На мінулым тыдні мінчане маглі ўспомніць пра гастранамічныя традыцыі нашых продкаў і замест ужо звыклых для многіх ролаў, піцы ці, скажам, гамбургераў, пакаштаваць у сталічных кавярнях традыцыйныя беларускія стравы. Ужо ў сёмы раз з ініцыятывы Галоўнага ўпраўлення спажывецкага рынку Мінгарвыканкама аб'екты грамадскага харчавання горада бралі ўдзел у Тыдні беларускай кухні.
Кажуць, у Беларусі няма рэстараннай крытыкі. Можа, і так, але ж густ у першую чаргу — справа вопыту. Ды і як можа быць інакш, калі маеш дзвюх бабуль у вёсцы? З дзяцінства маімі штодзённымі «ахвярамі» былі калдуны, «пальцам піханая» каўбаса і шкрылі (так на Краснапольшчыне называюць смажаную дробна нарэзаную бульбу).
На гэты раз аб'екты грамадскага харчавання прапанавалі наступнае меню: закуску з курыцы з вяндлінай і зялёным гарошкам за 50 тысяч рублёў, халаднік са шчаўя за 25 тыс., рыбу на таплёным масле з запечанай бульбай за 70 тыс., калдуны з мясам за 50 тыс., тварожныя хрушчы з мёдам за 35 тыс. і морс з журавін за 10 тысяч рублёў. Здаецца, выбіраць ёсць з чаго, ды і кошты прымальныя. Таму на абед у першы дзень накіроўваюся ў кавярню пры адным з футбольных клубаў сталіцы, якая на сайце Мінгарвыканкама значыцца ў спісе тых, што далучыліся да правядзення Тыдня беларускай кухні.
Непадалёк — рэстаран пры сетцы прадуктовых крамаў. Знясілены ад голаду і спёкі, заглядваю унутр — юных футбалістаў няма. Уздыхаю з палёгкай. Няма, дарэчы, увогуле нікога — у абсалютна пустой зале толькі афіцыянтка і бармен. На дзвярах заўважаю невялікую аб'яўку пра Тыдзень беларускай кухні. Прыносяць звычайнае абедзеннае меню — супы і салаты. «Скажыце, а што-небудзь з беларускіх страў у вас ёсць?» — пытаюся. «Так, у нас якраз Тыдзень беларускай кухні, паказаць меню?» — неяк здзіўлена кажа афіцыянтка. Дзяўчына сыходзіць, а я разважаю: ці вялікая верагоднасць таго, што чалавек, які не чуў пра гэты тыдзень, заўважыў бы дробную аб'яву на дзвярах і што-небудзь пакаштаваў?
Пачаць вырашаю з праграмы мінімум: на вуліцы прыпякае, а таму лепшай за халаднік стравы не прыдумаць. Ну, а вітамінны баланс папоўніць морсам з журавін. Чакаць даводзіцца нядоўга, хвілін дзесяць. За гэты час разглядаю залу рэстарана — усё аформлена ў традыцыях беларускай арыстакратыі. На вокнах — вітражы з выявамі замкаў: Нясвіжскага, Любчанскага… Узгадваюцца радкі песні аднаго з беларускіх гуртоў пра тое, што кожны хоча пажыць у палацы і пачаставацца мёдам з крупнікам. Што ж, за антураж можна паставіць цвёрдую «пяцёрку». Як яно будзе далей?
Здзіўляюся, калі бачу перад сабой адразу дзве талеркі. У першай — галоўны герой абеду, халаднік, на другой — тры вараныя бульбіны сярэдняга памеру. Стравы апраўдваюць надзеі — усё вельмі смачна. Халаднік, безумоўна, не бабулін (ды і наўрад ці хтосьці дацягнецца да такога ўзроўню), але зроблены як мае быць — патрэбнай тэмпературы і густаты, з прыемнай кіслінкай. Тое самае можна сказаць і пра морс: ёсць трошкі мякаці, не надта салодкі. На развітанне пытаюся ў афіцыянткі, ці карыстаецца новае меню папулярнасцю. Дзяўчына кажа, што я — трэці кліент за дзень, які замаўляў беларускія стравы. «Нічога дзіўнага, калі гэтак іх хаваць», — заўважаю сам сабе і шпацырую дадому.
Другі дзень — ранішняя экспедыцыя ў кавярню ў адным з буйных гандлёвых цэнтраў. На дзвярах сустракае такая ж аб'ява, але з меню праблем няма — першая ж яго старонка, аздобленая беларускім арнаментам, адразу паведамляе наведнікам пра Тыдзень нацыянальнай кухні. «Гэта нашы новыя стравы, пакаштуйце, — афіцыянтка заўважае, што я разглядаю. — Усе вельмі смачнае, мы самі гатуем». Прашу прынесці калдуны і морс для параўнання з папярэднім паходам.
Чакаю даўжэй — з паўгадзіны. Заспакойваю сябе думкай, што страву сапраўды гатуюць, а не разаграваюць у мікрахвалёўцы. Нарэшце «спатканне» адбываецца — я і тры велізарныя калдуны са смятанным соусам. Выглядае ўсё, безумоўна, апетытна: бульбяныя прыгажуны на лісце салаты, бялюткая фігурная талерка… Але адчуваецца ў гэтым нейкая недарэчнасць. Вось і морс прыносяць у элегантным бакале з «саломінкай». Чаму б яшчэ дольку якога-небудзь цытруса на край не прычапіць?..
Да смаку ж прэтэнзій няма — калдуны сапраўды быццам бы толькі з патэльні. Памер порцыі ашчаслівіў нават такога аматара наядацца «пад завязку», як я. Морс уразіў сваім адрозненнем ад учарашняга варыянту: у ім амаль не было мякаці і, як па мне, не хапала цукру. Але агулам — залічана.
У апошняй з кавярняў, якая належыць буйной сетцы грамадскага харчавання, вырашаю: «Гуляць — дык гуляць!» Замаўляю закуску з курыцы з вяндлінай, хрушчы з мёдам і зноў «кантрольны» морс. Дарэчы, тут падыход да анансавання Тыдня беларускай кухні іншы — у асноўным спісе новых страў няма, але на кожным століку стаіць асобнае прыгожа аформленае меню. Фонавы здымак, відавочна, падбіралі спехам — знешнасць і адзенне дзяўчыны мала чым нагадваюць беларускае, а на стале — посуд, распісаны пад «хахламу».
Але хутка прыбывае і курыца з вяндлінай. Ізноў уражваюць памеры порцыі — усё вельмі шчодра. Смажаная з гароднінай вяндліна падаецца з лістамі салаты, курынае філе хаваецца пад колцамі цыбулі. Пасля ўжывання порцыі па прызначэнні з'яўляюцца сумневы наконт таго, ці адолею я яшчэ і хрушчы. Сапраўды, напрыканцы давялося паднапружыцца — апошнія пяць кавалкаў «упіраліся і не здаваліся». Але з іншага боку душыла зялёная пачвара з беларускіх балот, таму з хрушчамі праз некалькі хвілін было скончана. З морсам, дарэчы, гісторыя паўтарылася — новы бакал, новы смак...
Яраслаў ЛЫСКАВЕЦ.
Фота аўтара і Сяргея НІКАНОВІЧА.
Слова ў падтрымку
А як ставяцца да Тыдня беларускай кухні самі супрацоўнікі аб'ектаў грамадскага харчавання? Каментуе намеснік генеральнага дырэктара адкрытага акцыянернага таварыства «ЦУМ Мінск» Святлана ГУД:
— Я лічу, што такія мерапрыемствы можа было б праводзіць нават часцей. У нашай кавярні «Алімп» кожны чацвер праводзяцца свае дні беларускай кухні з уласным меню, і яны карыстаюцца вялікім попытам. Ёсць нават кліенты, якія спецыяльна прыходзяць да нас па чацвяргах. На гэтым тыдні ў нас таксама было шмат зацікаўленых нацыянальнымі стравамі. Каштуюць усё, нельга сказаць, што перавагу аддаюць толькі дранікам ці яшчэ чаму-небудзь. Нам трэба папулярызаваць сваё, у тым ліку і сваю кухню. А таму асабіста я стаўлюся да ідэі правядзення такіх тыдняў станоўча.
Комментарии (0)