Па добрай традыцыі ў першыя майскія дні шчучынцы збіраюцца разам, каб “разбудзіць” гарадскі фантан. Сёлета гэта ўрачыстасць, да таго ж, супала з Вялікаднем і Першамаем. Можа таму так багата сабралася людзей – у гарадскім скверы яблыку не было дзе ўпасці. Адчувалася, што шчучынцы засумавалі без вясёлых струменьчыкаў фантана, якія, да таго ж, так хороша свецяцца рознакаляровымі агеньчыкамі ўвечары.
“Музычны капеж” – так называлася канцэртна-забаўляльная праграма, якую падрыхтавалі для гараджан і гасцей горада работнікі і выхаванцы раённага цэнтра культуры і народнай творчасці.
Горача віталі госці вядучую Вольгу Аброшка. Гучнымі апладысментамі адорвалі выступленні таленавітых артыстаў Ігара і Галіны Будзько, Анастасіі Селішчавай, Ілоны Танкевіч, Вікі Падстаўскай і іншых. Не забылі на гэтай імпрэзе павіншаваць з надыходзячым святам – Днём друку – журналістаў нашай раёнкі і супрацоўнікаў “Саюздруку”. Дзякуй, сябры!
У той прыгожы майскі надвячорак ні на хвіліну не сціхалі ля фантана песні. Нават пажылыя шчучынцы закружылі ў вясёлай танцавальнай віхуры.
…І вось хвалюючы момант. Фантан ажывае. Водны салют рвецца ў неба, а сквер напаўняецца гучнымі апладысментамі. Асабліва радавалася дзятва: кожны хацеў хутчэй дакрануцца да струмянёў, адчуць халодныя кроплі на далонях і абавязкова сфатаграфавацца.
Дарэчы, для маленькіх шчучынцаў у парку працавалі атракцыёны. Кожны жадаючы мог пачаставацца салодкай ватай, поп-корнам, хот-догам або кавай. Парадаваліся і аматары крэатыву, якія маглі на свяце ўпрыгожыць сябе акавагрымам.
З задавальненнем фатаграфаваліся і дзеці, і дарослыя з роставымі лялькамі – Зайцам, Ваўком і Мядзведзем. Адным словам, свята ўдалося на славу.
Цяпер і ў выхадныя, і ў будні сквер будзе сустракаць шчучынцаў вясёлай мелодыяй фантана. Зноў сюды будуць спяшацца закаханыя, мамы з дзеткамі і пажылыя людзі, каб проста адпачыць на лавачках і палюбавацца вясеннімі пераменамі.
Ганна КАСПЕР.
Фота аўтара.
Комментарии (0)