дацягвае да 35 цэнтнераў з гектара.
– Негатыўны ўплыў, асабліва на яравыя культуры, зрабіла надвор’е, – тлумачыць галоўны аграном СВК “Міхалішкі” Андрэй Іосіфавіч Ствол. – У гэтым годзе добра бачна розніца нават у знешнім выглядзе расліны, не кажучы пра яе ўраджайнасць. На пясчаніках і гліністых глебах зусім кволая і слабая збажына. Вось каб хоць на месяц раней задажджыла – упэўнены, што сабралі б значна большы ўраджай.
Праязджаючы ля калгасных ніў, заўважаю, што кукуруза і цукровыя буракі, дзякуючы працяглым дажджам, якія адмоўна адбіліся на тэмпах уборкі збожжавых, “адпіліся”. Прынамсі, “каралева палёў” вымахала ўжо ў рост чалавека.
Усяго ў СВК “Міхалішкі” на жніве працуюць 11 камбайнаў, якія разбіты на два вытворчыя звяны.
На маё традыцыйнае пытанне “Як працуецца?” брыгадзір раслінаводчага ўчастка №2 Міраслаў Іосіфавіч Памецька адказвае, усміхаючыся: “Як бачыце – добра! Надвор’е толькі б не падвяло!”.
…За ўсімі лічбамі і працэнтамі, у якіх мы прывыклі вымяраць ураджай, стаіць штодзённая праца хлебароба: загорнутае ў глебу зерне прарастае калівам новага ўраджаю і трапляе на наш стол караваем-2016, які пахне і міхалішкаўскімі, і спондаўскімі нівамі.
Алена ГАНУЛІЧ, фота аўтара.
Комментарии (0)