Засушлівае лета, што адзначаецца і сёлета, цёплая зіма, а яшчэ бураломы, ветравалы найбольш спрыяюць развіццю аднаго з галоўных шкоднікаў лесу – караедатыпографа. Гэтага жука яшчэ называюць вялікім яловым караедам. Бо часцей за ўсё яловыя насаджэнні становяцца аб’ектам небяспечнага ляснога шкодніка, на барацьбу з якім у тым ліку накіравана работа ахоўнікаў лесу.
Пачынаецца такая работа, як адзначае інжынерлесапатолаг ДЛГУ “Бярэзінскі лясгас” Аляксандр Васільевіч Шакула, з абследавання лясоў, якое ў год ахоплівае не менш за 15 тысяч гектараў. Яго мэта – ацэнка стану лясоў, выяўленне плошчаў, заражаных насякомымішкоднікамі. Праводзіцца і лесаэнтамалагічны маніторынг, які ахоплівае плошчу ў 5,5 тысячы гектара. Складаецца праект да ведамасці нагляду і штогод вядзецца кантроль за насякомымі – ацэнка колькасці шкоднікаў і іх рух. З гэтай мэтай развешваюцца пасткі з ферамонамі. Толькі сёлета развешана 345 пастак у тых месцах, дзе былі заўважаны шкоднікі і высыханне дрэў. Перш за ўсё гэта датычыць Брадзецкага, Бярэзінскага, Багушэвіцкага і Пагосцкага лясніцтваў.
Найбольш дзейсная барацьба з караедамтыпографам заключаецца ў яго своечасовым выяўленні і высяканні пашкоджаных дрэў.
Стараемся не даходзіць да хімічнай апрацоўкі, заўважае Аляксандр Васільевіч Шакула, а прымаць іншыя дзейсныя меры. З ліку такіх біялагічных мер ахова і падтрыманне птушак і іншых карысных насякомых, у прыватнасці, мурашак, якіх называюць санітарамі лесу. Менавіта з гэтай мэтай абгароджваем мурашнікі, развешваем сінічнікі для прыцягнення птушак. Толькі сёлета абгарадзілі каля 400 мурашнікаў на 110 гектарах і развесілі каля 500 сінічнікаў на плошчы ў 120 гектараў. Сінічнікі майструюць у асноўным нашы работнікі ва ўсіх лясніцтвах, а таксама члены школьных лясніцтваў.
У цэлым жа ў Беларусі, лесапаталагічны маніторынг ажыццяўляецца практычна на ўсёй плошчы ляснога фонду – 91 працэнт. У той час як у Фіндяндыі, напрыклад, такому абследаванню падвяргаецца толькі 25 працэнтаў дзяржаўных лясоў, дзе з ліку асноўных фактараў шкоднага ўздзеяння на лясы называюцца ветравалы ў прыбярэжных раёнах. У той час як у нашай краіне акрамя ветравалаў, гэта бураломы і снегаломы, градабой, засухі, успышкі масавага размнажэння шкодных насякомых, больш шырокі і разнастайны відавы састаў шкодных арганізмаў.
Комментарии (0)