У суботу на праспекце і плошчы Францыска Скарыны, куды ні глянь, усюды можна было ўбачыць нешта чароўнае і незвычайнае. Вясёлыя чарнічныя «палянкі» з сюрпрызамі з’явіліся літаральна на кожным кроку, а ў паветры лунаў духмяны водар пірагоў, які нібы запрашаў: «Прыходзьце да нас». Тут усіх чакаў традыцыйны і любімы палачанамі экафэст «Полацкія чарніцы»-2016.
Як заўсёды, для палачан і гасцей горада арганізатары падрыхтавалі насычаную праграму.
Спачатку можна было завітаць на тэматычныя пляцоўкі, якіх было нямала.
Так, творчы калектыў ААТ «Полацкі малочны камбінат» на сваёй чарнічнай «палянцы» прапаноўваў пакаштаваць прадукцыю прадпрыемства і весяліў добрымі песнямі, а яшчэ тут можна было сфатаграфавацца з «пакетам» малака, смятаны ці кефіра, якія так і намагаліся закружыцца ў танцы.
Побач з «Малочнай» размясцілася пляцоўка ААТ «Полацкі КХП», дзе можна было адведаць блінцоў з полацкай мукі ды са свежымі чарніцамі. Смаката! Здавалася, чарга ля пляцоўкі ніколі не зменшыцца.
А вось хлопчыкі і дзяўчынкі спяшаліся на «Дзіцячую» пляцоўку. Тут для малых Полацкі раённы цэнтр дзяцей і моладзі разам з дашкольнымі ўстановамі адукацыі падрыхтаваў безліч цікавых гульняў і забаў. І чарнічны аквагрым, і фотасалон, і бяспройгрышную латарэю, і майстар-класы, і чарнічныя прыгоды, і выставы-продажы сувеніраў, і кантактны заапарк, і многае іншае — сапраўдная чарнічная краіна цудаў.
Полацкая раённая цэнтралізаваная бібліятэчная сістэма падрыхтавала сваю забаўляльную праграму. Канешне, кніжную выставу пра галоўную ягаду свята, конкурсы для малых і дарослых, майстар-класы, дзе прапаноўвалі зрабіць ружу, сурвэтніцу і чарнічную паштоўку. А яшчэ на пляцоўцы РЦБС можна было завітаць на паэтычны open-air «Вершы над горадам» і да «Полацкіх траўніц».
Асаблівай цікавасцю карысталася чарнічная паляна «Полацкай ЦГБ». Тут можна было даведацца пра карысць чарніц, пакаштаваць стравы з гэтай ягадай. А яшчэ — памерыць артэрыяльны ціск, узважыцца і атрымаць рэкамендацыі ўрача.
Рады былі госці завітаць на пляцоўку аграсядзібы «Лука», дзе можна было зрабіць фота з прыгожымі драўлянымі скульптурамі.
Паглядзець на чарнічны сок праз мікраскоп прапаноўвалі супрацоўнікі Полацкага прыродна-экалагічнага музея.
Столькі на праспекце было цікавага, што і пералічыць складана. І майстры Полацкага раённага цэнтра рамёстваў і нацыянальных культур, і мастакі народнага клуба самадзейных мастакоў «Белый холст», і творчыя калектывы — здорава! А яшчэ чарнічны бодзі-арт!
А на галоўнай сцэнічнай пляцоўцы Гарадскі Палац культуры падрыхтаваў цікавую канцэртна-забаўляльную праграму, галоўнай гераіняй якой была Каралева чарніц.
Пірог сяброўства
Сапраўдным падарункам экафэсту стаў II рэгіянальны конкурс «Чарнічны пірог сяброўства». Колькі ж смакаты напяклі полацкія кулінары і аматары пякарскай справы! А якая прыгажосць, што нават варушыць было шкада...
Тут было і «Чарнічнае шчасце», і «Чарнічны флірт», і проста «Вкусняшка». Канкурсанты не толькі напяклі чарнічных прысмакаў, але і прыгатавалі цікавыя прэзентацыі сваіх кулінарных шэдэўраў.
Вызначыць лепшых сярод такога мноства пірагоў было няпроста. Дарэчы, пакаштаваць печыва і аддаць свой голас за ўпадабаны пірог маглі ўсе жадаючыя.
Пераможцы былі вызначаны ў некалькіх намінацыях.
А ў лесе...
Больш за 120 каманд арганізацый, прадпрыемстваў і ўстаноў Полацка і Полацкага раёна ў 6.00 адправіліся збіраць чарніцы. У гэтым годзе іх багата, ды надвор’е спрыяла.
Каманда «Ягадкі» Полацкага дзяржаўнага хіміка-тэхналагічнага коледжа адна з першых прыехала на плошчу. Дзяўчаты расказалі, што ў экафэсце ўдзельнічаюць упершыню і ім вельмі спадабалася. Свае вядзёркі яны набралі паўнютка. Вынікам сваім, безумоўна, задаволеныя. Больш за дзесяць вёдзер чарніц прывезлі полацкія медыцынскія работнікі. Каманда Ветрынскай участковай бальніцы назбірала 217 кілаграмаў ягад.
Пераможцаў у гэтым годзе было больш за дзясятак.
Хоць у ліку пераможцаў далёка не ўсе каманды, але кожны быў рады, што змог не толькі весела, але і з карысцю правесці час і зрабіць вітамінныя запасы на зіму. А той, хто не быў у лесе, пакаштаваў чарнічных прысмакаў і атрымаў мора пазітыўных уражанняў у горадзе.
Комментарии (0)