На тэрыторыі ААТ “Аграхімсэрвіс” пачалося будаўніцтва другой сонечнай электрастанцыі магутнасцю 1,15 МВт. Пасля яе запуску колькасць выпрацоўваемай тут электраэнергіі павялічыцца амаль удвая і складзе прыкладна 16000 КВт/гадзін у суткі.
– Наша першая сонечная электрастанцыя магутнасцю 1,26 МВт была ўведзена ў эксплуатацыю ў 2013 годзе і за гэты час выпрацавала прыкладна 2,5 мільёна кілават-гадзін электраэнергіі, – зазначае галоўны інжынер ТАА “Аграхімсвятло” Віктар Леанідавіч Зенчык.
– Новую СЭС мы вырашылі будаваць па нямецкім праекце “Цыммерман”. Галоўная яго асаблівасць у тым, што каркас станцыі збіраецца з металічных ацынкаваных канструкцый без удзелу электрагазазваркі. Такая сістэма больш надзейная і ўстойлівая да перападу тэмператур, ды і збіраецца яна значна хутчэй. Самі ж сонечныя панэлі закупляем у нашых літоўскіх партнёраў. Каштуе адзін такі модуль прыкладна 150 еўра, а гарантаваны тэрмін яго эксплуатацыі складае мінімум 20 гадоў. Узвядзенне новай сонечнай электрастанцыі ля вёскі Ражанка даверылі высокакваліфікаваным спецыялістам інжынірынгавай кампаніі “ІнвестЭнергаБуд”, на рахунку якой нямала паспяхова рэалізаваных інавацыйных праектаў.
– Летась мы працавалі на будаўніцтве СЭС ля вёскі Рагачы Гродзенскага раёна магутнасцю 1 МВт, – дзеліцца электраманцёр Аляксандр Іосіфавіч Андрэйчык. – Цяпер вось прыбылі на Шчучыншчыну і займаемся зборкай металічнага каркаса для новай сонечнай электрастанцыі. Разам з напарнікам за дзень манціруем каля 100 метраў металічных канструкцый. Пры ўзвядзенні аб’екта асаблівая ўвага надаецца якасці будаўнічых работ і строгаму выкананню тэхналогій.
– Згодна з патрабаваннямі тэхнікі бяспекі на сваім міні-экскаватары пракопваю вакол сабраных каркасаў для сонечных модуляў траншэю глыбінёй 70 сантыметраў, дзе будзе пракладзена контрзазямленне, – кажа экскаватаршчык Павел Іванавіч Адашкевіч. – Гэта дазволіць у выпадку абрыву праводкі накіраваць электрычны разрад у зямлю і тым самым засцерагчы людзей ад удару токам.
Усе будаўнічыя работы тут плануецца завяршыць да канца снежня, і новая сонечная станцыя запрацуе на поўную магутнасць. Прычым яна будзе выпрацоўваць электрычнасць круглы год.
– Летам модулі назапашваюць найбольшую колькасць сонечнай энергіі, але спякота паніжае каэфіцыент іх карыснай дзейнасці, – гаворыць галоўны інжынер ТАА “Аграхімсвятло” Віктар Леанідавіч Зенчык. – Затое зімой, калі ўсталёўваецца мароз і свеціць яркае сонца, сістэма выдатна працуе і не награваецца, што станоўча адбіваецца на перадачы электраэнергіі і мінімалізацыі страт.
Дарэчы, новая СЭС будзе працаваць у аўтаномным рэжыме. Да прыкладу, калі выпрацоўваемае сонечнымі панэлямі напружанне стане менш за 200 вольт – сістэма аўтаматычна адключыцца і запусціцца толькі калі гэты паказчык перавысіцца. Пры парыве электраправодкі камп’ютар таксама самастойна абясточыць пашкоджаную лінію і падкажа, дзе здарылася аварыя.
– Падчас рэалізацыі новага праекта будзе асвоена два мільёны дэнамінаваных рублёў, аднак гэтыя інвестыцыі акупяцца ўжо праз шэсць гадоў, – зазначае В.Л. Зенчык. – Сонечная энергія суперэканамічная і экалагічна чыстая. Да прыкладу, наша дзеючая станцыя ў сонечны дзень выпрацоўвае прыкладна 8000 КВт/гадзін электраэнергіі. Гэтага дастаткова, каб на месяц забяспечыць святлом 40-кватэрны дом. На сённяшні дзень нашых магутнасцяў хапае, каб абслужыць 13% насельніцтва раёна, а з уводам у эксплуатацыю новай станцыі зможам павялічыць гэты паказчык да 25%.
Аляксандр КАСПЯРЧУК. Фота аўтара.
Комментарии (0)