Не адна сотня саламяных рулонаў раскінулася на ржышчы, дзе яшчэ нядаўна каласілася ніва ААТ «Жарабковічы». Але доўга пад адкрытым небам салома не ляжыць: трэба звезці ў сховішча – можа пайсці дождж.
– Наша «багатка» парадавала сёлета: 80 цэнтнераў атрымліваем з гектара. Але гэта далёка не мяжа для такога ўраджайнага сорту, – дзеліцца добрымі навінамі брыгадзір участка №1 сельгаспрадпрыемства Аляксей Навалачка. Пра тутэйшую глебу ведае ўсё: у Жарабковічах нарадзіўся, жыве, працуе больш за чвэрць стагоддзя. І памочнік яго, Максім Мурочак, таксама вопытны і тутэйшы. Аляксей Аляксеевіч з задавальненнем аглядвае скошаныя ўчасткі – якасна робяць сваю справу камбайнеры. Цяпер галоўнае, каб хоць яшчэ некалькі дзён абышлося без дажджу.
На гэтым полі працуюць 7 экіпажаў. Два з іх сталі першымі тысячнікамі не толькі ў ААТ, але і ў раёне. Старшы камбайнер Андрэй Дзянішчык і камбайнер Павел Булаты зусім крыху апярэдзілі сваіх калег Сяргея Бурака і Аляксандра Мікуліча. Ды і астатнія не надта адстаюць.
Першымі тысячную планку на адвозцы збожжа перасягнулі вадзіцелі. 28-гадовы Юрый Прышчэпа ўпэўнена адчувае сябе за рулём магутнага МАЗа, які за рэйс перавозіць 20 тон зерня. Колькі па маршруце «поле-элеватар» давялося яму праехаць, каб ад камбайнаў да зернесушыльнага комплексу даставіць 1683 тоны хлеба. Сёлетняе жніво для маладога вадзіцеля – пятае. Працуе адказна, уважліва. Дома ў Зарытаве ў Юрыя надзейны тыл, яго чакаюць з работы жонка і двое дзяцей.
6376 тон перавезенага збожжа на рахунку Аляксандра Грабёнкі, Аляксандра Сокала, Міхаіла Праневіча. З такім хлебным патокам, як у «Жарабковічах» адзін ЗСК, нават самы сучасны і магутны, наўрад ці справіўся б. Таму іх тры: у Падлессі, Сваятычах і Жарабковічах. Апошні хутчэй нагадвае зернегарадок, у складзе якога 3 сушылкі. Тут разгарнулася працоўнае спаборніцтва: лепшым дастойны быць ці не кожны аператар. А на момант журналісцкага дэсанта ў лідары выйшлі Аляксандр Бялецкі і Сяргей Таранда, якія перапрацавалі з пачатку жніва больш за 3400 тон зерня.
– Забяспечанасць у дастатковай колькасці і без збояў гаруча-змазачнымі матэрыяламі, запчасткамі, належная арганізацыя бытавых умоў і харчавання – без гэтых складнікаў жніво нельга правесці на высокім узроўні. Таму ўдзяляем ім павышаную ўвагу,– зазначае дырэктар таварыства Антон Булаты і дадае. – На механізатараў не магу нарадавацца: усе працуюць выдатна. Праблем з кадрамі няма.
1500 гектараў азімай пшаніцы, 719 – ячменю, (з якіх – 300 піваварнага), 327 – яравой пшаніцы шчодра аддзячваюць сёлета жарабковіцкіх аграрыяў. Намалочана 16379 тон зерня, 1360 тон прададзена ў лік дзяржзаказу. Калі ўсё будзе ісці па плане, то намалот-2017 у «Жарабковічах» пераўзыдзе леташні.
Кожны на сваім працоўным месцы стараецца наблізіць гэты вынік. Прафсаюзы не выключэнне. Як расказала старшыня пярвічнай прафсаюзнай арганізацыі ААТ «Жарабковічы» Людміла Мікуліч, прафкам сумесна з кіраўніцтвам таварыства распрацаваў умовы спаборніцтва на жніве, праводзяцца рэйды па арганізацыі аховы працы, захаванні правілаў тэхнікі бяспекі. Асаблівая ўвага – бытавым умовам. І тут у жарабковіцкіх рупліўцаў жніва нямала плюсаў. Двухразовае гарачае харчаванне не толькі смачнае і каларыйнае (нават падвячорак «даважаны» мясной стравай), але і зусім не б’е па механізатарскім кашальку – каштуе ўсяго… 10 капеек у дзень. Астатнія выдаткі за кошт гаспадаркі. Акрамя таго, на час уборкі штодзённа і бясплатна працуе лазня, якая, дарэчы, знаходзіцца побач з мехдваром: зручная акалічнасць.
Прафсаюзная пярвічка абяцала прэміі чытыром экіпажам і чатыром вадзіцелям, якія першымі намалоцяць і перавязуць 1000 тон зерня адпаведна.
– Арганізавана пачалі жніво ў «Жарабковічах». Арганізавана яно і працягваецца. Нават калі сцямнее, камбайны прадаўжаюць уборку з уключаным святлом фар, пакуль не з’явіцца раса.
Увогуле ўсе сельгаспрадпрыемствы раёна спрацавалі даволі паспяхова. Канешне, узнікаюць і пэўныя праблемы, але яны вырашаюцца па меры паступлення. Кіраўнікі сельгасарганізацый павінны аналізаваць іх і аператыўна прымаць правільнае рашэнне, – зазначыў старшыня райвыканкама Вячаслаў Сельмановіч, які вітаў першых тысячнікаў на ўрадлівых палях ААТ «Жарабковічы».
Фота Сяргея ВАРАНОВІЧА.
На фота: 1. Старшы камбайнер Сяргей Бурак і камбайнер Аляксандр Мікуліч. 2. Маладыя камбайнеры Іван Касміна і Юрый Дымар. 3.Экіпаж у складзе Мікалая Навуміка і Сяргея Пташука. 4. Вадзіцелі Аляксандр Сокал і Юрый Прышчэпа. 5. Брыгадзір Аляксей Навалачка і яго памочнік Максім Мурочак.
Комментарии (0)