Будаўніцтва трэцяй лініі падземкі, якая злучыць паўднёвыя і паўночныя жылыя масівы Мінска з цэнтрам, ідзе поўным ходам. Збудаванне станцыі «Кавальская слабада» ў канструкцыях выканана на 95 працэнтаў, «Вакзальная» гатовая прыкладна на 70 працэнаў. Ужо ў сакавіку здадуць шасціпавярховы корпус будынка для эксплуатуючага персаналу метрапалітэна каля станцыі «Кавальская слабада».
Каб першыя чатыры станцыі — «Кавальская Слабада», «Вакзальная», «Плошча Ф.Багушэвiча» і «Юбілейная» — прынялі першых пасажыраў у тэрмін, метрабудаўцы працуюць кругласутачна і без выхадных. Задзейнічана больш за дзве тысячы чалавек. У выніку напружанай працы на станцыі «Кавальская Слабада» ўжо ўзвялі скляпенне і платформу, збудавалі ўсе ўваходы і службовыя памяшканні. Тупікі для электрацягнікоў таксама гатовыя.
— Мы ўжо прыступілі да электрамантажных і архітэктурна-аддзелачных работ. Тынкуем сцены, заліваем сцяжку, уладкоўваем гідраізаляцыю на падлогах. Месцамі нават пачалі класці плітку, — за ходам будоўлі пільна сочыць начальнік участка Уладзімір Кузняцоў.
Архітэктары вызначыліся з матэрыяламі. На падлогах пакладуць устойлівы да нагрузак і лёгкі ў прыбіранні граніт, на калонах — металакерамічныя панэлі, а столі зробяць металічнымі, падвеснымі. Для людзей са слабым зрокам на падлогу пакладуць спецыяльную рыфленую плітку.
Тым часам на станцыі «Плошча Францішка Багушэвіча» завяршаюцца работы па перакладцы інжынерных сетак. У мінулыя выхадныя там пераключылі газаправод, каб метрабудаўцы маглі прадоўжыць ладзіць катлаван і затым прыступіць да будаўніцтва станцыі і ўваходаў у яе.
— Першы ўчастак трэцяй лініі пойдзе ад станцыі «Юбілейная» да станцыі «Каржанеўскага», у бок бальніцы хуткай дапамогі. Ён уключае ў сябе сем станцый. Зараз будуем чатыры станцыі першага пускавога комплексу, затым прыступім да будаўніцтва другога пускавога комплексу. Гэта яшчэ тры станцыі: «Аэрадромная», «Лошыцкая» і «Каржанеўскага», — намеснік галоўнага інжынера УП «Мінскметрабуд» Сяргей Грэчкін расказвае аб планах.
Падрыхтоўка тэрыторыі пад будаўніцтва другога пускавога комплексу пачнецца ў гэтым годзе. Сёлета ж плануюць прыступіць да будаўніцтва інжынернага корпуса ў раёне «Плошчы Незалежнасці». А вось да падрыхтоўкі тэрыторыі пад будаўніцтва электрадэпо «Слуцкае», якое размесціцца ў раёне будучай станцыі «Каржанеўскага», метрабудаўцы ўжо прыступілі. Яно прызначана для цягнікоў, што будуць абслугоўваць трэцюю лінію.
Перагонныя тунэлі трэцяй лініі Мінскага метрапалітэна майструюць з дапамогай механізаванага тунэлепраходчага комплексу з мілагучнай назвай «Алеся». Зараз шчыт працуе паміж станцыямі «Вакзальная» і «Юбілейная». Апошняя, дарэчы, стане самай глыбокай станцыяй мінскай падземкі — 27 метраў. Падземныя пешаходныя пераходы звяжуць яе са станцыяй «Фрунзенская». Будаўніцтва «Юбілейнай» пакуль на пачатковым этапе — распрацоўваюць грунт і ўмацоўваюць катлаван прадзевымі анкерамі.
— На майстраванне анкернага мацавання спатрэбіцца не менш за тры месяцы. Горна-геалагічныя ўмовы няпростыя. У тутэйшым грунце шмат валуноў дыяметрам больш за метр і буйнога галечніку, свідравыя работы ідуць вельмі напружана. Таму на тыя хуткасці, якія мы сабе першапачаткова ставілі, тут выйсці пакуль не атрымліваецца, — растлумачыў Сяргей Грэчкін.
Яшчэ адна складанасць — катлаван станцыі «Юбілейная» ўшчыльную прымыкае да жылых і адміністрацыйных будынкаў на вуліцах Кальварыйскай і Мельнікайтэ. Таму ўмовы работ вельмі абмежаваныя.
...Чарговы значны крок у будаўніцтве метро пройдзены — у тунэлі трэцяй лініі падземкі паміж станцыямi «Вакзальная» i «Юбілейная» зманціравана тысячнае кальцо. На фінішным этапе «Алесі» прыйдзецца «папацець»: трэба прарэзаць некалькі бетонных сцен у грунце. Затым у раёне станцыі «Юбілейная» «Алесю» дэмантуюць і перавязуць назад на станцыю «Вакзальная». Адтуль яна пачне пракладваць другі тунэль. Яго агульная даўжыня — 1620 метраў.
Тым часам у катлаване «Вакзальнай» поўным ходам ідуць падрыхтоўчыя работы для мантажу тунэлепраходчага механізаванага комплексу.
— «Вакзальная» — адна з самых складаных станцый, бо ў яе тры ўзроўні і перасадачны вузел з першай лініі на трэцюю. Пераходы будуць ажыццяўляцца па двум пешаходным тунэлям пад чыгуначнай станцыяй Мінск-Пасажырскі, — удакладніў Сяргей Грэчкін.
Зараз канструкцыі станцыі «Вакзальная» гатовы прыкладна на 70 працэнтаў. Платформавы ўчастак і блок службовых памяшканняў узведзены. Цвёрдую аснову для ўстаноўкі маналітных канструкцый пад травалатары для пераходу з «Вакзальнай» да станцыі «Плошча Леніна» забетаніравалі. Вядзецца актыўнае будаўніцтва наземнага вестыбюля. Ён стане галоўнай адметнасцю станцыі. Усе праектныя рашэнні для вестыбюля гатовыя, а будаўнічыя работы завершаць да канца года.
Паспяхова вядуцца будаўнічыя работы і на перасадачным вузле з трэцяй лініі на першую. Правы немеханізаваны шчыт ужо прайшоў першы тунэль пад чыгуначнымі пуцямі станцыі Мінск-Пасажырскі. Завяршыць праходку другога тунэля плануюць да чэрвеня. Затым прыступяць да мантажу перакрыццяў станцыі. Яшчэ адным немеханізаваным шчытом майструюць злучальны тунэль для цягнікоў паміж другой і трэцяй лініямі метро. На дадзеным этапе з 800 метраў пройдзена 550. Завершаць праходку арыенціровачна ў жніўні.
Комментарии (0)