Дарэчы, пра гэта ж у тым ці іншым кантэксце гаварылі і грамадзяне, што прыйшлі на прыём да міністра інфармацыі. Так, старшыня раённага савета ветэранаў Э.С. Дзікевіч падкрэсліў цеснае супрацоўніцтва з раённай газетай, высокі ўзровень асвятлення патрыятычнай тэматыкі на старонках «Дзянніцы», цеплыню нарысаў і замалёвак аб лёсах людзей, што здабылі для нас Вялікую Перамогу.
Аднак галоўная мэта сустрэчы Эдмунда Станіслававіча з міністрам інфармацыі Рэспублікі Беларусь заключалася ў тым, каб перадаць праз члена Ураду словы вялікай удзячнасці Прэзідэнту краіны Аляксандру Рыгоравічу Лукашэнку за вялікі клопат аб ветэранах вайны. Менавіта такое даручэнне атрымаў Э.С. Дзікевіч ад сваіх падапечных, што прайшлі нялёгкімі дарогамі Вялікай Айчыннай.
– Ні ў адной просьбе не было адмоўлена нашым ветэранам, – сказаў Эдмунд Станіслававіч. – І раённая ўлада, і кіраўнікі гаспадарак ды сельвыканкамаў на месцах надзвычай уважліва адносяцца да прадстаўнікоў старэйшага пакалення. Ветэранам аказваюць дапамогу ў апрацоўцы падсобных участкаў, вырашэнні бытавых пытанняў, на высокім узроўні медыцынскае абслугоўванне ўдзельнікаў вайны. Усё гэта – дзякуючы мэтанакіраванай палітыцы, якую праводзіць наш Прэзідэнт.
Л.С. Ананіч падзякавала наведвальніку за такія словы. – Так, гэтыя людзі не толькі адваявалі свабоду і мірнае неба для сваіх нашчадкаў, але і пасля вайны былі стрыжнем эканомікі, аднаўлялі з руін краіну. Мой тата таксама быў партызанам, інвалідам Вялікай Айчыннай вайны і таксама ганарыўся б сёння той палітыкай дзяржавы, што накіравана на клопат аб ветэранах.
Лілія Станіславаўна падкрэсліла, што тэма гераізму нашага народа не павінна сыходзіць са старонак газет, ёй пастаянна гучаць у эфіры, незалежна ад юбілеяў і знакавых дат. – Наша задача на прыкладзе старэйшага пакалення выхаваць дастойную моладзь і нікому не дазволіць забраць у нас нашу Перамогу. Я як член Урада абяцаю, што ўзятага курсу краіна будзе і далей трымацца. А ветэраны заўжды будуць адчуваць нашы ўвагу і клопат, будуць мець усе падставы ганарыцца сваёй дзяржавай і новымі пакаленнямі. Міністр пажадала здароўя і даўгалецця нашым ветэранам.
Падзяліцца сваімі думкамі і развагамі наконт публікацый у сучасных СМІ прыйшоў і жыхар Шчучына Віктар Мікітавіч Гардзееў. Ён упэўнены, што ў прэсе павінна быць больш дыскусій, неабходна прынцыпова даваць адпор тым, хто раскалыхвае стабільнасць у краіне, замахваецца на святыя традыцыі нашага народа.
Міністр пагадзілася, што сёння, асабліва ў сацыяльных сетках, хапае жадаючых пасеяць у свядомасці маладога пакалення дэструктыўны настрой. Змены ў Законе аб СМІ дазволілі рэгуляваць інтэрнэт-прастору. А ў хуткім часе ўладальнікам сайтаў давядзецца несці адказнасць і за тыя абразлівыя каментарыі, што сустракаюцца на форумах іх рэсурсаў. З гэтай мэтай падрыхтаваны змяненні ва Указ №60 «Аб мерах па ўдасканаленні выкарыстання нацыянальнага сегмента сеткі Інтэрнэт».
Жыхар вёскі Баяры Іван Вацлававіч Пятрашка скарыстаўся магчымасцю пагутарыць з міністрам падчас «прамой лініі». Яго цікавіла, чаму на беларускіх каналах адсутнічае тэлеінфармацыя аб праграме тэлебачання. Дзякуючы пераходу на лічбавае ТБ і новым тэхналогіям гэта паслуга, здавалася б, павінна стаць даступнай. Л.С. Ананіч паабяцала разабрацца ў гэтым пытанні і асабіста даць адказ.Падводзячы вынікі сустрэчы ў Шчучынскім райвыканкаме, на якой прысутнічалі кіраўнік раёна С.В. Ложэчнік, начальнік галоўнага ўпраўлення ідэалагічнай работы, культуры і па справах моладзі Гродзенскага аблвыканкама П.К. Скрабко, яго намеснік В.А. Апановіч, кіраўнікі некаторых службаў райвыканкама, Л.С. Ананіч зазначыла, што такая прамая сувязь прадстаўнікоў улады з насельніцтвам – унікальная практыка нашай рэспублікі.
Урэшце рэшт не толькі аператыўна вырашаюцца вострыя праблемы людзей, але і для ўлады карысна ўвачавідкі ўбачыць яшчэ адзін сацыяльны зрэз. Важна, што людзі з дапамогай прыёмаў грамадзян і «прамых ліній» (а такая работа вядзецца па ўсёй краіне сістэматычна) атрымалі дадатковы канал вырашэння злабадзённых пытанняў. Лілія Станіславаўна Ананіч пацікавілася ў кіраўніка раёна і тым, як ідзе падрыхтоўка да Дня беларускага пісьменства. У гэты ж дзень члены творчай групы па падрыхтоўцы і правядзенні грандыёзнага свята роднага слова пабывалі ў нашым горадзе, аб чым чытайце на 3-яй старонцы «Дзянніцы».
Комментарии (0)