Прэс-аўтапрабег па гісторыка-культурных аб’ектах Ашмянскага раёна праводзіць установа “Рэдакцыя газеты “Ашмянскі веснік” сумесна з аддзелам ідэалагічнай работы, культуры і па справах моладзі Ашмянскага райвыканкама. Запрашаем у пятніцу, 12 мая, далучыцца да сумеснага праекта калег з раённых, рэгіянальных, абласных і рэспубліканскіх сродкаў масавай інфармацыі.
Аўтапрабег па знакавых мясцінах Ашмяншчыны прымеркаваны да Дня друку і Дня Перамогі. Мэта падарожжа – папулярызацыя гісторыка-культурнай і літаратурнай спадчыны Ашмянскага раёна дзеля прыцягнення ўвагі аматараў вандровак, інвестараў і мецэнатаў да культурна-турыстычнага патэнцыялу рэгіёна.
Гістарычная спадчына, адна з галоўных частак якой — помнікі архітэктуры, з’яўляецца каштоўным скарбам, што пакінулі нам продкі. У нашым раёне знаходзяцца як тыповыя ўзоры культавых пабудоў, так і шэраговыя помнікі, якія, хаця і не з’яўляюцца «зоркамі першай велічыні», але спрыяюць захаванню гістарычнага ландшафту краю.
Падчас вандроўкі ўдзельнікі прэс-аўтапрабегу наведаюць Ашмянскі музей імя Францішка Багушэвіча, а таксама гістарычны цэнтр Ашмян: касцел Св. Міхаіла Архангела, храм Уваскрасення Хрыстова, сінагогу 2-й паловы 19 стагоддзя, руіны касцёла францысканцаў, які быў пабудаваны ў 1505 годзе. Кожны год ў Вербную нядзелю вернікі каталіцкай канфесіі здзяйсняюць крэсны ход, несучы крыж на гару вуліцы Францішканскай, якая лічыцца самай вялікай кропкай ў Беларусі, і ўстанаўліваюць там яго. Мясцовыя каталікі і паломнікі называюць гэту гару ашмянскай Галгофай.
У аграгарадку Баруны ўдзельнікі прэс-аўтапрабегу наведаюць будынак базыльянскага манастыра, касцёл Святых апосталаў Пятра і Паўла, дзе шануецца абраз Маці Божай Барунскай (суцяшальніцы засмучаных) невядомага мастака. У падземнай капліцы ў самім будынку касцёла можна будзе ўбачыць святую крыніцу, аформленую ў выглядзе фантана.
Школа у Барунах – адзін з буйнейшых базыльянскіх цэнтраў на Беларусі ў 17 – першай трэці 19 стагоддзя.
Наведваючы Баруны, нельга абмінуць памятны знак экіпажу самалёта “Ілья Мурамец” – першы на постсавецкай прасторы імянны манумент, прысвечаны ваеннаслужачым, загінуўшым у Першую сусветную вайну.
У праграме аўтапрабегу наведванне Гальшанскага гарадзішча – помніка археалогіі 12-14 стагоддзя, з вышыні якога адкрываецца таямнічая панарама аграгарадка Гальшаны і яго ваколіц. Гэта мястэчка – адно з самых цікавых і багатых на факты і звесткі ў гістарычным плане населеных пунктаў. Падчас вандроўкі па Ашмянскім краі вас чакаюць і іншыя цікавыя адкрыцці.
Далучайцеся, чакаем, не пашкадуеце!
Просім да 29 красавіка 2017 г. паведаміць аб сваім удзеле ў прэс-аўтапрабегу і ўказаць колькасць удзельнікаў. Наяўнасць свайго транспарту абавязковая.
Кантактныя тэлефоны: 8-01593 45165, 45565; 8 0296941023.
Комментарии (0)