Тэхнічная творчасць набірае абароты — моладзь сёння ўжо не ўяўляе свой дзень без разнастайных гаджэтаў. А больш прасунутыя хлопчыкі і дзяўчынкі не спыняюцца толькі на «цацках», яны ідуць далей: да прыкладу, распрацоўваюць робатаў і ўвогуле мараць змяніць свет з дапамогай тэхналогій. У хуткім часе развівацца ў гэтым напрамку стане яшчэ прасцей, бо ў 2020 годзе ў Мінску адкрыецца Нацыянальны дзіцячы навукова-тэхналагічны парк. Карэспандэнт «Р» даведалася аб падрабязнасцях цікавага праекта.
Калі раней бацькі адпраўлялі дзяўчынак на вязанне і бісерапляценне, а хлопчыкаў — на фехтаванне і футбол, то зараз усё крута змянілася. У Міністэрстве адукацыі распавялі карэспандэнту «Р», што ўжо некалькі гадоў у галіне дадатковай адукацыі карыстаецца вялікім попытам сфера IT. Каб ісці ў нагу з часам, у краіне ствараюцца неабходныя ўмовы — адкрываюцца інавацыйныя пляцоўкі і паркі, у якіх кожны школьнік і студэнт можа праявіць і развіваць свае здольнасці.
— Адной з такіх пляцовак неўзабаве стане і Нацыянальны дзіцячы навукова-тэхналагічны парк, — паведаміў Сяргей Каспяровіч, начальнік галоўнага ўпраўлення прафесійнай адукацыі. — Зараз прапрацоўваюцца нарматыўна-прававыя акты. Ужо вызначылі месца — гэта будзе раён жылога комплексу «Магістр», дзе зараз стаіць недабудаваны корпус БНТУ. Там трэба завяршыць працу — узвесці сцены. Потым возьмемся за адстройванне, закупім і ўстановім абсталяванне. Прапрацоўваем і пытанне фінансавання — плануецца вылучыць нейкую частку сродкаў з бюджэту, а таксама прыцягнуць нашых і замежных інвестараў. Пастараемся, каб гэта былі кампаніі, звязаныя з IT. Адкрыцца парк можа і раней прызначанага тэрміну — усё будзе залежаць ад інвестыцый.
Сфера тэхнічнай творчасці сапраўды цікавая для моладзі. Ала Герасімук, намеснік дырэктара па вучэбна-выхаваўчай рабоце Рэспубліканскага цэнтра інавацыйнай і тэхнічнай творчасці, назвала самыя актуальныя напрамкі:
— Робататэхніка, нейракіраванне, прататыпаванне,
інжынерны дызайн, вэб-журналістыка — вось што папулярна цяпер. Лічбы кажуць самі за сябе: у нашай краіне створана 12 аднапрофільных цэнтраў тэхнічнай творчасці, у іх задзейнічаны каля 36 тысяч навучэнцаў. Больш за ўсё аб’яднанняў тэхнічнага профілю створана ў Мінску, а таксама ў Гомельскай і Гродзенскай абласцях.
Комментарии (0)