Дзелавы і культурны комплекс Пасольства Беларусі ў Маскве становіцца гасціннай пляцоўкай для супрацоўніцтва розных дыяспар
За савецкім часам нямала гаварылі пра даўнюю крэўную роднасць беларусаў, рускіх ды ўкраінцаў. Яно і зразумела: ніхто не будзе адмаўляць, што ў жыцці трох брацкіх народаў і да гэтага часу адчуваецца ўплыў духоўных каштоўнасцей са славянскай даўніны. І святкаванне старажытнага Купалля, ці Івана Купалы, — сведчанне нашай духоўнай роднасці. Таму і вельмі сімвалічна, што ў Расіі такое славянскае адзінства ўмацоўваецца, прычым якраз у светлую, насычаную пазітыўнай энергіяй Купальскую пару. “Дыяспары Беларусі, Расіі ды Украіны падпісалі ў Маскве дамову аб супрацоўнiцтве,” — пра тое паведаміла прэс-служба Пасольства Беларусі ў Расіі.
Цырымонія падпісання дагавораў аб супрацоўніцтве прайшла 16 чэрвеня ў Пасольстве Беларусі ў Расіі — у Дзелавым і культурным комплексе пасольства Беларусі ў Маскве. І гэта дае падставы меркаваць: менавіта беларусы Расіі выступілі з важнай, міратворчай па духу ініцыятывай. У той дзень грамадская арганізацыя “Федэральная нацыянальна-культурная аўтаномія беларусаў Расіі” (ФНКА) падпісала дамовы з агульнарасійскай грамадскай арганізацыяй “Асамблея народаў Расіі”, а таксама з Саветам зямляцтваў Украіны. “Пагадненні прадугледжваюць ажыццяўленне супрацоўніцтва ў сферы забеспячэння міжэтнічнай і міжканфесійнай згоды, пашырэнне агульнаграмадзянскіх каштоўнасцей і наладжванне міжкультурнага дыялогу”, — гаворыцца ў паведамленні. Усе тры бакі зацікаўлены ў актывізацыі ўзаемадзеяння на карысць умацавання этнакультурных сувязяў, пашырэння кантактаў паміж суполкамі грамадзян. У планах — супольная арганізацыя культурна-асветніцкіх імпрэз, садзейнічанне ўсталяванню міжнацыянальнага міру і згоды.
У цырымоніі падпісання дакументаў удзельнічалі старшыня Савета Асамблеі народаў Расіі Святлана Смірнова, старшыня Савета ФНКА беларусаў Расіі Сяргей Кандыбовіч, старшыня Праўлення Савета зямляцтваў Украіны ў Маскве Мікалай Лях. У зале былі сярод іншых члены Савета ФНКА беларусаў Расіі арцыбіскуп Віцебскі і Аршанскі Дзмітрый і народная артыстка Расіі Ларыса Трухіна. Святлана Смірнова адзначыла: арганізацыі ўжо даўно супрацоўнічаюць. Сяргей Кандыбовіч падзякаваў беларускаму кіраўніцтву за стварэнне Дзелавога і культурнага комплексу Пасольства Беларусі ў Маскве — гасціннай пляцоўкі для рэалізацыі новых праектаў розных дыяспар.
Іван Іванаў
Комментарии (0)