Наш паўночны рэгіён знаходзіцца ў зоне так званага рызыкоўнага земляробства. Нават калі зроблены добры задзел пад будучы ўраджай, калі ў гаспадарцы ёсць патрэбная колькасць «мінералкі» і тэхнікі, ніхто не можа сказаць дакладна: якім будзе ўраджай?
Пра падрыхтоўку да вясенне-палявых работ, насенне і тэхнічнае «ўзбраенне» гаспадарак нам расказалі спецыялісты райсельгасхарчу.
Галоўны спецыяліст сектара раслінаводства ўпраўлення сельскай гаспадаркі і харчавання Данута Станіславаўна БРАЗЕВІЧ:
– Ва ўсіх гаспадарках раёна распрацавана структура пасяўных плошчаў. Збожжавая група ў параўнанні з мінулым годам амаль не змянілася. Так, пад ураджай 2017 з восені пасеяна 8 270 гектараў азімых культур. Пад яравую сяўбу адведзена 18 038 гектараў, з якіх амаль 11 тысяч зоймуць збожжавыя і зернебабовыя. Цукровыя буракі будуць вырошчвацца на плошчы 1 620 гектараў, бульба – на 160 гектарах.
Але, як кажуць, не хлебам адзіным… Па-ранейшаму перад аграрыямі стаіць задача сфарміраваць надзейны запас кармоў. У гэтым сэнсе ў кормавытворчасці цяжка пераацаніць ролю кукурузы. Каралева палёў «прапішацца» на 5 500 гектарах, у тым ліку на зерне яна будзе пасеяна на 650 гектарах.
У апошнія гады ільнаводствам займалася адзіная гаспадарка ў раёне – саўгас «Падольскі». У мінулым годзе пад маслянічны лён было адведзена 100 гектараў. Сёлета ў сувязі з нерэнтабельнасцю і значнымі эканамічнымі затратамі на вырошчванне гэтай культуры было вырашана адмовіцца ад «блакітнавокага».
З восені праведзена хімічная праполка толькі 3 252 гектараў азімых культур, што складае 23% ад плана. Вясной плануецца апрацаваць астатнія 5 018 гектараў. Гліфасаты ўнесены на плошчы 9 884 гектара (82%). Заворана 7 765 гектараў глебы – гэта крыху больш, чым палова.
З нарыхтоўкай арганічных угнаенняў праблем няма: гаспадаркі раёна нарыхтавалі 308,7 тысячы тон (87%). Найбольш актыўна спрацаваў КСУП «Гудагай» (105%). На палі вывезена 292 тысячы тон арганікі, што складае 95% ад нарыхтаванай, а ўнесена – 106 тысяч тон.
Пад яравую сяўбу ўжо назапашана 3 629 тон мінеральных тукаў – 34% ад неабходнага. Напрыклад, КСУП «Гудагай» забяспечаны «мінералкай» на 60%, а КСУП «Гервяты» – на 39%.
Усе гаспадаркі раёна будуць сеяць насенне, якое прайшло праверку ў насеннай інспекцыі. Для сортааднаўлення плануецца набыць эліту ў элітгасах вобласці.
Зараз у засеках гаспадарак ёсць 3 152 тоны насення збожжавых і зернебабовых пры патрэбе 2 535 тон. 105 тон насення гібрыдаў кукурузы будзе закуплена цэнтралізавана праз ДУП «Аблсельгастэхніка». Насеннем цукровых буракоў гаспадаркі раёна забяспечыць Слуцкі цукровы камбінат. А вось бульбу будуць садзіць вырашчанымі на сваіх палях клубнямі.
Галоўны інжынер упраўлення сельскай гаспадаркі і харчавання
Уладзімір Іосіфавіч РАМАНОЎСКІ:
– Народная мудрасць – рыхтуй сані летам, а калёсы зімой – не страціла сваёй актуальнасці і зараз. Ва ўсіх гаспадарках ідзе падрыхтоўка да вясенне-палявых работ.
Механізатараў, токараў, слесараў не палохаюць маразы: усе цэнтральныя майстэрні абаграваюцца. Ва ўсіх гаспадарках зацверджаны графікі рамонту тэхнікі. Да 1 сакавіка да выхаду ў поле павінна быць гатова 95% трактароў, камбінаваных пасяўных агрэгатаў і плугоў. На пачатак лютага да палявых работ падрыхтавана 87 працэнтаў трактароў, 77% плугоў і 71 працэнт пасяўных агрэгатаў.
У сувязі са складаным фінансавым становішчам гаспадаркі раёна сёлета не плануюць набываць новую тэхніку. Па-ранейшаму галоўным клопатам для інжынернай службы застаюцца запчасткі – гаспадаркі набываюць іх за ўласныя сродкі. Найбольш складаная ў гэтым сэнсе сітуацыя ў КСУП «Варняны» і РУП «Саўгас «Падольскі». Дапамогу ў рамонце двух пасяўных агрэгатаў варнянскай гаспадарцы аказвае сельгастэхніка.
Увогуле на яравой сяўбе будзе задзейнічана 30 трактароў, з якіх 21 – айчыннай вытворчасці. Акрамя гэтага, у полі будуць працаваць 24 камбінаваныя пасяўныя агрэгаты. «На ўзбраенні» земляробы маюць 21 раскідвальнік мінеральных угнаенняў і 59 культыватараў. Для падкормкі азімых культур ёсць 7 самаходных энергетычных агрэгатаў «Раса». Насенне цукровых буракоў і кукурузы у глебу загорнуць 20 сеялак.
Па папярэдніх разліках для своечасовай сяўбы і іншых палявых работ гаспадаркам раёна спатрэбіцца 1 650 тон дызельнага паліва, 215 тон бензіну і 83 тоны масла. Пытанне, ці будзе адкрыта крэдытная лінія для набыцця гаруча-змазачных матэрыялаў, пакуль застаецца адкрытым.
Гаспадаркі раёна на 40% будуць ажыццяўляць тэхнічнае абслугоўванне энерганасычаных трактароў за ўласныя сродкі, астатнюю частку кампенсуе бюджэт.
У сакавіку распачнецца тэхнічны агляд тэхнікі, а ўсе працаўнікі, якія будуць заняты на вясенне-палявых работах, абавязкова пройдуць медыцынскі агляд.
Падрыхтавала Алена ГАНУЛІЧ.
ostrov-red.ganulich@tut.by
Комментарии (0)