– У нашай алімпійскай сям’і сёння вялікае свята, таму што кожная сям’я марыць мець свой дом, – сказаў на цырымоніі адкрыцця віцэ-прэзідэнт Нацыянальнага алімпійскага камітэта Беларусі Мікалай Ананьеў, пажадаўшы, каб гэты алімпійскі аб’ект стаў домам для новых чэмпіёнаў. Ён павіншаваў прысутных з выдатным падарункам для аматараў беларускага спорту і ўручыў Падзяку НАК Беларусі старшыні аблвыканкама Анатолю Лісу за падтрымку алімпізму ды спорту.
У мерапрыемстве прынялі ўдзел намеснік старшыні аблвыканкама, старшыня Прадстаўніцтва НАК у Брэсцкай вобласці Леанід Цупрык, кіраўніцтва горада і спартыўных аб’ектаў вобласці, чэмпіёны і прызёры Алімпійскіх гульняў, ветэраны спорту, сярод якіх – чэмпіёны Алімпіяд у Афінах 2004 года Юлія Несцярэнка, у Рыме 1960 года – Сяргей Макаранка, Маскоўскай Алімпіяды-80 Леанід Тараненка і іншыя.
Месцам для ўсіх, хто любіць спорт, павінна стаць штаб-кватэра Прадстаўніцтва НАК Беларусі ў Брэсцкай вобласці па вуліцы Леванеўскага, 17 у абласным цэнтры. Рэканструкцыя комплексу будынкаў, перададзеных Прадстаўніцтву НАК абласным выканаўчым камітэтам, вялася з 2009 года. Дзякуючы спонсарскай падтрымцы будаўнічых прадпрыемстваў рэгіёна, завяршыць праект змаглі акурат напярэдадні галоўных стартаў чатырохгоддзя – Алімпійскіх гульняў у Рыа-дэ-Жанэйра і ў юбілейны год – 25-ты з дня заснавання Нацыянальнага алімпійскага камітэта краіны.
– Мы будзем праводзіць тут сустрэчы алімпійцаў з дзецьмі, ганараванні спартсменаў за іх дасягненні, адзначаць юбілейныя даты. Галоўнае – каб было паболей прыемных нагод, – сказала дырэктар Прадстаўніцтва НАК у Брэсцкай вобласці Алена Белаконенка.
Зараз у алімпійскім комплексе размяшчаюцца офісы ведамства, канферэнц-зала, створана музейная экспазіцыя. А пасля вяртання беларускіх атлетаў з бразільскай Алімпіяды, перад пачаткам новага навучальнага года, плануецца адкрыццё інтэрактыўнай Залы алімпійскай славы Брэстчыны.
Значнасць укладу нашага рэгіёна ў алімпійскі рух адзначыў на ўрачыстасці старшыня аблвыканкама Анатоль Ліс: “21 берасцеец у 7 відах спорту заваяваў алімпійскія медалі, чацвёра сталі алімпійскімі чэмпіёнамі. 23 прадстаўнікі Брэстчыны атрымалі ліцэнзіі на ўдзел у сёлетняй Алімпіядзе ў Рыа. Упэўнены, што нашы спартсмены пакажуць вартыя вынікі”. Кіраўнік вобласці таксама згадаў выхаваўчае значэнне спорту і параіў спартсменам часцей сустракацца ў новым будынку з моладдзю і дзяліцца сваім вопытам.
Комментарии (0)