Прадстаўнічая дэлегацыя з сарака чалавек пад кіраўніцтвам старшыні Бярозаўскага райвыканкама Л.А. Мартынюка прыняла ўдзел у святочных мерапрыемствах абласнога фестывалю-кірмашу «Дажынкі-2016», які ў гэтым годзе праходзіў у Драгічыне. Сярод пасланцоў раёна былі намеснікі старшыні райвыканкама, начальнікі раённых аддзелаў і служб, кіраўнікі сельскагаспадарчых і перапрацоўчых прадпрыемстваў, лідары прафсаюза, лепшыя галоўныя аграномы і інжынеры.
На гэты раз у сталіцу абласнога свята ехаць было недалёка – у бліжэйшы ад нас раён.
Да гэтага старанна рыхтаваліся і нашы гаспадаркі, устанавілі каля дарог цэлыя кампазіцыі, адмыслова зробленыя з цюкоў сена. «Квітней, Беларусь!» – здалёку вітае ўсіх, хто ў гэтыя дні праязджае па трасе Брэст – Мінск, з густам аформленая выстава ААТ «Вінец» з хлебам-соллю і калодзежам з жураўлём. ААТ «Пескаўскае» хораша абазначыла ажно тры месцы на сваіх палях, дзе стаяць паравоз, трактар і старажытны замак.
На мяжы Бярозаўскага і Драгічынскага раёнаў нашу дэлегацыю шчыра віталі гаспадары свята, уручыўшы нашаму кіраўніку Л.А. Мартынюку прыгожы каравай. У нас з суседзямі вельмі многа агульнага, найперш гэта датычыцца стараннай працы на зямлі і па яе добраўпарадкаванні. Сядзібы многіх дамоў у вёсках і самім райцэнтры ззяюць яркімі колерамі разнастайных кветак. А адрозненне ў тым, што амаль на кожнай сельскай і нават гарадской сядзібе асноўная частка зямлі адведзена пад пасадкі маліны.
Па тоне зерня на кожнага жыхара
«Дажынкі-2016» пачаліся са святочнага шэсця калон па цэнтральнай вуліцы Драгічына. Бярозаўскую дэлегацыю здалёк пазнавалі і віталі жыхары горада і шматлікія госці.
На плошчы адбылося ўрачыстае адкрыццё мерапрыемства і быў падняты сцяг. Сардэчна прывітаў усіх удзельнікаў і гасцей старшыня Брэсцкага аблвыканкама А.В. Ліс.
– Драгічын ужо другі раз з’яўляецца цэнтрам абласнога свята хлебаробаў. Для нашай аграрнай Брэстчыны «Дажынкі» маюць асаблівую каштоўнасць, бо ў вырошчванне хлеба ўкладзена вельмі шмат стараннай карпатлівай працы, – адзначыў Анатолій Васільевіч. – Дзякуючы намаганням працаўнікоў вёскі, якія добра ведаюць сапраўдную цану хлебнага коласа, вобласці ўдалося сабраць 1172 тысячы тонн зерня пры ўраджайнасці 35,2 цэнтнера з гектара, а гэта другое месца ў рэспубліцы пасля Гродзенскай вобласці.
А разам з зернем кукурузы мы зможам намалаціць 1,4 мільёна тон – па адной тоне на кожнага жыхара Брэстчыны. Не першы год у лідарах раёны, дзе атрымалі больш чым па 100 тысяч тон зерня, такога поспеху дасягнулі хлебаробы Баранавіцкага, Пружанскага, Камянецкага і Пінскага раёнаў. 244 экіпажы сталі тысячнікамі, 26 намалацілі звыш паўтары тысячы тон зерня, а тры дасягнулі рэкорднага намалоту – больш двух тысяч тон. Жніво паказала нам нашы магчымасці і дало пэўныя ўрокі, абапіраючыся на якія мы будзем імкнуцца да новых вынікаў.
Старшыня аблвыканкама А.В. Ліс уручыў ганаровыя ўзнагароды пераможцам жніва-2016. Сярод раёнаў вобласці імі сталі Маларыцкі, Брэсцкі і Камянецкі. Лідар па ўраджайнасці сярод сельгаспрадпрыемстваў – ААТ «Агра-Кобрынскае», дзе з гектара сабрана па 63 цэнтнеры зерня. Лепшы вынік у абласным спаборніцтве паказаў экіпаж птушкафабрыкі «Дружба» Баранавіцкага раёна ў складзе Уладзіміра і Андрэя Казімірчыкаў, які намалаціў 2,1 тысячы тон. Пад гукі фанфар на ўпрыгожаную сцэну паднімаліся кіраўнікі і галоўныя спецыялісты лепшых гаспадарак, вадзіцелі і аператары зернасушыльных комплексаў, маладыя героі жніва.
На жаль, на гэты раз сярод іх не было прадстаўнікоў Бярозаўшчыны, а гэта гаворыць найперш аб тым, што з году ў год павялічваецца канкурэнцыя на хлебнай ніве. Але кіраўнікі нашых сельскіх гаспадарак далі сабе слова, што ў наступны раз п’едэстал будзе наш.
Затое Бяроза вызначылася, калі старшыню райвыканкама Л.А. Мартынюка запрасілі на святочную сцэну і ўручылі вымпел і пасведчанне аб тым, што райцэнтр стаў пераможцам рэспубліканскага агляду санітарнага стану і добраўпарадкавання сярод населеных пунктаў Рэспублікі Беларусь. А ў абласным аглядзе пераможцам прызнаны г. Белаазёрск, адпаведную ўзнагароду ўручылі старшыні гарвыканкама У.П. Пракапчуку. За вялікі ўклад у падрыхтоўку аб’ектаў Драгічына да правядзення фестывалю-ярмаркі «Дажынкі-2016» граматай Брэсцкага аблвыканкама ўзнагароджаны начальнік Бярозаўскай СПМК-22 Г.М. Бабіч.
Многа добрых слоў у адрас працаўнікоў Брэстчыны выказалі ганаровыя госці – першы намеснік міністра сельскай гаспадаркі і харчавання Рэспублікі Беларусь Л.А. Марыніч, міністр прыродных рэсурсаў і аховы навакольнага асяроддзя А.М. Каўтуха, старшыня праўлення Белкаапсаюза В.М. Іваноў, старшыня Беларускага прафсаюза працаўнікоў аграпрамысловага комплексу М.А. Лабушаў і іншыя, якія таксама ўручылі ўзнагароды.
Слава героям жніва
А потым на сцэну выйшлі лепшыя творчыя сілы вобласці, заслужаныя і народныя мастацкія калектывы. Многія з іх аб’ядналіся, каб выканаць захапляючыя харэаграфічныя кампазіцыі, народныя песні і танцы, якія ў даўніну суправаджалі жніво. Як заўсёды феерычным было выступленне ўзорнага ансамбля танца «Журавінка» г. Белаазёрска, які заслужыў нямала ўдзячных апладысментаў і добрых водгукаў за выкананне «Бярозаўскіх закавырак».
Дзяніса Вакера, а ён віртуозна выканаў сола на баяне, прадставілі як пасланца г. Іванава, але ж ён вырас як выканаўца ў нас у Бярозе. Народны тэатр гумару «Хмелеўскія валацугі» паказаў вясёлы нумар, пра тое, як адна з яго ўдзельніц пабывала на Алімпійскіх гульнях у Рыа-дэ-Жанейра.
Канцэрт пакінуў вельмі добрыя ўражанні і яшчэ раз даказаў, што ўмеем мы не толькі працаваць, але і спяваць, танцаваць і жартаваць. Хацелася б адзначыць і плённую працу самадзейных артыстаў Равяціцкага СДК, якія ўсе «Дажынкі» каля павільёна Бярозаўскага райспажыўтаварыства весялілі публіку так, што многія людзі кідаліся ў скокі.
Дарэчы, усё тое, што адбывалася на сцэне, можна было пабачыць на вялікім экране. І нават віды свята з вышыні птушынага палёту, бо над намі лунаў спецыяльны лятаючы апарат. А потым у небе з’явіўся самалёт АН-2 Брэсцкага гарадскога клуба, і з вышыні 1,6 кіламетра на свята паспяшыла група парашутыстаў з Дзяржаўным сцягам Рэспублікі Беларусь. Да таго ж у паветры яны выконвалі элементы купальнай акрабатыкі. Што і казаць, цікавае відовішча.
Падвор’е палешука
«Дажынкі» – гэта найперш шанаванне нашых нацыянальных традыцый, таму шматлікія гандлёвыя рады былі аформлены з нацыянальнай сімволікай. І чаго тут толькі не было!
Млыны і возікі, поўныя дароў садоў і агародаў, печы і калодзежы, шматлікія прысмакі, якімі багаты палескі край, ад пірагоў, караваяў і каўбас вочы разбягаліся.
Многа было печаных скульптур, асабліва ўразіла майстэрства бярозаўскіх хлебапёкаў, якія змаглі выпечы з цеста русалку, самавар і зрабілі хатку з багетных батонаў. Давялося пабачыць і спечаны млын, і нават парасон, а таксама шыкоўную кветку, пялёсткі якой былі зроблены з пернікаў, сухароў і зефіру. Лунінецкае райспажыўтаварыства ўразіла дрэвамі з кветак, а Столінскае – саджалкай з рыбай, на беразе якой стаяла прывязаная за вяровачку жывая качка і ахвотна пазіравала на тэлекамеры.
Весялілі дзяцей шматлікія героі казак і мультфільмаў у розным выкананні. Адно з прыватных прадпрыемстваў Драгічына нават прапаноўвала набыць гатовыя драўляныя лазні і парылкі. «Парасяты «Хомскія» – выжываюць у любых умовах, хрукаюць на трох мовах», – так рэкламаваў сябе мясцовы буйны свінакомплекс.
Годна прадставілі сваю прадукцыю бярозаўскія прадпрыемствы: ААТ «Бярозаўскі мясакансервавы камбінат», «Бярозаўскі сыраробны камбінат», «Вопытны рыбгас «Сялец», Бярозаўская ЖКГ, ЗАТ СП «Белкельме».
Многія людзі спыняліся ля адмысловай карты Брэсцкай вобласці, зробленай з зерня, круп, макаронаў, кукурузы і фасолі. Кожны раён быў абазначаны важкім мяшэчкам з лічбамі намалотаў. Бярозаўшчына была выкладзена з грэчкі, наш намалот склаў 61299 тонн зерня, і абышлі мы сваіх суседзяў з Драгічыншчыны амаль на чатыры тысячы тон.
Усё застаецца людзям
Усіх мерапрыемстваў, якія ўмясціў гэты ўрачысты і святочны дзень, не пералічыць. Цікавымі былі выставы вырабаў народных майстроў і ўстаноў прафесійнай адукацыі.
Адбыўся абласны этап рэспубліканскага сямейнага сельскагаспадарчага праекта «Уладар сяла». Бярозаўскі раённы камітэт ГА «БРСМ» дэлегаваў сям’ю Сяргея і Марыны Мушынскіх з вёскі Альшэва. Яны працуюць у ААТ «Пескаўскае» і гадуюць двух дачушак Яну і Ульяну. Нашы пасланцы занялі трэцяе месца ў конкурсе «Выстаўка дасягненняў сямейнай гаспадаркі». Шмат было спартыўных спаборніцтваў і жартоўных конкурсаў, дзе кожны мог паспытаць сваю сілу і ўдачу.
Непазнавальна змяніўся сам г. Драгічын, на ўдобраўпарадкаванне і рэканструкцыю было затрачана 8,7 мільёна рублёў. Значныя сродкі былі накіраваны на аб’екты сацыяльнай інфраструктуры, абнаўленне жылога фонду, прывядзенне ў парадак вуліц, замену ліній электраперадач. З’явіліся новыя прыгожыя месцы для правядзення вольнага часу.
Свята прайшло, а ўсё тое, што зроблена, засталося людзям, якія шчыра працуюць на гасціннай драгічынскай зямлі і мацуюць яе добрымі справамі.
Фота Сцяпана ЦЮШКЕВІЧА.
Комментарии (0)