Па традыцыі 23 лютага на святочны мітынг ля брацкай магілы ў Шчучыне сабраліся кіраўнікі раёна, ветэраны, прадстаўнікі працоўных калектываў, школьнікі. Да ўдзельнікаў мерапрыемства звярнуўся ваенны камісар Шчучынскага раёна Аляксандр Генадзьевіч Гайдук: – У нашай краіне Дзень абаронцаў Айчыны і Узброеных Сіл Рэспублікі Беларусь ужо многія дзесяцігоддзі адзначаецца як усенароднае свята. З пакалення ў пакаленне перадаецца глыбокая павага да тых, хто пад дзяржаўным сцягам стойка і мужна абараняў свабоду і незалежнасць краіны. Сёлета адзначаецца 70-годдзе Перамогі ў Вялікай Айчыннай вайне. У тыя цяжкія гады дзясяткі тысяч жыхароў Гродзеншчыны адважна змагаліся на франтах, працавалі ў прамысловасці і сельскай гаспадарцы, каб забяспечыць армію ўсім неабходным. Праз многія іспыты давялося прайсці беларускім ваенным і ў мірны для нашай краіны час: яны выконвалі інтэрнацыянальны абавязак у іншых краінах.На працягу 97 год Узброеныя Сілы стаяць на варце спакою і стабільнасці ў грамадстве. Умацаванне бяспекі Беларусі, упэўненае яе развіццё, аўтарытэт на міжнароднай арэне ў многім залежаць ад боегатоўнасці арміі, ад прафесіяналізму салдат і афіцэраў. Сёння можна з упэўненасцю заявіць, што ў нашай краіне створана кампактная мабільная армія, якая можа дзейнічаць як у мірны, так і ў ваенны час.А.Г. Гайдук павіншаваў усіх са святам і адрасаваў самыя добрыя пажаданні ваенным, а таксама іх родным і блізкім. Традыцыі нашых дзядоў і прадзедаў прадстаіць працягваць маладому пакаленню. Ад імя моладзі да ўдзельнікаў мітынгу звярнуўся інспектар інспекцыі нагляду і прафілактыкі Шчучынскага РАНС Вячаслаў Мікалаевіч Міселя. Ён падкрэсліў, што абаронцы нашай Айчыны заўсёды вызначаліся сілай духу і самаадданым служэннем сваёй краіне, гераізмам і воляй да перамогі. Іх подзвігі – школа сапраўднай мужнасці і патрыятызму, прыклад для маладога пакалення. У год 70-годдзя Перамогі асаблівай павагі заслугоўваюць ветэраны вайны. Ад імя моладзі В.М. Міселя паабяцаў быць дастойнымі прадаўжальнікамі герояў Вялікай Айчыннай, з гонарам выконваць свой воінскі абавязак. У гэты святочны дзень немагчыма не ўспомніць тых, хто загінуў, абараняючы ад ворагаў сваю Радзіму, выконваючы інтэрнацыянальны абавязак. Іх імёны высечаны на помніках, абелісках і мемарыяльных дошках. Загінуўшыя героі – у нашых сэрцах, у нашых душах, у нашых успамінах… Гэта ім прысвячалася песня «Алёша», якая прагучала ў выкананні Ігара і Галіны Будзько. Гэта ім прызначаліся вянкі і жывыя кветкі, якія ляглі да падножжа помніка… Гэта ў іх гонар прагучаў салют... Удзельнікаў мерапрыемства шчыра віталі выхаванцы гуртка эстрадных спеваў раённага Дома культуры «Асарці», якія выканалі песню пра армію. Музычным падарункам для сённяшніх абаронцаў Айчыны і ўсіх мужчын стала песня ў выкананні Ірыны і Марыны Козіч.
Ганна РУДСКАЯ. Фота аўтара.
Комментарии (0)