Калі мы даведаліся, што раённая арганізацыя Беларускага таварыства паляўнічых і рыбаловаў закупіла аленяў у Іўеўскім лясгасе, адразу накіраваліся “ў госці” да гэтых грацыёзных жывёлін. А прапісаліся яны ў вёсцы Цяпы Дэмбраўскага сельсавета.
У вальеры, які займае 6,2 гектара, на момант нашага прыезду ўжо знаходзіліся 3 самкі і 6 сегалеткаў. Яшчэ траіх аленяў мы чакалі з хвіліны на хвіліну.
Каб не траціць дарэмна часу, старшыня раённай арганізацыі БТПР Алег Уладзіміравіч Ламакін і егер Аляксандр Іванавіч Дробыш уводзяць мяне ў курс справы.
– На набыццё высакародных аленяў з бюджэту абласной арганізацыі ГА»БТПР” было выдзелена звыш 272 мільёнаў рублёў, – расказвае Алег Уладзіміравіч. – Для нашага раёна такая “жывая” пакупка ў навінку. Раней мы абыходзіліся сваім пагалоўем. Дарэчы, нашы лідскія калегі таксама нядаўна набылі аленяў, аднак дастаўлены яны не з мясцовых лясгасаў, а з аленегадоўчай літоўскай фермы.
Аглядаю тэрыторыю. Як аказалася, сіламі членаў раённай арганізацыі Беларускага таварыства паляўнічых і рыбаловаў і работнікаў СВК “Дэмбрава” папярэдне была праведзена сур’ёзная работа па падрыхтоўцы вальера. Прарэджваўся лес, нарыхтоўваўся корм, агароджвалася тэрыторыя. Толькі на агароджу было затрачана 62 мільёны рублёў.
Падыходзім бліжэй да кормапляцоўкі. Тут для лясных жыхароў арганізаваны зімовы падкорм. Усё зроблена па-гаспадарску. Ёсць у “меню” і зерне, і сена, і соль.
– Прыемна адзначыць, што кіраўніцтва СВК “Дэмбрава” заўсёды ідзе насустрач, – адзначае Аляксандр Іванавіч Дробыш. – Гэта гаспадарка дапамагае з кармамі для закупленых жывёл, выдзяляе тэхніку пры неабходнасці. За гэта мы вельмі ўдзячны старшыні А.В. Тулю. Дарэчы, падчас размяшчэння аленяў у вальеры прысутнічаў і ветэрынарны ўрач СВК “Дэмбрава” Юрый Вячаслававіч Сало, які пільна сачыў за станам здароўя жывёл, маркіраваў іх, каб пасля можна было прасачыць за кожным.
…І вось гудзе матор. МАЗ з аленямі спяшаецца на месца паркоўкі. У адной драўлянай скрыні – алень-прыгажун, а ў другой – дзве самачкі. Егер адчыняе заслонку, і грацыёзныя жывёлы выскокваюць на волю. Цяпер траіх гадаванцаў чакае адаптацыя ў новых умовах. Пасля праходжання ўсіх каранцінных мерапрыемстваў і пасля таго, як самкі дадуць прыплод, жывёлы будуць выпушчаны ў паляўнічыя ўгоддзі для павелічэння папуляцыі асобін.
Ганна КАСПЕР.
Фота аўтара.
Комментарии (0)