Талачын зараз радуе вока абноўленымі будынкамі, элементамі ландшафтнага дызайну, дарогамі і тратуарамі, святлафорамі, рухацца па ім стала прыемна і пешаходам, і аўтамабілістам. Прагульваючыся, мы ўжо не ўзіраемся з асцярогаю пад ногі, выбіраючы, куды ступіць, а сузіраем прыгажосць наваколля. Кідаецца ў вочы здалёк і прываблівае дзяцей яркімі фарбамі новая гульнявая пляцоўка ў скверы. А тыя забаўляльныя прыстасаванні, якія размяшчаліся тут раней (горка і каруселі з фігурамі звяроў) дэманціраваны і ўстаноўлены на газоне паміж РАУС, рынкам і манастыром. Такім чынам, цяпер у горадзе ўжо дзве зоны адпачынку для бацькоў з маленькімі дзецьмі.
Афарбоўка адрамантаваных фасадаў будынкаў, пераважна ў адценнях жоўтых і ружовых колераў, падкрэслівае цэласнасць, адзінства стылю горада, а таксама робіць вуліцы светлымі і дадае прахожым аптымістычнага настрою.
Прыемна, што змены закранулі не толькі цэнтр. Так, новыя тратуары і гульнявое абсталяванне для дзяцей з'явіліся на прыдамавых тэрыторыях на вуліцы Леніна ў раёне РАНС, на Астроўскага каля бальніцы і ў іншых месцах.
Словам, Талачын сапраўды папрыгажэў і стаў больш утульным і прывабным.
Комментарии (0)