Якія прадметы самыя папулярныя ў абітурыентаў, чаму яны не прыходзяць на ЦТ і колькі чалавек наогул жадае атрымаць адукацыю.
Як звычайна, у Маладзечне ЦТ праводзіцца ў політэхнічным каледжы, і другі год дадатковай базай з’яўляецца гімназія №10. Сёлета на тэсціраванне ў Маладзечне зарэгістраваліся 8160 чалавек — на 140 менш, чым летась — маладзечанцы, жыхары Вілейскага, Валожынскага, Мядзельскага, Смаргонскага, Астравецкага, Ашмянскага і Пастаўскага раёнаў.
Пераважная колькасць выпускнікоў (1916) выбрала рускую мову, беларускую – 1130. Але на іспыты па гэтых прадметах з’явіліся адпаведна на 36 і 33 чалавекі менш. Прычыны розныя, найбольш распаўсюджаныя — хвароба і адсутнасць пашпарта па прычыне здачы яго для атрымання візы (для абітурыентаў арыгінал дакумента абавязковы).
Тройку лідараў сярод дысцыплін замыкае матэматыка — 1436 чалавек. Летась гэты прадмет быў больш запатрабаваным.
Наступная шасцёрка выглядае так:
фізіка (862),
біялогія (699),
гісторыя Беларусі (641),
англійская мова (563),
хімія (382),
грамадазнаўства (315).
У аўтсайдарах – сусветная гісторыя і геаграфія (па 35), а таксама іспанская мова (5).
Самае працяглае цэнтралізаванае тэсціраванне – па фізіцы і матэматыцы. Яно доўжыцца 180 хвілін. Самае кароткае (у два разы менш) — па геаграфіі, сусветнай гісторыі, гісторыі Беларусі і грамадазнаўстве. Сёлета на паўгадзіны падоўжылі іспыты па хіміі (150 хвілін).
Завершыцца ЦТ 27 чэрвеня. Дарэчы, у апошні дзень абітурыенты будуць здаваць сусветную гісторыю і геаграфію. Вынікі кожнага тэста з’явяцца не раней чым праз 10 сутак на сайце Рэспубліканскага інстытута кантролю ведаў.
Рэзервовы дзень — 5 ліпеня
Ён прадугледжаны для выпускнікоў, якія па ўважлівай прычыне (на што неабходна дакументальнае пацвярджэнне) не з’явіліся на цэнтралізаванае тэсціраванне.
Зарэгістравацца можна з 28 чэрвеня па 1 ліпеня ва ўсіх абласных цэнтрах. Праводзіцца «рэзервовае» ЦТ у Белдзяржуніверсітэце.
— Як правіла, юнакі і дзяўчаты прапускаюць тэсціраванне з-за хваробы, часам з-за збою ў раскладзе
транспартнага руху, асабліва гэта тычыцца іншагародніх, якім даводзіцца дабірацца грамадскім транспартам, — заўважыў адказны сакратар арганізацыйнай камісіі па правядзенні ЦТ пункта тэсціравання ў політэхнічным каледжы Юрый Скакоўскі.
Для ўдзелу ў ЦТ юнакі і дзяўчаты абавязкова павінны мець з сабой спецыяльны пропуск на тэсціраванне, які выдаюць у час рэгістрацыі, і пашпарт. Дакументы прадстаўляюцца толькі ў арыгінале.
Усяго на цэнтралізаванае тэсціраванне ў Беларусі зарэгістраваўся 101691 абітурыент (летась – 105669).
Плануецца, што сёлета ВНУ краіны прымуць звыш 63000 абітурыентаў, сярэднія спецыяльныя ўстановы – звыш 70000.
У ВНУ на дзённую форму навучання плануецца залічыць 38,5 тыс. чалавек (у тым ліку на бюджэт — 22,6 тыс.), завочнай — 24,7 тыс. (на бюджэт — 5,3 тыс.).
У Камітэце дзяржаўнага кантролю Мінскай вобласці ў рабочыя дні з 9.00 да 18.00 працуюць гарачыя лініі па пытаннях падрыхтоўкі і правядзення ўступных іспытаў. Заўвагі і прапановы можна выказаць па тэл. 8-017-284-03-42, 8-017-284-09-06.
Фота Аляксея Платко.
Комментарии (0)