Надзвычайны і Паўнамоцны Пасол Рэспублікі Казахстан у нашай краіне Ергалі Булегенаў напярэдадні Дня Перамогі наведаў Радашковічы. На мясцовых старых могілках у брацкай магіле пахаваны Народны Герой Казахстана Бахтурас Бейскбаеў, які быў членам гераічна загінулага ў небе над Радашковічамі экіпажа самалёта Аляксандра Маслава.
У першы месяц Вялікай Айчыннай вайны лётчыкі здзейснілі наземны таран, накіравалі палаючы самалёт на калону варожай тэхнікі і загінулі каля вёскі Дзікшняны. Па шматгадовай традыцыі супрацоўнікі пасольства ў гэтыя майскія дні прыязджаюць у гарпасёлак, каб пакланіцца памяці земляка, ускласці кветкі на яго магілу. Сёлета ля абеліска, устаноўленага на брацкай магіле, прайшоў жалобны мітынг. Ергалі Булегенаў ушанаваў памяць земляка, адзначыў, што ў баях за Радзіму плячо ў плячо змагаліся людзі розных нацыянальнасцей. Мы, іх нашчадкі, не маем права аб гэтым забываць і павінны берагчы мір, за які нашы продкі аддалі жыццё.
Тэму міру, удзячнай памяці прадоўжыў у сваім выступленні старшыня Маладзечанскага раённага Савета дэпутатаў Віктар Невяровіч. Разам з дарослымі кветкі да брацкай магілы ўсклалі вучні мясцовай школы-інтэрната, дзе створаны адзіны ў нашай краіне музей паветраных і вогненных тараноў, сабраны ўнікальныя экспанаты пра экіпажы лётчыкаў, якія загінулі ў небе над Радашковічамі. Асобны раздзел у ім прысвечаны экіпажу Аляксандра Маслава, ёсць матэрыялы і пра малодшага сяржанта стралка Бахтураса Бейскбаева, апошнім прытулкам для якога стала беларуская зямля.
На фота — Пасол Рэспублікі Казахстан Ергалі Булегенаў, старшыня раённага Савета дэпутатаў Віктар Невяровіч разам з вучнямі школы-інтэрната ля абеліска.
Фота: Аляксей ПЛАТКО.
Комментарии (0)