Працягваецца практыка правядзення прамых тэлефонных дыялогаў паміж насельніцтвам і ўладай. У мінулую суботу на пытанні людзей адказваў намеснік старшыні Шчучынскага райвыканкама Аляксей Валянцінавіч Садоўскі. За час работы “прамой лініі” паступіла чатыры звароты. Да кожнага з іх чыноўнік аднёсся з увагай.
Адразу дзве жанчыны, дарэчы, жыхаркі абласнога цэнтра, абазначылі сугучныя пытанні. Сутнасць іх у тым, што ў сувязі з адменай некаторых аўтобусных рэйсаў – адпраўленнем з Гродна і Шчучына – стала праблематычна дабірацца ў вёскі Шчанец і Зінякі. Маўляў, раней, выйшаўшы на трасе з аднаго аўтобуса, пасажыры перасядалі ў іншы, які ішоў з райцэнтра… Па словах заяўніц, гэта было зручна для многіх людзей. Цяпер, сцвярджала адна з жанчын, складана на выхадныя прыехаць да бацькоў і вярнуцца назад у Гродна.
Аляксей Валянцінавіч паабяцаў уважліва разабрацца ў сітуацыі і даць адказ. “Было б каму ездзіць, а транспарт – не праблема”, – заўважыў ён. Пры гэтым адзначыў, што аптымізацыі аўтобусных маршрутаў патрабуе час. Надзвычай важна жыць па сродках. Трэба зразумець, што вазіць у аўтобусе аднаго-двух пасажыраў сёння немагчыма. Ёсць рэйсы, калі ў салоне ўвогуле пуста. Транспартныя расходы нашмат перавышаюць даходы, і пасажырскія перавозкі даціруюцца з бюджэту. Крызісныя праявы вымушаюць быць асабліва ашчаднымі ў адносінах да фінансавых сродкаў.
– Між тым ні адзін маршрут на тэрыторыі раёна не адмяняецца без папярэдняга дасканалага вывучэння пасажырапатоку, – падкрэсліў намеснік старшыні райвыканкама. – Падыходзім вельмі ўзважана. Прымаем да ўвагі меркаванне сельсавецкай улады, аддзела адукацыі, спорту і турызму, іншых зацікаўленых бакоў. Часам захоўваем той ці іншы маршрут, бо даводзіцца ўлічваць многія нюансы, у прыватнасці, як дарослым дабірацца на работу, дзецям – у школу, пажылым людзям – у паліклініку… Але рэаліі такія, што аптымізацыя руху аўтобусаў будзе працягвацца.
Сваімі бытавымі і жыццёвымі праблемамі падзялілася з прадстаўніком улады жыхарка дома, што па вуліцы Паўднёва-Заходняя ў Шчучыне. У прыватнасці, яна паскардзілася на няспраўнасці ў каналізацыйнай сістэме, што стварае дыскамфорт для пражывання. Канешне, гэтай праблемай павінна займацца найперш кіраўніцтва жыллёва-будаўнічага кааператыва. Між тым зварот на “прамую лінію” не пакіне без увагі і ўлада. Гэта ж гараджанка ўзняла пытанне суседскіх узаемаадносін. Па яе словах, гаспадар падворка, сумежнага з бацькоўскай сядзібай, пабудаваў хлеў з парушэннем дзеючых будаўнічых і іншых норм… “Сёлета мы пачалі сур’ёзна займацца “самабудамі”. Трэба разабрацца і ў гэтай сітуацыі”, – лічыць А.В. Садоўскі. Маўляў, парушыў – няхай зносіць, не – няхай карыстаецца, а другому боку давядзецца прыняць гэта як належнае. Яснасць у сітуацыю ўнясуць спецыялісты аддзела архітэктуры і будаўніцтва, якім гэты зварот накіраваны для разгляду. Трэба будзе – падключацца і іншыя службы. А па-чалавечы, калі суседзі не дружаць, – гэта бяда...
Будуць дадзены тлумачэнні і жыхару Васілішак, які ад імя землякоў узнімаў пытанне лазневага абслугоўвання.
Таццяна ПАЛУБЯТКА.
Комментарии (0)