Адна з задач, якая сёння ставіцца перад лесаводамі – стварэнне новых лясоў пасадачным матэрыялам з закрытай карнявой сістэмай. Гэта сучасная тэхналогія шырока прымяняецца ў адной з лясістых краін свету – Фінляндыі, дзе 95 працэнтаў новых лясоў ствараецца менавіта такім чынам. На свае вочы пабачыўшы эфектыўнасць такой тэхналогіі, без прамаруджвання ўзяліся за яе ўкараненне работнікі лясной гаспадаркі нашай краіны. І ўжо зараз у гадавальніку ДЛГУ “Бярэзінскі лясгас” знаёмяць з распачатым сёлета новым метадам сваёй работы.
У спецыяльныя касеты гэтай вясной пасеяна 32 тысячы 100 сеянцаў елкі звычайнай, 26 тысяч ячэек знаходзіцца ў Рэспубліканскім лясным селекцыйнанасенняводчым цэнтры для высеву палепшаных саджанцаў сасны звычайнай. І ўжо ў наступным, 2016 годзе,
бярэзінскія лесаводы мяркуюць высаджваць каля 50 працэнтаў лясных культур матэрыялам з закрытай карнявой сістэмай.
Гэта сістэма, гаворыць інжынер па лесааднаўленні І.В. Дамаронак, гарантуе значна большую прыжывальнасць раслін. Улічваючы, што кожны год мы высаджваем каля 400 гектараў новых лясоў, для нас гэта перспектыўнае выйсце. Да таго ж выкарыстоўваем палепшанае насенне. Такое насенне елкі сёлета набылі з маладых плантацый Крупскага лясгаса, насенне сасны – у Старадарожскім вопытным лясгасе. Акрамя высокай усходжасці і прыжывальнасці, такія расліны больш адаптаваныя да прыродных умоў. Насенне ў ячэйкі высяваецца ў Рэспубліканскім лясным селекцыйнанасенняводчым цэнтры, з якім мы заключылі дагавор. Адтуль забіраем касеты і выстаўляем іх на дарошчванне і далейшы догляд.
Такі догляд за саджанцамі елкі ажыццяўляецца 34 гады, а вось для вырошчвання саджанцаў сасны патрабуецца адзін год. Таму можна гаварыць пра ўкараненне новага метаду ўжо ў наступным годзе не толькі ў гадавальніку, але і ў лясных масівах.
Тэхналогія вырошчвання саджанцаў з закрытай карнявой сістэмай, у адрозненне ад ранейшай у адкрытым грунце, больш дарагая. У той жа час, змяншаюцца затраты на праполку і апрацоўку раслін, якія звычайна праводзяцца не менш за 34 разы ў год.
Плануем больш укараняць работу з гербіцыдамі і механізмамі, працягвае Іна Віктараўна. – Летась мы набылі прыстаўку з культыватарам для міжрадковай апрацоўкі пасеваў і абсталяваннем для хімічнай апрацоўкі. Дзякуючы такой тэхніцы змяншаецца доля ручной працы. Сёлета плануем набыць культыватар для паравых палёў, машыну для ачысткі і абяскрыльвання насення, мяркуецца будаўніцтва цяпліц для вырошчвання пасадачнага матэрыялу з закрытай карнявой сістэмай.
У цэлым, у гадавальніку вядзецца звычайная штогадовая работа: закладзена пасяўное аддзяленне, цяпер больш працуюць са школкамі, выконваецца праполка і чаранкаванне.
У нас каля 500 тысяч саджанцаў розных дэкаратыўных раслін – гэта сперэі, туі, кіпарысавікі, барбарысы, фарзіцыі і шмат іншых, адзначае І.В. Дамаронак, перасаджваем іх у гаршчкі для продажу пасадачнага матэрыялу. Сёлета ад рэалізацыі мы зарабілі каля 800 мільёнаў рублёў, найбольш актыўна працуем з “Зелянбудам” горада Мінска, прадпрыемствам “Хатэй” з Жодзіна, набываюць саджанцы бярэзінцы і сталічныя жыхары.
Разам з павелічэннем колькасці саджанцаў пашыраецца іх разнастайнасць. Сёлета мяркуецца чарговая паездка ў Батанічны сад горада Мінска для чаранкавання раслін, якіх на дадзены момант у гадавальніку Бярэзінскага лясгаса няма. Усяго ў планах чаранкавання 100 тысяч раслін. Адначасова працягваецца перапрацоўка хваёвых шышак. Сёлета ўжо атрымана 450 кілаграмаў насення елкі звычайнай і 50 кілаграмаў насення сасны. Аказвалі дапамогу ў перапрацоўцы шышак Мінскаму і Капыльскаму лясгасам, зараз у рабоце насенне для Чэрвеньскага лясгаса.
Аб’ём работы значны, тым больш, калі ўлічыць, што выконвае яго невялікі калектыў, на дадзены момант з 8 чалавек. Перш за ўсё інжынер па лесааднаўленні называе пастаянных работнікаў гадавальніка – Ганну Васільеўну Стасевіч, Таццяну Уладзіміраўну Казак, Аксану Мікалаеўну Каравую, Таццяну Сцяпанаўну Дзюбайла, Вольгу Уладзіміраўну Пятрову. Кожную вясну да іх далучаюцца часовыя работніцы Вольга Анатольеўна Бандзік, Жанна Уладзіміраўна Фурс, Людміла Анатольеўна Шчурко. Усе яны старанна шчыруюць на сваім рабочым месцы, першымі ўласнымі рукамі ўкараняюць новыя тэхналогіі ў лесааднаўленні.
На здымках:Вольга Уладзіміраўна Пятрова, Аксана Мікалаеўна Каравая, Людміла Анатольеўна Шчурко; Вольга Анатольеўна Бандзік дэманструе хваёвыя насаджэнні ў касетах.
Фота аўтара.
Комментарии (0)