16 студзеня на пагранічны пункт спрошчанага пропуску “Мольдзевічы” прыбыў унікальны груз — 50-метровая труба дыяметрам 6 метраў, вышынёй больш за 7, вагой 166 тон.
Яна прызначаецца для рэканструкцыі цэха слабай азотнай кіслаты на прадпрыемстве “Гродна Азот”. Праверкай і афармленнем дакументаў займаліся пагранічнікі старшы змены старшы прапаршчык Аляксандр Назаранка, прапаршчыкі Ангеліна Андрэйчык і Марыя Кірплюк. Дзякуючы іх прафесійным дзеянням перасячэнне беларускай граніцы прайшло ва ўстаноўленым парадку.
“Падарожжа” трубы пачалося з завода ў чэшскім Мельніку, адтуль абсталяванне сплаўлялася па Эльбе, потым па Балтыйскім моры ў порт Клайпеды. З 11 студзеня груз везлі па дарогах Літвы. Паколькі ён буйнагабарытны, яго суправаджалі супрацоўнікі дзяржаўтаінспекцыі. За бяспеку на дарогах нашага раёна адказвалі старшы інспектар дзяржаўтаінспекцыі Андрэй Цымбалюк і інспектар Віктар Гутар.
— У нядзелю мы суправаджалі груз ад граніцы з Літвой да граніцы з Гродзенскай вобласцю, — расказваў Андрэй Іванавіч. — Труба займала практычна ўсю праезную частку. Канструкцыю перавозілі на 224 колах: цягач з платформай і ззаду магутны МАN на счэпе, які пры неабходнасці мог падштурхнуць груз пад гару. Вага «каравана» — 288 тон. Прадстаўнікі транспартнай кампаніі амаль год прапрацоўвалі маршрут, вывучалі кожны паварот, правяралі на трываласць усе аўтамабільныя масты. Займалася гэтай складанай лагістыкай каманда з Польшчы.
У Літве груз назвалі самым буйнагабарытным і цяжкім у гісторыі аўтамабільных дарог. Там перыядычна прыходзілася дэманціраваць дарожныя знакі, навясныя мацаванні для святлафораў, адключаць электрычнасць. У нас клопатаў было менш. Аўтапоезд рухаўся з хуткасцю каля 30 кіламетраў у гадзіну. Аперацыя прайшла паспяхова.
Найбольшая нагрузка ў гэты дзень прыйшлася на работнікаў раёна электрычных сетак.
— Звычайна перавозка такіх буйнагабарытаў арганізуецца праз пункт пропуску “Лынтупы”, — расказваў начальнік дыспетчарскай службы РЭСа Мікалай Ожаль. — Лініі электраперадачы па дарозе ў гэтым напрамку ў нас падрыхтаваны. На гэты раз у 36 месцах перасячэння правадоў з дарогай праводзіўся іх дэмантаж, а потым мантаж. У некаторых месцах электраправады было дастаткова прыпадняць вышэй. Быў задзейнічаны 21 чалавек, 3 вышкі-пад’ёмнікі. На ўчастку Агароднікі—Мольдзевічы працавала брыгада Андрэя Лютынскага, у Вольсі — Аляксандра Дзехцяра, у Дашках, Драбышах — Максіма Ягорава, ад Загачча да граніцы з Мядзельскім раёнам адказнымі былі Юрый Саулевіч і Валерый Мігачоў. Кіраваў работамі галоўны інжынер Леанід Бараноўскі. Жыхарам названых і навакольных вёсак з васьмі раніцы амаль да трох гадзін дня прыйшлося быць без электрычнасці.
«Падарожжа» трубы доўжылася 9 дзён. У аўторак яна дастаўлена на “Гродна Азот”. Пэўны ўклад у бяспечнасць транспарціроўкі ўнеслі і адпаведныя службы нашага раёна.
Комментарии (0)