29 Марта, 2024 Пятница

Майстры кулінарных спраў

  • 23 декабря 2016 Общество Беларуская 0

    ВАЖНЕЙШЫМ аспектам адпачынку і ўмацавання здароўя людзей з’яўляецца харчаванне. Гэта добра разумее кіраўніцтва санаторыя «Прыазёрны», таму разам з удасканальваннем медыцынскай базы, паляпшэннем бытавых умоў вялікае значэнне надае пытанням арганізацыі паўнацэннага харчавання. Як расказала загадчыца сталовай санаторыя Тамара Валасевіч, меню тут складаюць з улікам сучасных тэндэнцый. Прадукты харчавання імкнуцца браць без кансервантаў, мясцовых вытворцаў. Напрыклад, сокі, джэмы — з УП «Ілаўскае», яблыкі — з сялянскай гаспадаркі «Антэй-сад».

    — Многае закупляем у мясцовых жыхароў: бульбу, агародніну. Зеляніну і агуркі летам штодзень згодна з графікам дастаўляе насельніцтва. Таму заўсёды ўсё свежае, якаснае, — зазначае Тамара Леанідаўна. — Увогуле, большасць прадуктаў харчавання ад беларускіх вытворцаў. Маю на ўвазе мясныя і малочныя вырабы. Ну а заварка гарбаты, кава, цытрусавыя — зразумела, імпартныя. Што датычыць марской рыбы, то яе атрымліваем з базы, а вось азёрную купляем у рыбгасе «Волма» ці ў ААТ «Белрыба». Іншы раз хочацца пачаставаць гасцей вугром, але набыць яго вельмі складана.

    — Ці вялікі калектыў работнікаў працуе ў сталовай? — цікаўлюся ў загадчыцы.

    — Скажу адназначна — не малы: 14 повараў, два кандытары, 14 афіцыянтаў, 8 пасудамыек і 8 кухонных рабочых, 6 прыбіральшчыц, тэхнолаг, медыцынская сястра-дыетолаг, загадчыца склада і два кладаўшчыкі. Такім чынам, каб забяспечыць харчаванне гасцей, працуе шмат людзей, — чую ў адказ. — Кожны разумее, якая адказнасць ляжыць на ім. Таму і стараюцца ўсе працаваць з душой. Тым больш, што для гэтага створаны добрыя ўмовы. Пастаянна абнаўляем абсталяванне, набываем новае, сучаснае. Напрыклад, параканвекцыйныя печы выконваюць да 70 працэнтаў усіх магчымых аперацый цеплавой апрацоўкі, замяняючы тым самым 40 працэнтаў цеплавога абсталявання. Яны эканомяць час падрыхтоўкі, электраэнергію і вытворчыя плошчы, бо замяняюць адразу некалькі відаў цеплавога абсталявання. Для сушкі і чысткі прыбораў выкарыстоўваем паліровачныя машыны.

    Тамара Леанідаўна расказала, што ў абедзеннай зале на першым паверсе зараз ідзе рамонт. Абсталяванне ўстанаўліваецца ў адну лінію. Мяняюць інтэр’ер сцен. Словам, там робяць усё магчымае, каб зала адпавядала сучасным тэндэнцыям і патрабаванням, каб наведвальнікам было зручна і ўтульна.

    Але якое б не было абсталяванне, якасць, смак, каларыйнасць і прывабнасць страў залежаць ад тых, хто іх рыхтуе. Ад іх кваліфікацыі, майстэрства, умення. Менавіта таму пытанню падрыхтоўкі і перападрыхтоўкі кадраў у здраўніцы надаецца асаблівая ўвага. З 14 па 18 лістапада ў санаторыі выкладчыкі Баранавіцкага тэхналагічнага каледжа Людміла Галяк і Аксана Гізун навучалі повараў, кандытараў і афіцыянтаў сучасным тэхналогіям кулінарнага майстэрства, новым метадам прыгатавання страў, сервіроўцы сталоў, абслугоўванню гасцей.

    — Заняткі праходзілі вельмі цікава і карысна. Пасля афіцыянты атрымалі заданне накрыць тэматычныя сталы, а поварам і кандытарам — прыгатаваць кулінарныя вырабы з прымяненнем новых сусветных тэндэнцый. Праз тыдзень выкладчыкі зноў прыехалі ў здраўніцу разам з загадчыцай аддзялення прафесійнай падрыхтоўкі, перападрыхтоўкі і павышэння кваліфікацыі кадраў Марыяй Хмяльніцкай, каб паглядзець, як справіліся з заданнем іх «вучні», — працягвае размову Тамара Леанідаўна. —  Па выніках вучобы сярод повараў, кандытараў і афіцыянтаў прайшоў конкурс кулінарнага майстэрства з прысваеннем больш высокіх разрадаў і пацверджаннем наяўных. У конкурсе ўдзельнічалі 15 афіцыянтаў, 16 повараў і 2 кандытары.

    Афіцыянтам належыла падрыхтаваць і сервіраваць сталы па тэматыцы: беларускі стол «Мая сінявокая Беларусь», стол-фуршэт «Прамяністай сустрэчы імгненне», «Вечар для дваіх», «Успаміны пра мора», «Ах, гэта вяселле…». Яны дэманстравалі ўменне працаваць з госцем, сервіроўку і афармленне стала.

    — Кандытары спаборнічалі ў падрыхтоўцы тартоў, пірожных, пірагоў, карзінак, іншай выпечкі. Повары рыхтавалі свае стравы — рыбныя, мясныя.

    Накрылі стол-фуршэт, запрасілі прадстаўнікоў адміністрацыі санаторыя. Кожны повар абараняў сваю страву, расказваў, як яе рыхтаваў, як назваў, якая тэхналогія прыгатавання. Атрымалася своеасаблівая справаздача, — расказвае далей загадчыца сталовай. — У выніку повары пацвердзілі свае кваліфікацыйныя разрады. А яны ў іх даволі высокія. Напрыклад шосты разрад маюць Ірына Карзюк, Алена Серада, Святлана Віткус, Валянціна Сямашка. Дзяніс Фешчанка тры месяцы таму прыйшоў да нас пасля заканчэння Пастаўскага каледжа. У яго трэці разрад. Хлопец вельмі стараецца. Думаю, набыўшы вопыт, ён атрымае і больш высокую кваліфікацыю.

    Шмат добрага расказала Тамара Валасевіч пра повара пятага разраду Алену Саўко, медсястру-дыетолага Галіну Шабан, тэхнолага Кацярыну Пархімовіч.

    — А вось афіцыянты Анастасія Ракшцяліс, Хрысціна Лявіцкая, Вольга Сямёнава, Кацярына Іванчанка і Эльвіра Джумадзінава павысілі свой кваліфікацыйны разрад з трэцяга на чацвёрты. Гэта былі своеасаблівыя курсы павышэння кваліфікацыі на месцы, што эканамічна выгадна ў параўнанне з тым, каб кожнага пасылаць у Мінск ці Баранавічы, — гаворыць Тамара Леанідаўна. — У сваю чаргу, выкладчыкі каледжа выказалі сваё захапленне працавітасцю, кампетэнтнасцю, творчым патэнцыялам работнікаў сталовай і тымі ўмовамі, уключаючы сучаснае абсталяванне харчаблока і эстэтыку абедзенных залаў, якія створаны ў здраўніцы.

    Дырэктар санаторыя Аляксей Шапяцько, гаворачы пра семінар-вучобу, з  задавальненнем адзначыў, што яму ніколі не было сорамна за свой калектыў, а ў працаўніках харчаблока ён, як кіраўнік, заўсёды ўпэўнены: не падвядуць. Пра гэта, дарэчы, сведчаць і водгукі ў адрас повараў і афіцыянтаў за смачна прыгатаваныя стравы і высокую якасць абслугоўвання, якія пакідаюць у Кнізе водгукаў і прапаноў шматлікія госці здраўніцы.

    Ігнат ЛУБНЕЎСКІ.

    На здымках: афіцыянты Наталля Хільман, Вера Хільман і Анастасія Ракшцяліс; кандытар Ларыса Шушкевіч; повары Іван Цяляк, Аксана Піцольд, Дзяніс Фешчанка, Таццяна Каспяровіч, Марына Лоўкіс; афіцыянты Валянціна Сёмка і Святлана Хільман.
    Фота Аляксандра Высоцкага.
    Автор: Ігнат ЛУБНЕЎСКІНарачанская зара
    Теги: 

Комментарии (0)