Вераніка Негрыенка – настаўнік-дэфектолаг, Аксана Снацкая – педагог-арганізатар. Сёлета дзяўчаты прыйшлі на працу ў Ражанкаўскі дз/с-СШ, дзе і пазнаёміліся. На сустрэчу маладых спецыялістаў прыехалі з задавальненнем: перакананы, што гэта цудоўная магчымасць бліжэй пазнаёміцца з раёнам, абмяняцца вопытам з калегамі і сустрэцца з цікавымі людзьмі. Для моладзі ў фае РДК працавалі выставы мастакоў Шчучыншчыны і Гродзеншчыны, свае паслугі прапаноўвалі супрацоўнікі раённага вузла паштовай сувязі. Тут можна было падпісацца на раёнку і іншыя перыядычныя выданні. Сустрэча моладзі праходзіла ў форме адкрытых дэбатаў “Выбірай.by”. Удзел у пленарнай частцы прынялі старшыня Шчучынскага райвыканкама С.В. Ложэчнік, яго намеснікі Г.С. Хвядзюк, Г.Б. Хоміч і Я.Б. Майсей, а таксама старшыня раённага аб’яднання прафсаюзаў Ю.Т. Пашук і першы сакратар РК БРСМ А.С. Богдзель. Падчас адкрытых дэбатаў маладыя людзі мелі магчымасць атрымаць адказы на ўсе хвалюючыя пытанні. Напрыклад, даведаліся, якія льготы прадугледжаны для маладых спецыялістаў, якімі крэдытамі могуць скарыстацца людзі ва ўзросце да 31 года, як аформіць дакументы на паляпшэнне жыллёвых умоў і пра многае іншае. Ад моладзі кіраўніцтва раёна чакае плённага супрацоўніцтва і стваральнай працы на карысць грамадства. Юнакам і дзяўчатам ёсць з каго браць прыклад. Старшыня Шчучынскага райвыканкама С.В. Ложэчнік і старшыня раённага аб’яднання прафсаюзаў Ю.Т. Пашук запрасілі на сцэну для ўшанавання працоўныя дынастыі. Цэлыя пакаленні прафесіяналаў – наш залаты фонд. Гэта людзі, вартыя шчырай павагі і прызнання за сваю адданасць справе. Словы ўдзячнасці гучалі са сцэны ў адрас педагагічнай дынастыі Груца-Марчукевіч (агульны працоўны “стаж” іх сям’і – 153 гады). Плённа працуе на сельскагаспадарчай ніве ў ААТ “Васілішкі” дынастыя Вашчыла-Дубінец (агульны “стаж” – звыш 125 гадоў). Каля 85 гадоў прысвяціла лясгасу дынастыя Варабей-Зялёнка. Добра вядома ў раёне і сямейная дынастыя ўрачоў Батура-Глаз-Бязмен. Іх працоўны “стаж” – 164 гады! На заводзе “Аўтапровад” таксама ёсць кім ганарыцца. Тут на працягу 80 гадоў шчыруе дынастыя Бекіш. Прадстаўнікам слаўных дынастый былі ўручаны падарункі.З задавальненнем маладыя спецыялісты далучыліся да акцыі “Мы – разам!”, якая стартавала ў канцы чэрвеня і працягвае свой тур па гарадах Беларусі. У рамках гэтай акцыі адбыўся канцэрт фіналістаў маладзёжнага вакальнага конкурсу ФПБ “Новыя галасы для любімай краіны” і ўжо вядомых зорак беларускай эстрады. Моладзь спявала разам з дуэтам “Аляксандра і Канстанцін”, Вікторыяй Алешка, Сашам Нэма, ансамблем “Бацька-атаман”. Парадаваў сваімі танцавальнымі нумарамі шоу-балет “Тэкіла”. Для самых адданых сваіх слухачоў выканаўцы падрыхтавалі сюрпрызы-сувеніры: сімвалы акцыі – белых буслоў. – Я ўпершыню прымаю ўдзел у такой сустрэчы, – гаворыць мастак-афарміцель цэнтральнай раённай бібліятэкі імя Цёткі Яўген Маскевіч. – Прыемна бачыць на шчучынскай сцэне нашых вядомых беларускіх артыстаў. Тым больш прыемна было атрымаць бусліка з рук салісткі ансамбля “Бацька-атаман”. Думаю, такія сустрэчы аб’ядноўваюць моладзь, даюць магчымасць заявіць пра сябе.Дарэчы, на працягу года сустрэчы маладых спецыялістаў з кіраўніцтвам раёна традыцыйна пройдуць і па месцах іх працы.
Комментарии (0)