Новы 2017 год наша маладая зямлячка Аліна Кароль у выдатным настроі сустрэла ў… бальніцы. Дакладней, у Салігорскім радзільным доме.
28 снежня спачатку нарадзіўся Арсеній, а літаральна праз секунду-другую і яго брацік Арцём. Два шчасця ў пялёнках, салодка пасопваючы пад лас-кавым маміным позіркам, па-мужчынску спакойна ўвайшлі ў новы год.
– Калі ўльтрагукавое даследаванне паказала, што ў нас будзе двойня, муж вельмі ўзрадаваўся. У яго сям’і двойні ўжо нараджаліся. Вельмі хацелася хлопчыкаў. Дачушка ў нас ёсць, вось цяпер будзе ёй надзейная абарона, – гаворыць Аліна.
Малышы зусім не падобны адзін на аднаго: Арсеній выліты бацька, Арцём – мама. Ужо 4 студзеня шчаслівы муж і мнагадзетны бацька прывёз сваіх любімых дамоў. Разам з ім за мамай і брацікамі прыехала і гадавалая Саша – дзяўчынка ўмомант стала ў сям’і старэйшым дзіцём.
Літара “А” ў гэтай сям’і – знакавая: усе імёны ў іх пачынаюцца з яе.
– З дачкой атрымалася само сабой. А вось сыноў назвалі ўжо спецыяльна, – расказвае самы галоўны Кароль – тата Андрэй.
Ён лічыць сябе шчаслівым чалавекам. Сустрэў сваю палавінку – прыгажуню Аліну. Па размеркаванні пасля заканчэння Ляхавіцкага дзяржаўнага аграрнага каледжа трапіў у адно з лепшых сельгаспрадпрыемстваў раёна – СВК “Ляхавіцкі”, дзе працуе аграномам-аграхімікам. І жыллёвае пытанне вырашылася для маладой сям’і: гаспадарка выдзеліла новы дом з усімі выгодамі. Так і стала Ляхавіччына другой радзімай для Андрэя, які родам з Баранавіцкага раёна, і Аліны (яна з Клецка), галоўнай – для іх дочкі і сыноў.
На тэрыторыі Начаўскага сельсавета дэмаграфічная лесвіца настойліва вядзе ўверх. Як расказала кіраўнік справамі сельвыканкама Ірына Вайцешык, летась тут зарэгістравана 6 шлюбаў. Для параўнання, у 2015 годзе – адзін. Адпаведна больш нарадзілася і дзяцей – 17 (летась 10).
Такая сітуацыя – не выпадковасць, а пацвярджэнне таго, што моладзь, якая працуе ў СВК “Ляхавіцкі” і ДП “Нача” (гэтыя сельгаспрадпрыемствы асноўныя работадаўцы на тэрыторыі сельсавета), задаволена і ўмовамі працы, і тым, як вырашаецца жыллёвае пытанне. У “Ляхавіцкім” напрыканцы 2015 і ў 2016 гадах гаспадарамі шасці апошніх новабудоўляў на вуліцы Вакзальнай і завулку Чыгуначным у аграгарадку Русінавічы сталі маладыя сем’і (сярод іх і Кароль), у якіх муж ці жонка працуюць у сельгаскааператыве.
Выкарыстана ілюстрацыя.
Комментарии (0)