4 мая на базе 30-й Чырванасцяжнай асобнай чыгуначнай брыгады прайшоў дзень прызыўніка. Для будучых салдат правялі экскурсію па часці, падчас якой юнакі азнаёміліся з асаблівасцямі службы, умовамі побыту ваеннаслужачых. Будучыя навабранцы наведалі музей транспартных войскаў. На пляцы адбыўся святочны мітынг. Ушанавалі памяць землякоў, загінулых у час Вялікай Айчыннай вайны, усклалі кветкі да помніка Герою Савецкага Саюза Пятру Купрыянаву і памятнага знака вязням лагера савецкіх ваеннапалонных і мірных грамадзян.
– Ужо стала традыцыяй, што напярэдадні накіравання юнакоў ва Узброеныя Сілы мы праводзім дзень прызыўніка, – адзначыў ваенны камісар ваеннага камісарыята Слуцкага і Старадарожскага раёнаў Аляксандр Міхайлавіч Петравец. – Жадаю навабранцам, каб у вашым жыцці былі толькі вучэбныя баі, моцнага здароўя і поспехаў у службе.
Падчас урачыстасці юнакоў павіншавалі падпалкоўнік у адстаўцы Васілій Васільевіч Равінскі, намеснік начальніка Слуцкага РАУС па ідэалагічнай рабоце і кадравым забеспячэнні падпалкоўнік міліцыі Андрэй Міхайлавіч Заяц і іншыя. Благаславіў на службу будучых салдат іерэй Сергій Рында.
Ветэраны Узброеных Сіл уручылі будучым вайскоўцам павесткі і лісты з наказам землякоў. Юнакі паабяцалі выканаць наказы, годна несці службу.
Комментарии (0)