Нягледзячы на тое, што на календары пачатак снежня, сапраўдная зіма пакуль не спяшаецца. І тым не менш, ацяпляльны перыяд заўсёды прыходзіць без затрымак.
На гэта, у адпаведнасці з народнай мудрасцю аб тым, што “сані неабходна рыхтаваць летам”, працуюць камунальныя службы. Работа, як адзначае майстар РКВУП “Бярэзінская ЖКГ” У.У. Хомчанка, пачынаецца вясной са знешняга і ўнутранага агляду катлоў і абсталявання.
Асноўная кацельня нашага горада – энергакрыніца на мясцовых відах паліва.
Яна, гаворыць Уладзімір Уладзіміравіч, адносна новая, але без прафілактыкі і неабходнага рамонту не абыходзіцца – чыстка катлоў і прафілактычны рамонт кожнага вузла, замена масла, фільтраў, чыстка дымасосаў і гэтак далей. Патрабаваліся і зварачныя работы, некаторыя запчасткі выраблялі самі. Праверка на халодным хаду – таксама неабходная ўмова.
Калектыў работнікаў кацельні з дзесяці чалавек дакладна ведае гэтыя абавязкі і своечасова іх выконвае, тым больш, што ўсе работнікі з вопытам работы і неабходнымі ведамі.
У.У. Хомчанка пачынаў тут працаваць на пасадзе майстра яшчэ ў час будаўніцтва энергакрыніцы на мясцовых відах паліва. Адсочваў увесь гэты працэс, прымаў удзел у пуску і наладцы, выпрабаванні новай кацельні. Таму зараз без цяжкасцей арыентуецца ў рабоце ўсяго абсталявання. Большасць машыністаў таксама не навічкі ў кацельнай справе, давялося папрацаваць у кацельнях на мазуце і прыродным газе, ра зам асвойвалі і энергакрыніцу на мясцовых відах паліва. З іх ліку Іван Міхайлавіч Хахол, Мікалай Леанідавіч Рабцэвіч, Леанід Васільевіч Монтвід. Ёсць і навічкі, якія хутка набылі неабходныя навыкі, сярод іх Аляксандр Леанідавіч Бабура, Станіслаў Станіслававіч Славашэўскі.
На чале з майстрам У.У. Хомчанкам працуюць сёння і дзве кацельні ў сельскіх установах адукацыі Капланецкай і Гарэніцкай. Іх абслугоўваюць восем чалавек.
Там таксама, адзначае майстар, замянілі катлы, устанавілі новае абсталяванне, больш дасканалую сістэму бяспекі. Як заўсёды перад пачаткам ацяпляльнага перыяду ўсё праверылі і смела запусцілі ў работу.
Плюсавая тэмпература на двары ў гэтыя дні не адмяняе адказнага стаўлення камунальнікаў да кацельняў. Акрамя дакладнасці ў рабоце абсталявання, важная неабходная колькасць паліва, таму заўсёды ёсць патрэбны запас шчэпак і дроў. Значна меншымі сталі ў апошні час страты на цеплатрасах. Пастаянная замена старых цеплавых сетак на пітрубу дае істотныя вынікі, якія на сабе адчуваюць усе, хто атрымлівае цяпло з цэнтралізаваных крыніц.
На здымку: майстар кацельні Уладзімір Уладзіміравіч Хомчанка.
Фота Алены ГРОМАВАЙ.
Комментарии (0)