Ужо традыцыйна не менш як раз на год «Звязда» праводзіць канcультацыі па зямельных пытаннях і сферы нерухомай маёмасці з кіраўнікамі органаў кіравання вышэйшага рангу. На гэты раз на «прамую лінію» да старшыні Дзяржаўнага камітэта па маёмасці Андрэя Гаева дазванілwіся каля двух дзясяткаў нашых чытачоў. Андрэй Анатольевіч імкнуўся зразумела адказаць на жыццёвыя пытанні (а камусьці і нешта параіць) усіх нашых падпісчыкаў. Прапануем вашай увазе самыя актуальныя тэмы гэтай размовы.
Супраць незразумелай ацэнкі існуе экспертыза
Людміла Іосіфаўна, горад Мінск:
— Як падлічваецца кошт прыватнага жылля пры яго зносе? У нашым выпадку ацэншчыкі паведамілі, што ацэньваюць кватэры «па сярэднім». А нам гэта незразумела. Калі жыллё прадаецца на рынку, то там улічваецца і раён, і вышыня столяў. У нас кватэра — «сталінка» ў Цэнтральным раёне сталіцы. Вышыня столі ў кватэры нестандартная. Няўжо пры зносе гэта не мае значэння?
— У гэтым выпадку дзейнічае пастанова ўрада, якая вызначае патрабаванні па ажыццяўленні ацэнкі, але ўвогуле ацэнка такой маёмасці робіцца без уліку фактараў зносу, а з улікам агульных фактараў па правядзенні ацэнкі. Нейкіх выключэнняў тут не існуе. Таму вам неабходна патрабаваць ад адказных асоб, каб яны растлумачылі — якія канкрэтныя нормы і нарматывы выкарыстоўваюцца пры гэтай ацэнцы.
— Кажуць, што ацэньваюць па сярэднім па горадзе, і ўсё…
— Не, такое тлумачэнне не задавальняе. Незразумела, што за сярэдняя ацэнка. Ацэнка ажыццяўляецца індывідуальна. Павінен улічвацца і раён аб’екта, і яго цяперашні стан, і шэраг іншых фактараў.
— Наўзамен сваіх кватэр нам цяпер прапануюць жыллё ў доме 1960-х гадоў па вуліцы Каліноўскага, дзе ў памяшканнях звычайныя стандартныя столі і кухні плошчай да 5 квадратных метраў. Лічым, што гэта не зусім справядліва.
— Пры прадастаўленні новага жылля плошча кватэр у доме пад знос улічваецца, але яна не павінна быць меншая за адпаведны нарматыў на чалавека.
Акрамя таго, у гэтым выпадку бярэцца пад увагу і кошт кватэры, што даецца ўзамен, і той, якая забіраецца пад дзяржаўныя патрэбы. У тым выпадку, калі кошт так званай новай кватэры будзе меншым за кошт аб’екта ў доме пад знос, тады новаму ўласніку павінны заплаціць розніцу. Цяпер вам застаецца толькі сачыць за якасцю праведзенных разлікаў па гэтых коштах.
— А калі мы не згодны з іх ацэнкай?
— У гэтым выпадку ўласнікі жылля могуць звярнуцца па правядзенне экспертызы дакладнасці зробленай ацэнкі. Такая працэдура робіцца па дагаворы не бясплатна, але гэта, пры наяўнасці сумненняў, дазваляе пераканацца ў аб’ектыўнасці праведзенай ацэнкі. Калі вынікі экспертызы не будуць супадаць з ацэнкай, тады такое спрэчнае рашэнне магчыма будзе абскардзіць у судзе.
Любоў Валасоўская, Любанскі раён, пасёлак Сосны-2:
— Андрэй Анатольевіч, дапамажыце. У мяне пытанне пра грошы. Чаму нам такі вялікі прапануюць плаціць падатак за нерухомасць? Налічылі ажно 475 тысяч рублёў. А ў нас там толькі адна хата, у якой мы жывём больш за 30 гадоў. У 1990-я гады мы гэты дом прыватызавалі. А муж у мяне пенсіянер. Да гэтага ўсё жыццё адпрацаваў у лясніцтве. Можа, нам нейкая льгота належыць?
— Па гэтым пытанні вам неабходна звярнуцца пісьмова ў падатковую інспекцыю і ўдакладніць інфармацыю па падаткаабкладанай базе вашай нерухомасці. Трэба, каб вам растлумачылі, якім чынам атрымалася такая вялікая ацэнка дома. Калі пасля гэтага ў вас застануцца пытанні па кошце вашага жылля, тады звяртайцеся да нас, і ў камітэце паспрабуюць дасканала разабрацца па гэтым пытанні.
Ці будзе садовы домік жылым домам?
Кацярына Жук, горад Мінск:
— Я неаднаразова чула, што дачныя пасёлкі пад Мінскам могуць пераафармляць пад населенныя пункты: напрыклад, яны стануць вёскам або пасёлкамі. Ці праўда гэта, і што такое пераафармленне дасць жыхарам новых вёсак?
— Па-першае, трэба ўдакладніць, пра дачны пасёлак ці садоўніцкае таварыства ідзе гаворка. Паміж гэтымі структурамі вялікая розніца.
— Нам зямельны ўчастак давалі для вядзення калектыўнага садоўніцтва.
— Для таго, каб тэрыторыя садоўніцкага таварыства стала населеным пунктам, неабходна выканаць дастаткова шмат мерапрыемстваў. Так, гэта магчыма, але… Працэдура змены фармату тэрытарыяльнага кіравання магчыма двума шляхамі. На тэрыторыі самога садаўніцкага таварыства можна арганізаваць населены пункт або далучыць плошчу такога таварыства да бліжэйшага населенага пункта (вёскі, аграгарадка, пасёлка).
Але гэта не зусім проста. Папярэдне неабходна меняць межы існуючай вёскі, або, згодна з дзейным заканадаўствам, ствараць новы населены пункт. Рашэнне аб гэтым прымае адпаведны тэрытарыяльны Савет дэпутатаў. Каб падобнае рашэнне было станоўчым, трэба правесці шмат розных мерапрыемстваў. Напрыклад, патрабаванні да садовых домікаў і да інфраструктуры, у тым ліку сацыяльных аб’ектаў таварыстваў, істотна адрозніваюцца ад падобных патрабаванняў у населеных пунктах. Нормы заканадаўства па жылых дамах больш жорсткія, чым па лёгкіх садовых доміках. Прыкладна такая сітуацыя існуе і па патрабаваннях да дарог, водазабеспячэння, электрычнасці і іншых аспектаў інфраструктуры.
— Так. Звычайнаму садаводу такую аперацыю не зрабіць. Атрымліваецца, што для такой рэарганізацыі неабходна ініцыятыва мясцовых Саветаў?
— Вельмі сумняваюся, што мясцовыя Саветы будуць актыўнічаць на гэты конт. Магчыма, што з падобнай ініцыятывай могуць звяртацца грамадзяне, якія жадаюць аформіць свой дыхтоўны садовы домік у якасці жылога дома. Аднак звычайна ў садоўніцкім таварыстве далёка не ўсе садовыя домікі адпавядаюць крытэрыям капітальнай пабудовы. Увогуле, гэта даволі складанае пытанне, якое павінна вырашацца выключна комплексна, з улікам інтарэсаў розных бакоў і пры выкананні ўсіх дзейных патрабаванняў у сферы горадабудаўніцтва.
Рэгістраваць нерухомасць стала прасцей
Аляксандр Іваноў, Мінск:
— Андрэй Анатольевіч, днямі чуў, што ў вашай сістэме стала лягчэй рэгістраваць нерухомую маёмасць. Кажуць, што рэгістраваць стала і прасцей, і хутчэй. У мяне ў іншым горадзе застаўся дамок ад дзеда. Якім чынам я яго магу цяпер зарэгістраваць, за які час, і колькі гэта будзе каштаваць?
— Магчыма зарэгістраваць любы аб’ект нерухомай маёмасці ў дзень звяртання па дзяржаўную рэгістрацыю, калі ўсе неабходныя дакументы былі пададзены кліентам у адпаведнае падраздзяленне рэгістрацыі па месцы прапіскі да 16 гадзін дня.
У сувязі з тым, што ваша нерухомасць знаходзіцца ў іншым месцы, то ў вас ёсць магчымасць звярнуцца ў Мінскае агенцтва па дзяржаўнай рэгістрацыі маёмасці па зав. Вайскавому, 15 або вул. Румянцава, 14. Там арганізуюць перасылку дакументаў у структурнае падраздзяленне, якое будзе ажыццяўляць рэгістрацыю. У гэтым выпадку працэс рэгістрацыі займе крыху большы час, але вам не спатрэбіцца ехаць падаваць заяву па месцы знаходжання дома.
Другое. За здзяйсненне рэгістрацыйных дзеянняў у паскораным парадку (на працягу аднаго дня) бярэцца плата, якая адрозніваецца ад звычайных тарыфаў на 0,1-0,2 базавай велічыні. Стартавая базавая пазіцыя за адно рэгістрацыйнае дзеянне складае 0,5 базавай велічыні. Поўны кошт рэгістрацыі вам падкажуць непасрэдна на месцы.
— Па зямельным участку дакументы ўжо ёсць, а вось з домам…
— Калі сам дом не быў зарэгістраваны і трэба рабіць тэхнічную інвентарызацыю, то за выраб тэхпашпарта неабходна будзе заплаціць адпаведную суму дадаткова.
— У мяне існуе пытанне наконт тапаграфічных картаў. У продажы Белкартаграфіі я бачыў карты раёнаў, аўтамабільныя карты гарадоў Беларусі і іншыя. Гэта ўсё добра, але цывілізацыя крочыць наперад. Ці не разглядаецца ў камітэце ідэя стварэння электронных картаў высокай якасці?
— Цікавае і даволі сур’ёзнае пытанне. Працуем над ім. Абяцаю вам абавязкова разгледзець гэтую прапанову. Дзякуй за ідэю.
Нават такі прыгожы дом у Лошыцкім завулку Мінска можа хуткім часам пайсці пад знос…
Антаніна Бяляева, г. п. Бараўляны:
— Ці сапраўды сёння трэба рэгістраваць зямельныя ўчасткі ў садоўніцкіх таварыствах? Усе нашы суседзі яшчэ летась так хуценька рэгістраваліся…
— Так, вы сапраўды маеце рацыю. Гэта трэба рабіць. Больш за тое, асабліва гэта тычыцца таго, хто мае нерухомасць у садоўніцкіх таварыствах прыгарадных зон Мінска і абласных цэнтраў. Там цяпер дзейнічае пяцігадовая забарона на рэалізацыю такіх надзелаў з даты іх дзяржаўнай рэгістрацыі. Растлумачу сітуацыю. Магчыма, чалавек атрымаў зямельны ўчастак пад Мінскам нават 10-15 гадоў таму. Ён яго не рэгістраваў. За гэты час пабудаваў там садовы домік і вырашыў яго прадаць. Цяпер гаспадар гэтай нерухомасці можа прадаць такую зямлю (разам з пабудовамі) толькі пасля таго, як зарэгіструе яе, і потым з даты рэгістрацыі пройдзе 5 гадоў.
— І навошта ўсё так ускладнілі?
— Гэта зроблена дзеля таго, каб выключыць магчымасць спекуляцый у гэтай сферы, каб не ўзнікала нейкіх шэрых схем перапродажу зямельных участкаў. А такое раней было, бо існуе павышаны попыт на зямельныя ўчасткі вакол буйных гарадоў краіны.
Прыватнае жыллё фірмы не прыватызуецца
Аляксандр Сапожнікаў, Мінск:
— У мяне такое пытанне. Калі перааформілі нерухомасць, але не зарэгістравалі яе ў БТІ, то які тэрмін даецца, каб зарэгістраваць? Гэта тычыцца здзелкі дарэння.
— У гэтым выпадку тэрмін для звяртання ў агенцтва па рэгістрацыі не вызначаны, але трэба разумець, што могуць узнікнуць пэўныя нюансы. Так, толькі з моманту дзяржаўнай рэгістрацыі гэты дагавор будзе мець юрыдычную сілу. Удакладню. Калі ў гэты перыяд дарыльшчык перадумае або з ім нешта здарыцца, то такі дагавор не ўступае ў сілу. Напрыклад, пры смерці дарыльшчыка ў гэты час дагавор робіцца несапраўдным, а нерухомасць перадаецца па спадчыне.
Валянціна, Старадарожскі раён, вёска Леўкі:
— Муж атрымаў дом ад калгаса, дзе ён працаваў да 2002 года. У свой час мы яго не прыватызавалі, а ў 2004 годзе калгас быў рэарганізаваны ў акцыянернае таварыства. Цяпер мы хочам прыватызаваць гэты дом, але нам адмаўляюць, бо ў складзе ўласнікаў прысутнічае замежны інвестар. Можа, яны нешта блытаюць, бо не ведаюць усіх законаў?
— Прыватызацыя жылля ажыццяўляецца толькі ў дачыненні да дзяржаўнай уласнасці. Хутчэй за ўсё, цяпер гэты дом з’яўляецца прыватнай уласнасцю таварыства. Таму сёння пытанне ставіцца не аб прыватызацыі, а аб продажы аб’екта нерухомасці. Калі акцыянернае таварыства не жадае прадаваць гэты дом, то ніхто не можа прымусіць яго гэта зрабіць. Вам я параю канкрэтна ўдакладніць, каму ваш дом сапраўды належыць. Магчыма, ён знаходзіцца на балансе мясцовых улад. У гэтым выпадку прыватызацыя ці іншы спосаб адчужэння дазваляецца.
— Куды мне звяртацца канкрэтна?
— Наведайце жыллёвы аддзел мясцовага райвыканкама.
Дапаможа сэрвітут
Валянцін Кавальчук (канкрэтны адрас сваёй вёскі не назваў):
— У мяне праблема з суседзямі. Ад сцяны майго дома да суседскага плота ўсяго 20 сантыметраў. Так здарылася, што мы з суседзямі цяпер не вельмі сябруем. А гэтая мяжа ўпрытык да нашага дома не дазваляе мне рабіць рамонт будынка. Мне здаецца, што ў свой час былі парушаны нормы. Было б добра гэтую памылку цяпер выправіць. Спрабаваў я знайсці справядлівасць на месцы, але нашы чыноўнікі мяне не разумеюць або не жадаюць гэтага рабіць…
— Я таксама вам не дапамагу, бо гэтае пытанне знаходзіцца ў кампетэнцыі або выканкама, або суда. Ніводзін іншы дзяржаўны орган кіравання ў гэтым выпадку вам не дапаможа.
— Адкажыце ўсё ж, сёння па законе мне павінны даць пэўны кавалак зямлі каля майго дома (хлява), для яго абслугоўвання (рамонту)?
— Калі б зямельны ўчастак вы атрымалі сёння ці крыху раней, то пытанняў наконт мяжы ўпрытык не існавала. Але зямельныя ўчасткі вы з суседам атрымлівалі значна раней, калі дзейнічалі іншыя нормы. У вас ёсць права звяртацца ў суд па гэтым пытанні, але не факт, што вы яго выйграеце. Я б вам параіў паставіць пытанне аб прадастаўленні вам сэрвітуту. Наўрад ці выканкам паспрабуе адабраць частку прыватнай зямлі ад аднаго ўласніка, каб перадаць яе другому прыватніку.
— Слова «сэрвітут» чую першы раз.
— Гэта права абмежаванага карыстання чужым зямельным участкам. У вашым выпадку невялікі кавалачак зямлі ўчастка суседкі абмяжоўваецца вашым правам некалькі раз на год (або пастаянна) мець доступ да сцяны і даху вашых пабудоў. Аднак увесь участак застаецца ў карыстанні (валоданні), уласнасці суседкі.
Кар. «Звязды»:
— Падобных спрэчных пытанняў сёння ўзнікае шмат?
— Хапае. Раней было значна больш. Яшчэ раз патлумачу ўсю схему такіх пытанняў. Зямельныя спрэчкі вырашаюцца альбо мясцовым выканкамам, або судом.
Калі праблема мяжы зямельных участкаў узнікае ў дачыненні да зямлі, што знаходзіцца ў прыватнай уласнасці, ці канфлікт звязаны з індывідуальнымі пабудовамі, то ў гэтым выпадку апошнюю кропку па справе ставіць толькі суд.
Калі падобныя спрэчкі разглядае выканкам, тады ствараецца спецыяльная камісія. Гэтая камісія павінна будзе наведаць аб’ект спрэчкі, дзе непасрэдна на месцы будуць разглядацца аргументы абодвух бакоў і прымацца адпаведнае рашэнне. Калі адзін бок канфлікту не згодзен з такім рашэннем, тады такі грамадзянін мае права сваё меркаванне па гэтым пытанні адстойваць у вышэйшай інстанцыі або праз суд. Аднак, калі казаць чыста па-людску, то з любымі суседзямі лепш сябраваць.
Працэдура, калі тэрыторыя садоўніцкага таварыства становіцца населеным пунктам, — даволі складаная.
Фота Надзеі БУЖАН
Чэкі «Маёмасць» яшчэ пажывуць
Таццяна Луцэвіч, горад Мінск:
— Ваш камітэт дэлегаваў права абменьваць чэкі «Маёмасць» на акцыі акцыянерных таварыстваў Беларусбанка.
— Так, сёння такія чэкі абменьваюцца праз аддзяленні нашага самага буйнога банка.
— Я свае чэкі ўжо даўно абменяла на каштоўныя паперы. Днямі ў спадчыну атрымала яшчэ чэкі. Збіралася і іх абмяняць, але сутыкнулася з адной не вельмі зручнай сітуацыяй. Выбар прадпрыемстваў невялікі. Больш за тое, у кожным раёне існуе свой спіс прадпрыемстваў, акцыі якіх прапануюцца ў абмен на чэкі. У нашым аддзяленні ёсць акцыі толькі трох прадпрыемстваў. Чаму спажыўцам нельга прапанаваць на выбар каштоўныя паперы адразу ўсіх акцыянерных таварыстваў нават не рэгіёна, а свайго горада?
— Пытанне слушнае. Існуе шэраг аб’ектыўных абставін, чаму існуе менавіта такі механізм абмену. Цяпер ва ўрадзе разглядаецца пытанне аб падаўжэнні тэрмінаў абмену чэкаў «Маёмасць» на акцыі нашых прадпрыемстваў. Дзякуй вам за пытанне. Будзем над ім працаваць.
Віктар Шкода, горад Маладзечна:
— У мяне пяць гадоў таму памёр бацька. А да гэтага на яго імя была аформлена спадчына — хата дзеда. Долю гэтай спадчыны ад бацькі атрымалі мы з сястрой. Але сярод спадчыннікаў хаты ёсць яшчэ дзве нашы цёткі (родныя сёстры бацькі). Цёткі паміж сабой і з намі таксама сур’ёзна пасварыліся з-за гэтага дома. Зямельны падатак і падатак на нерухомасць плацім мы з сястрой, а цёткі ўсё не могуць разабрацца, хто з іх галоўны. Ці маем мы магчымасць цяпер адмовіцца ад гэтай спадчыны?
— Ці ўсе спадчыннікі аформілі свае правы на гэты дом?
— Мы з сястрой аформілі зямельны ўчастак пад гэту хату. А сам дом яшчэ не аформлены, бо ў афармленні яго павінны прысутнічаць усе спадчыннікі.
— Адмаўляцца ад гэтай спадчыны магчыма было на працягу шасці месяцаў з даты смерці ўласніка. Як зараз выйсці з гэтай сітуацыі? Вам з сястрой трэба аформіць свае долі на гэты дом. Пасля гэтага можна будзе прадаць ці падарыць свае долі цёткам, суседзям, іншым трэцім асобам — любому. Проста адмовіцца ад сваёй долі спадчыны па судзе вам будзе складана.
Не трапіць на вуду зямельных аферыстаў
Ірына Мажэйка, горад Мінск:
— У мяне двое дзетак: спадзяёмся, што праз пэўны час будзе і трэцяе. А мы з мужам жывём у Мінску ў кватэры бацькоў. Калі ў нас будзе трое дзетак, то ці зможам мы як шматдзетная сям’я разлічваць на атрыманне зямельнага ўчастка для будаўніцтва ўласнага дома ў Мінску ці Мінскай вобласці?
— Сапраўды, шматдзетным сем’ям зямельныя ўчасткі прадастаўляюцца, калі яны маюць патрэбу ў паляпшэнні жыллёвых умоў. У Мінску атрымаць зямлю вам тэарытычна будзе магчыма, але… Гэта адзіны выпадак (для шматдзетных), калі на тэрыторыі Мінска дапускаецца выдзяленне зямельнага ўчастка пад будаўніцтва індывідуальнага жылога дома без правядзення аўкцыёну. Аднак трэба ўлічваць той факт, што на тэрыторыі сталіцы засталася даволі абмежаваная колькасць свабодных зямельных участкаў, прадугледжаных пад індывідуальнае жыллёвае будаўніцтва. Вядома, што ахвотных атрымаць такі зямельны ўчастак менавіта ў Мінску даволі шмат. У чаргу вас сапраўды паставяць, але застанецца адкрытым пытаннем рэальны тэрмін атрымання зямельнага ўчастка.
У Мінскай вобласці атрымаць зямельны ўчастак вам будзе прасцей. Тут трэба спачатку вызначыцца з раёнам і дакладна з сельсаветам, дзе вы жадаеце жыць. На гэты конт існуе пастанова Саўміна №1781, якая вызначае парадак пастаноўкі на гэты ўлік. Пасля таго, як вы там пакінеце сваю заяву, вам застанецца толькі чакаць сваёй чаргі на атрыманне зямельнага ўчастка.
— А цяпер, калі мы не з’яўляемся шматдзетнай сям’ёй, можам набыць участак толькі на аўкцыёне?
— У якасці маючых патрэбу ў паляпшэнні жыллёвых умоў вы можаце і сёння стаць на адпаведны ўлік у Мінскай вобласці (акрамя Мінска) і чакаць прапаноў ад мясцовых улад выбранага вамі раёна.
— Мужу прапануюць яшчэ адзін варыянт. Набыць на другасным рынку зямельны ўчастак з незавершаным будаўніцтвам. Тут існуюць нейкія «падводныя камяні»?
— Тут таксама трэба ўлічваць шэраг момантаў. Справа ў тым, што, калі зямельны ўчастак атрымліваўся вашым патэнцыйным прадаўцом у якасці маючага патрэбу ў паляпшэнні жыллёвых умоў, то сёння існуе забарона на продаж такіх аб’ектаў на працягу 8 гадоў з даты рэгістрацыі ўжо пабудаванага дома. Таму ў такога грамадзяніна закансерваваны аб’ект вы не выкупіце. Калі зямельны ўчастак набываўся чалавекам на аўкцыёне ці нейкім іншым чынам — не ў якасці жыллёвага чаргавіка, тады падобную «незавершанку» вы набыць можаце. Таму ў гэтай сітуацыі рэкамендую спачатку дакладна разабрацца з тым момантам, на якой падставе гэты ўчастак належыць прадаўцу.
Калі вам паспрабуюць прапанаваць купіць падобны аб’ект, магчыма, і танней, але без адпаведнага афармлення на ваша імя (паабяцаюць аформіць яго на вас пазней), то шчыра рэкамендую не звязвацца з такімі схемамі. Гэта — афера.
— Удакладніце па незавершаным будаўніцтве адзін момант. Ці існуе канкрэтны тэрмін, калі гэты дом пасля кансервацыі мы павінны дабудаваць?
— Згодна з нормамі Указа Прэзідэнта №87 каробка дома (фундамент, сцены і дах) павінна быць узведзена на працягу трох гадоў з даты рэгістрацыі права на зямельны участак. Атрымліваецца, што калі жыллёвы аб’ект ужо будаваўся 1,5 года, а потым быў закансерваваны, то вам застаецца яшчэ
1,5 года на яго ўзвядзенне. Гэты тэрмін магчыма падоўжыць у выпадку цяжкага матэрыяльнага становішча ці іншых уважлівых прычын. Мясцовы выканкам можа дазволіць дабудоўваць гэты дом да двух гадоў. Гэта тычыцца будаўніцтва менавіта каробкі. Унутранае адстройванне жылых памяшканняў і іншыя работы па інфраструктуры нейкімі дакладнымі тэрмінамі не абмяжоўваюцца.
А за зямлю даплаці
Кар. «Звязды»:
— Хачу ўдакладніць пэўныя моманты наконт забароны на продаж жылых аб’ектаў на працягу 8 гадоў з даты рэгістрацыі ўжо пабудаванага дома, калі зямельны ўчастак пад ім быў прадастаўлены грамадзяніну па чарзе. Сёння такая забарона ўжо не такая жорсткая?
— Так. З улікам складаных жыллёвых сітуацый (нехта памёр, атрымаў інваліднасць, уласнік жылля пераведзены на працу (службу) у іншую мясцовасць), калі па аб’ектыўных абставінах чалавек не можа дабудаваць аб’ект, то ў гэтым выпадку ўласніку дазваляецца прадаць сваю нерухомасць. У першую чаргу такі аб’ект прапануецца купіць выканкаму, а калі ў выканкама няма такой магчымасці — дазволіць прадаваць на свабодным рынку. Тут існуе яшчэ адзін нюанс.
Калі зямля выдзялялася чаргавіку па льготнай цане, то пры такім тэрміновым продажы гаспадар нерухомасці павінен даплаціць за зямельны ўчастак да поўнага яе кадастравага кошту. Калі зямля давалася кліенту ў пажыццёвае валоданне без аплаты, то цяпер гаспадар аб’екта павінен цалкам выкупіць участак па кадастравым кошце або аформіць арэнду на 99 гадоў, за што таксама трэба заплаціць.
Гэта зроблена дзеля таго, каб нейкімі хітрыкамі не ажыццяўляўся «шэры» продаж зямлі.
Уласны кантроль
за якасцю
Васіль Іваноў, горад Заслаўе:
— Ці існуе ў структуры вашага камітэта спецыяльная служба ўласнай бяспекі, якая сочыць за магчымымі памылкамі?
— Ва ўсіх арганізацыях, якія працуюць з насельніцтвам і з юрыдычнымі асобамі (аказваюць паслугі, выконваюць работы), створаны службы кантролю за якасцю. Спецыялісты гэтай структуры праглядаюць дакументы, якія выдаюцца кліентам. Гэта комплексная сістэма, калі кожны дакумент аналізуецца (акрамя выканаўца) кіраўніком аддзела. Акрамя таго, цалкам пакет дакументаў разглядаецца службай сістэмы якасцю ўнутры прадпрыемства. Такая сістэма якасці развіваецца і ў тэхналагічным напрамку. Выкарыстоўваюцца аўтаматызаваныя сістэмы кантролю якасці з праграмным забеспячэннем. У тых месцах прыёму грамадзян, дзе з’яўляецца сапраўды шмат заяў, устаноўлены сістэмы аўдыя- і відэазапісу. Апошняе дысцыплінуе не толькі работнікаў, але і спажыўцоў.
А ўсё гэта даволі істотна памяншае выхад дакументаў з памылкамі на рукі да кліентаў.
Кар. «Звязды»:
— Чуў, што сёлета ваш камітэт падняўся яшчэ на адну прыступку па лініі падрыхтоўкі высокакваліфікаваных спецыялістаў. Што новага было зроблена?
— Так. Напрыканцы лістапада быў адкрыты філіял кафедры геадэзіі і картаграфіі геаграфічнага факультэта Беларускага дзяржаўнага ўніверсітэта, прыкладной геадэзіі І фотаграмметрыі, геадэзіі і кадастраў геадэзічнага факультэта Полацкага дзяржаўнага ўніверсітэта, а таксама спецыяльны навучальны камп’ютарны клас.
Аб’яднае навучальную прастору прадпрыемства «Белгеадэзія» Дзяржаўнага камітэта па маёмасці Беларусі.
Адзначу, што філіял кафедраў дзвюх вядучых навучальных устаноў краіны створаны ў мэтах павышэння ўзроўню падрыхтоўкі студэнтаў па спецыяльнасцях «Космааэракартаграфія», «Геадэзія» і «Геаграфія (геаінфармацыйныя сістэмы)», у тым ліку забеспячэння вучэбнай, вытворчай і пераддыпломнай практык студэнтаў, выканання курсавых І дыпломных праектаў, магістарскіх, кандыдацкіх і доктарскіх дысертацый па напрамках асноўнай дзейнасці прадпрыемстваў Дзяржкаммаёмасці. Новаўвядзенне будзе спрыяць лепшай адаптацыі студэнтаў у працэсе навучання да канкрэтных вытворчых умоў, атрыманню імі навыкаў працы ў працоўных калектывах па напрамках картографа-геадэзічнай дзейнасці.
Гэта ўжо не першая навучальная база для ВНУ, створаная па ініцыятыве і сіламі Дзяржкаммаёмасці. У 2013 годзе для інтэграцыі праектнай і навуковай дзейнасці і вышэйшай адукацыі, узмацнення практычнай накіраванасці падрыхтоўкі спецыялістаў па спецыяльнасцях «Геаінфармацыйныя сістэмы», «Космааэракартаграфія», «Геаграфія» на базе праектнага інстытута «Белгіпразем» быў створаны філіял кафедры глебазнаўства і зямельна-інфармацыйных сістэм геаграфічнага факультэта БДУ. У тым жа годзе на базе праектных інстытутаў «Белгіпразем» і «Магілёўгіпразем» былі адкрыты філіялы кафедры землеўпарадкавання БДСГА.
Сёлета ў маі, да 90-годдзя стварэння землеўпарадкавальнага факультэта Беларускай дзяржаўнай сельскагаспадарчай акадэміі ў Горках, за кошт спонсарскай дапамогі арганізацый па землеўпарадкаванні сістэмы УП «Праектны інстытут Белгіпразем» у БДСГА была адрамантавана вучэбная аўдыторыя, у якой размесціцца камп’ютарны клас для ўкаранення ў навучальны працэс самых сучасных інавацыйных тэхналогій.
У цэлым у галіне вядзецца мэтанакіраваная праца, накіраваная на ўдасканаленне падрыхтоўкі спецыялістаў для профільных арганізацый, сумесна з Дзяржкаммаёмасцю ў БДСГА вызначаецца неабходны пералік і аб’ём навучальных дысцыплін і практык.
Напрыклад, выпускнікі землеўпарадкавальнага факультэта ўжо з 3-га курса акадэміі (з моманту праходжання першых вытворчых практык на прадпрыемствах і ў арганізацыях) знаёмыя з будучымі працадаўцамі. Сёлета 66 з 74 маладых спецыялістаў былі працаўладкаваны ў сістэме Дзяржкаммаёмасці і землеўпарадкавальных службах.
kurkасh@zvіаzdа.bу
Фота Аляксандра ШАБЛЮКА
Комментарии (0)