Лідарам сярод дзелавых тэрыторый аказалася Мінская вобласць, дзе больш за ўсё індывідуальных прадпрымальнікаў (ІП) на 1 тысячу жыхароў, аднак больш за іншых у сярэднім зарабляюць «іпэшнікі» на Брэстчыне. Рэйтынг склала пляцоўка аб'яў «Куфар» на аснове афіцыйнай статыстыкі і ўласных даных.
Мінск лідзіруе з адрывам
Сталічная вобласць першынствуе па агульнай колькасці ІП і іх долі сярод насельніцтва. У самым прадпрымальным рэгіёне нават без уліку сталіцы налічваецца 26 індывідуальных прадпрымальнікаў на 1 тысячу жыхароў. Больш бізнесменаў толькі ў Мінску — каля 40 ІП на кожную тысячу гараджан.
Другое месца ў рэйтынгу займае Гродзенская вобласць, дзе на 1 тысячу жыхароў прыпадае каля 23 прадпрымальнікаў. Трэцяе месца з нязначным адставаннем займае Брэсцкі рэгіён. Развіваецца малы бізнес і ў Магілёўскай вобласці, у якой на сябе працуе звыш 2,1 % насельніцтва. За ёй ідзе Гомельскі рэгіён з 19 «іпэшнікамі» на 1 тысячу жыхароў. Найменш прадпрымальнай аказалася Віцебская вобласць: сваю справу тут адкрылі ўсяго 1,8 % насельніцтва.
Больш за 2 тысячы рублёў у месяц
Абсалютны максімум зарабляюць у Мінску, дзе абарот на аднаго прадпрымальніка ў сярэднім складае каля 2500 рублёў у месяц. За межамі сталіцы больш выгадна весці справы ў Брэсцкай вобласці, дзе бізнесмены ў сярэднім маюць каля 2300 рублёў. Другое месца сярод рэгіёнаў займае Гродзенская вобласць — з 2270 рублёў на кожнага «іпэшніка». Амаль на 70 рублёў менш атрымліваюць бізнесмены на Гомельшчыне. Радком ніжэй ідзе сталічны рэгіён, дзе выручка прадпрымальніка звычайна складае 2170 рублёў. Менш зарабляюць прадпрымальнікі ў Магілёўскай вобласці (2060 рублёў), а замыкае спіс Віцебскі рэгіён — тут ІП могуць разлічваць на абарот у 2030 рублёў у месяц.
Прадаваць і будаваць
Большасць «іпэшнікаў» у Беларусі займаюцца гандлем, будаўніцтвам і перавозкамі. У кожным рэгіёне ў гэтых сферах працуе больш за палову зарэгістраваных індывідуальных прадпрымальнікаў. Выключэнне складае толькі Мінск, дзе на другое месца пасля гандляроў выйшлі кансультанты, дызайнеры і фатографы.
У сярэднім па краіне кожны другі рубель беларускія прадпрымальнікі атрымліваюць ад сферы гандлю. Аднак кожны рэгіён мае свае асаблівасці. Так, прадпрымальнікі Мінскай вобласці больш за іншых зарабляюць на вытворчасці і будаўніцтве, Віцебскай — на сельскай гаспадарцы, а Брэсцкай — на медыцынскіх і сацыяльных паслугах. У Гомельскай вобласці як нідзе папулярныя паслугі часовага пражывання і харчавання.
Павінен стаць драйверам эканомікі
«Малы бізнес пачынае адыгрываць усё больш прыкметную ролю ў эканоміцы, займаючы нават тыя вобласці, якія традыцыйна былі прэрагатывай буйных кампаній. Гэта пазітыўна адбіваецца на развіцці рынку і эканомікі ў цэлым», — перакананы начальнік упраўлення маркетынгу і камерцыі «Куфара» Ілья Жукавец.
У той жа час, як адзначае эксперт, патэнцыял сегмента малога бізнесу значна вышэйшы: у паспяховых краінах менавіта ён з'яўляецца драйверам эканомікі. Паспяхова развівацца беларускім прадпрымальнікам перашкаджаюць неразуменне заканадаўства, адсутнасць стратэгічнага планавання і недастатковае веданне сферы анлайн-гандлю. Сітуацыю могуць палепшыць адукацыйныя ініцыятывы, закліканыя дапамагчы прадпрымальнікам-пачаткоўцам разабрацца ў сферы электроннай камерцыі.
«Толькі ў мінулым годзе беларусы патрацілі на анлайн-шопінг каля 360 млн долараў. Каб захаваць бізнес, прадпрымальнікі выходзяць у анлайн услед за спажыўцамі. Мы бачым гэта і па тым, як актыўна падключаюцца анлайн-вітрыны на нашай пляцоўцы, што дапамагае ўсім ахвотным адаптаваць свой бізнес да рэалій лічбавай эканомікі», — падкрэсліў эксперт.
Стала больш бізнес-лэдзі
Яшчэ адной тэндэнцыяй стаў рост колькасці жанчын сярод ІП. Усё больш дзяўчат хочуць адкрыць уласную справу замест таго, каб працаваць на кампанію. «Актыўнасць жанчын у бізнесе ўзрастае, і мы бачым гэта па тым, як актыўна дзяўчаты ўдзельнічаюць у адукацыйных мерапрыемствах», — адзначыў прадстаўнік пляцоўкі.
Усё больш прадпрымальнікаў сталі ствараць стартапы. Атрымліваюць развіццё і новыя формы фінансавання бізнесу, такія як краўдфандынг. «Беларускія прадпрымальнікі, асабліва моладзь, вывучаюць заходнія тэндэнцыі і імкнуцца глядзець у будучыню. Усе разумеюць: весці бізнес «па-старому» ўжо неэфектыўна: калі не перабудуецца, можна страціць сваю долю рынку», — растлумачыў Ілья Жукавец.
Комментарии (0)