Раніцай у нядзелю гарадская плошча Свабоды была літаральна расквечана светлымі ўсмешкамі, сцяжкамі і шарамі, што трымалі ў руках пасвяточнаму апранутыя людзі з яблыневай квеценню і чырвона-зялёнымі стужкамі на грудзях. Прыўзняты настрой перадаваўся, нібы эстафета. Прадстаўнікі вытворчых калектываў, ветэраны, працоўная моладзь і школьнікі сабраліся на ўрачыстасць з нагоды Дня Дзяржаўнага герба і Дзяржаўнага сцяга Рэспублікі Беларусь.
Шчучынцаў ад душы павіншаваў у сваёй прамове старшыня раённага выканаўчага камітэта Сяргей Васільевіч Ложэчнік і зазначыў:
— Сімвалічна, што 20-годдзе свята дзяржаўнай сімволікі супадае са слаўным юбілеем Перамогі савецкага народа ў Вялікай Айчыннай вайне. Нашы галоўныя нацыянальныя сімвалы зоймуць сваё пачэснае месца пры правядзенні ўрачыстасцей, прысвечаных Году моладзі і Дню беларускага пісьменства, які пройдзе 6 верасня ў нашым райцэнтры.
Сяргей Васільевіч падкрэсліў, што сёння дзяржаўныя сімвалы краіны кансалідуюць беларускае грамадства. Бо ўсе нашы перамогі навукоўцаў і спартсменаў, дзеячаў культуры і мастацтва, што дастойна прадстаўляюць Беларусь на міжнародным узроўні, дасягаюцца пад нашым сцягам. І гэта яшчэ раз даказвае права беларусаў на пачэснае месца ў сусветнай супольнасці, на ўласны шлях развіцця рэспублікі.
Кіраўнік раёна назваў прозвішчы людзей, якім было прадастаўлена ганаровае права ўзняць Дзяржаўны сцяг краіны. Старшыня раённага савета ветэранаў Эдмунд Станіслававіч Дзікевіч, прызёр рэспубліканскай алімпіяды па працоўным навучанні, вучаніца трэцяй гарадской школы Ганна Маркевіч і пераможца этапу Кубка Свету па ракетамадэльным спорце, выхаванец цэнтра тэхнічнай творчасці Максім Пянькоўскі з хваляваннем узнялі ў майскую сінь трапяткое палотнішча, у якім беражліва захаваны асаблівасці нашага нацыянальнага каларыту.
Ад імя маладога пакалення запэўніла ў вернасці лепшым традыцыям бацькоў і дзядоў першы сакратар райкама грамадскага аб’яднання «Беларускі рэспубліканскі саюз моладзі» Алена Богдзель.
— Зараз мы ўдзельнічаем у рэспубліканскай патрыятычнай акцыі «Квітней, Беларусь!» і вельмі хочацца, каб у яе рамках самыя актыўныя юнакі і дзяўчаты менавіта сёння атрымалі пашпарты і членскія білеты БРСМ.
Гэтыя важнейшыя дакументы юным грамадзянам уручыў С.В. Ложэчнік. А потым удзельнікі свята сталі сведкамі сапраўднага спартыўнага шоу. Высокі клас і майстэрства прадэманстравалі таэквандысты цэнтра творчасці дзяцей і моладзі, якія неаднойчы выходзілі ў пераможцы і прызёры міжнародных, рэспубліканскіх і абласных спаборніцтваў. Нямала дастойных перамог і на рахунку футбалістаў ды гандбалістаў ДЮСШ, якія пад апладысменты публікі паказалі віртуознае валоданне мячом. А ляшчанкаўскія школьнікі-чэрлідынгісты ў чарговы раз здзівілі арыгінальнымі акрабатычнымі нумарамі і сучаснымі спартыўнымі танцамі. Прадстаўнікі РАНС, чаканячы крок, ганарова пранеслі па плошчы дзяржаўны герб, а выхаванцы праваслаўнага ваенна-патрыятычнага клуба «Дружына» – вялікае палотнішча сцяга Рэспублікі Беларусь. Гэта было вельмі прыгожа, відовішчна і выклікала мноства эмоцый – ад пачуцця гонару за краіну да шчырага захаплення нашымі таленавітымі землякамі, сапраўднымі патрыётамі сваёй Айчыны. Свята працягваў канцэрт ваеннага духавога аркестра лідскіх пагранічнікаў (дырыжор Іван Бянкевіч). А вечарам на плошчы Свабоды шчучынцаў чакала яшчэ адна цікавая канцэртная праграма, таксама падрыхтаваная лідчанамі. Аматары ж спартыўных баталій маглі заўзята пахварэць за футбалістаў на пляцоўцы па вуліцы Астроўскага, дзе праходзіла першынство раёна сярод каманд сельсаветаў.
…Наколькі ж цудоўная традыцыя – ушаноўваць свой герб і сцяг, выбраныя два дзесяцігоддзі назад волей народа падчас рэферэндуму! Гледзячы на дзяржаўныя сімвалы, мабыць, кожны з нас адчувае сябе неад’емнай часцінкай адзінай вялікай сям’і, імя якой – беларускі народ.
Комментарии (0)